1 Kronikas 23 - DAWAN BÎLA AISKA

Libait nani ai warkka daukaia ba

¹ Debit ba pat almuk pali kan, mani sin ailal bri kan, bara witin ai watlika ra ai luhpia Salaman ba Israel kingka kabia mangkan,

² bara Israel lalka nani, prîs nani bara Libait nani sut asla daukan.

³ Libait nani ba kulki kaikan kata, 30 mani bri ba wina ai purara, kulki kaikan ba ra waitna nani asla sut ba 38,000 kata.

⁴ Naha nani wina 24,000 ba lika tempel mâkaia warkka nani ba tâ briaia mangkan, 6,000 ba lika wark tâura mangkan tâ wihta nani kaia,

⁵ bara 4,000 wala ba lika dur aihwawakra nani mangkan, 4,000 wala ba lilia binka daukaia dukia nani ba warkka yan, Dawan ra lawana aiwani mayunaia, Debit bui baku daukaia win ba kat daukan.

⁶ Bamna Debit bui dakni dakni baiki sakan, Libai luhpia nani kukan ba tânka kat: Guersón, Quehat bara Merarí ai daknika ra.

⁷ Guersón luhpia nani ba: Ladán bara Simí wal.

⁸ Ladán luhpia nani ba asla yumhpa kan: almukka ba Jehiel, Zetam bara Joel.

⁹ Simí luhpia nani ba sin yumhpa kan: Selomit, Haziel bara Harán. Naha nani sika Ladán kiamka nani lalka kan ba.

¹⁰ Simí luhpia nani ba lika walhwal kan: Jáhat, Zizá, Jeús bara Beriá.

¹¹ Almukka ba Jáhat, baha ningka ba lika Zizá; sakuna Jeús bara Beriá wal ba luhpia waitna ailal sakras kan, baha mita taika kumi baku kulkan kata.

¹² Quehat luhpia nani ba walhwal kata: Amram, Isacar, Hebrón bara Uziel.

¹³ Amram luhpia nani ba Eran bara Moses kata. Gâd bui Eran ba bâk saki mangkan mana luha dukia kau sunukira yabi kaia dukiara, Dawan ra kîa yamni angki yaia, warkka daukaia bara yu bani yamni munanka nani dauki kaia, baha warkka nani dauki ban kaia kan Eran bara ai lupia nani ba aikuki.

¹⁴ Dawan uplika Moses ba, ai kiamka nani sut aikuki, Libai kiamka nani wal asla prakan kata.

¹⁵ Moses luhpia nani ba kan ba Guersón bara Eliézer.

¹⁶ Guersón luhpia nani ba wina, tawahkia ba lika Sebuel,

¹⁷ Eliézer lupia tawahkia ba lika Rehabías, bara witin luhpa waitna wala briras kata; sakuna Rehabías lika luhpia waitna manis brin.

¹⁸ Ishar luhpia tawahkia ba lika Selomit.

¹⁹ Hebrón luhpia nani ba lika: tawahkia ba Jeraías; ningka ba Amarías; yumhpika ba Jahaziel; bara walhwalka ba Jecamán.

²⁰ Uziel luhpia nani kan ba: tawahkia ba Micaías, ningka ba Isías.

²¹ Merarí luhpia nani kan ba Mahli bara Musí. Mahli luhpia nani kan ba Eleazar bara Quis.

²² Eleazar ba luhpa waitna kumi sin sakras ban pruan: luhpa mairin nani baman sakan, sakuna ai rapika Quis luhpia waitna nani wal marit taki banhwan.

²³ Musí luhpia nani ba yumhpa kan: Mahli, Éder bara Jeremot.

²⁴ Naha nani sika Libai kiamka nani ba, taika nani ba kat nina nani ba ulbi mangkan, taika nani nina ulbi mangkan ba tilara, mani yawanaiska bri ba wina purara, baha nani ba tempel ra wark lalka nani kan.

²⁵ Debit bui aisi win kata: “Dawan, Israel Gâdka ba, ai uplika nani ra yaban sa lamni lâka bara ai iwaika pliska kum Jerusalem ra.

²⁶ Baha mita, Libait nani lika Dawan watla ba kli twilki taukaia apia, tempel ra bahara wark daukaia dukia nani ba sin apia.”

²⁷ Baku bamna, Debit aisanka lâs nani ba kat, Libai kiamka nani mani yawanaiska kumi bri ba wina ai purara nina nani ulban,

²⁸ bara Dawan tempelka ra wark nani daukaia duki nani ba, prîs nani Eran kiamka nani ba mihta ra mangki swin kata; utla kutbanka nani ba, utla rum bilara kutbanka ba bara diara nani sut sunukira bâra kan ba, wark wala nani bâra ba sut sin, baha nani mihta ra mangkan.

²⁹ Baku sin brit nani ai lainka ra kahbi kan ba, kîa yamni angkaia dukia nani, plawar tangnika nani, saika mangkras brit angkan nani ba, brit angkaia pânka ra mangki kuk takan pata nani, plawar akban aiska paun ra mangki kaikan nani ba sut mihta ra mangkan.

³⁰ Baha purkara, witin nani yu bani, titan bara tutni tempel ra kaia kan, Dawan ra tingki wiaia mayunaia dukiara,

³¹ daiwan aiska angki Dawan ra yabi ba ra, kati raya yua liliaka daukaia yua ra, yua tara nani liliaka dauki ba ra bara ris yua nani ra. Baha piua bani Libait nani ba wina kulki saki bliki kan, witin nani sika piu bani Dawan warkka ba dauki kan.

³² Witin nani ai mihta ra kata tint watla, Dawan wal aisaia tintka watla kan ba, bara sunukira pliska ba. Tempel ra wark dauki kan ai muihni kulkan kiamka nani ba aikuki, Eran kiamka nani ba sin.