1 Kronikas 28 - DAWAN BÎLA AISKA

Salaman ba Debit pliska ba alkan

¹ Debit Jerusalem ra Israel luhpia nani lalka nani ba sut asla daukan: kiamka bani lalka nani ba, war aiklaklabra daknika nani ai lalka bani aikuki, king dukia dauki kan ba, war aiklaklabra daknika tara lalka nani bara daknika sirpi lalka nani ba, tasba aiska pura kaiki nani, king bara ai luhpia nani bîpka main kaiki nani ba, waitna nani kulkanka kau tara bri ba, war aiklaklabra nani kau yamni nani ba sut sin asla daukata.

² Bamna Debit ai mina ra bûi bara win: “Yang ra ai wals, muihki nani bara upliki nani sin: Yang luki kapri Gâd lâka auhbaia watla ba pliska kum paskaia, bara bahara swika ban bâra kaia, bara baha pliska ra sin Dawan ai king iwaika bribia. Baha paskaia dukiara diara sut pat aitani kat wapni daukri kan.

³ Sakuna Dawan bui ai win: ‘Man apia sika tempel kum paski aikbia ba, kan man ba war waitnika kumi sma, bara tala sin laikram sa.’

⁴ Ban sakuna, Dawan Israel Gâdka ba bui aisiki watla bîla ba wina, yang na bâk ai saki, Israel kingka ban kaia ra ai mangkan sa. Bamna witin Juda kiamka ba bâk saki brin, kiamka kumi tâ aimaki kaia, Juda kiamka tila ba wina waitla uplika nani ba bâk sakan, bara muihki nani tila ba wina yang na bâk ai sakan Israel aiska kingka kaia.

⁵ Bara nanara luhpi nani sut tilara, âu, Dawan bui luhpa waitna nani ailal aikan sa, bamna Dawan bui luhpi Salaman ba bâk sakan sa, Dawan king aimaki iwaika ra iwbia Israel luhpia nani purara.

⁶ Dawan sin ai win: ‘Man luhpiam Salaman bui yang waitla kumi paskbia bara utla kutbanka nani sin dauki aikbia, kan witin ba luhpi baku bâk sakri sa, bara yang na witin aisika kum baku kamna.

⁷ Bara ai kingka lâka ba ban kaia ra daukamna, bamna witin sin dîa lâ mangkri ba aiska daukbia kaka, naiwa yua ra ba baku.’

⁸ “Bamna Israel luhpia nani, daknika aiska mawanra, bara Dawan wan wali ba, man nani Dawan Gâdkam lâka nani ba alki bris, bara naha tasbaya yamni na ban prapati kum baku swima luhpiam nani dukiara.

⁹ Bamna man, luhpi Salaman, aisikam Dawanka ba kakaira taks, bara ai dukia dauks kupia kasak ni, kupiam pihni lâka ra, kan Dawan lika upla sut kupia tânka pliki kaikisa, bara dîa wan lukanka ra ba sut pali tânka brisa. Bara man bui witin ba plikma kaka sâkma, sakuna witin ba man swima kaka, witin bui ban kaia ra mai lulkbia.

¹⁰ Bamna, kaiks nanara, Dawan bui bâk mai sakan Dawan wal aisaia watla kum paskaia, ¡bamna dutki bûi mahka dauks!”

¹¹ Bamna Debit ai luhpia Salaman ra prias watla dimaia durka playa nani nahki bapaia ba bara tempel daukaia kan ba sin sut yan, ai lalahka watla nani, pura rumka nani ba, rum kutbanka nani aiska, angki daukaia watla ba sin.

¹² Baku sin Dawan watla kutbanka ra diara nani daukaia ai sinska ra bri kan ba sut yan; baku sin kutbanka nani daukaia kan ba mawan tani, lalah nani Dawan watla ba dukiara auhbi bri kaia pliska ba, bara yamni munan dukia nani watlika ba sin.

¹³ Baku sin prîs daknika nani bara Libait nani bâra kaia pliska ba, Dawan tempelka ra wark nani sut ba dukiara, bara Dawan watla ra wark daukaia dukia nani ba pliska sin.

¹⁴ Bamna gul bara silbar yan, diara nani gul ni daukan dukia nani ba sin yan, prias dauki piua ra yus munaia ba.

¹⁵ Gul yan, kiandil angkaia watla ba gul ni daukbia dukiara, ingni nani ba dukiara sin silbar ni daukaia yan, dîa ai wirhika bri ba praiska kat.

¹⁶ Baku sin gul nani yan, wal lâ daukan britka kahbaika tibilka nani daukaia, tibil wala nani sin daukbia dukiara win, baha natka ba kat silbar ni.

¹⁷ Gul aihwa nani yan, park nani daukaia, lî watla nani dukiara sin silbar kapka ba sin kumi bani praiska ba kat yan.

¹⁸ Baha purkara kîa yamni angkaia watlika ba dukiara gul aihwa aitani kat yan, baku sin gul yan truk ba dukiara. Baha sika insal nani, Gâd lâka auhbaia watla ba purara ai tnawa ilingki bri ba dukiara sin lalawbia wisi yan.

¹⁹ Naha diara nani sut na ulbanka kumi ra Dawan bui Debit ra marikan ulban kata, bahara sika wark nani bani daukaia kan ba, pat ulbi daukan kan.

²⁰ Bamna Debit bui Salaman ra win: “Kupiam karna bris bara karna bas, wark ba mihtam ra bris. Si bripara, swapni sin takpara. Kan Dawan Gâdki ba man wal kabia, witin yakan mai lulki swibia apia, tempel warkka ba sut dauki tnata alkma ba kat.

²¹ Kaiks, nahara sa prîs nani bara Libait nani daknika, Dawan watla ra wark nani bâra kabia ba daukaia dukiara. Witin nani sin wark nani sut ra man wal kabia ai kupia aiska. Uplika nani ba âuya mâira nani sa, witin nani wahbi sakan sa sim wark nani sât sât kabia ba dukiara; baku sin lalka nani ba bara upla nani sut ba, man dîa wima ba kat daukan kabia sa.”