1 Kronikas 22 - DAWAN BÎLA AISKA

¹ Baha mita Debit win: “Nahara kabia, Dawan tempelka ba, aiska angki sakripaiska daukaia pliska wan Dawan ra yaia baha sut ba Israel dukia.”

Tempel mâkaia ridi daukan ba

² Baha ningkara, Debit upla blikan maisa pakaia, Israel tasbaya ra tringsar nani iwi ba sut asla daukbia, witin nani ai tila wina wahbi sakan, walpa klaki wark dauki nani ba, Dawan tempelka mâkaia ba dukiara.

³ Baku sin dur nani sabaia dukiara, Debit silak tatwa nani ailal asla daukan, bras dukia nani sin ailal,

⁴ bara yalam dusa nani sin tnata âpu, baku sin Sidón bara Tiro uplika nani mita yalam dusa nani ailal pali bri si Debit ra yan.

⁵ Bara Debit luki kaikan: “Yang luhpi Salaman ba kau tuktan sa, mani wiria baman brisa, bara Dawan tempelka mâkaia ba lika tara pali kaia, upla sut bui sin yamni kulkan kaia tasba aiska ra; baku bamna, diara sut wapnika dauki swimna.” Baku ba mita, Debit lika witin kau pruras kan ba ra, diara ailal pali wapni dauki swin kata.

⁶ Ningkara Debit ai luhpia Salaman ra paiwan, bara witin mihta ra mangkan, Dawan, Israel Dawanka watla ba mâkaia dukiara.

⁷ Bara Debit Salaman ra win: “Luhpi, yang luki kapri Dawan Gâdki ra tempel kum mâki yaia.

⁸ Sakuna Dawan bui ai win: ‘Yang kaikisna, man ba uya upla tâlia laikram bara war sin uya aiklabram, baha mita man lika tempel ba mâkma apia.

⁹ Sakuna man luhpa waitna kumi brima, witin lika kupia kumi waitnika kabia, baha purkara yang munrika ani ani pliska ra ai waihla nani bâra ba, witin wal kupia kumi bri kabia. Baha mita ai nina ba Salaman mâkan kabia. Sakuna witin ai yua ra Israel ra kupia kumi bara lamni lâka bâra kabia.

¹⁰ Bamna witin bui tempel ba mâki aikbia. Witin ba yang luhpi kabia bara yang na witin aisika kamna, bara ai kingka lâka ba Israel tilara ban kaia ra ban kabia.’

¹¹ Bamna nanara, luhpi, Dawan ba man wal kabia bara tâm baikbia Dawan Gâdki tempelka kumi mâkaia, witin aisin ba kat man bui daukma.

¹² Dawan bui diara tânka briaia lâka bara sins lâka ailal maikbia, witin bui Israel kingka mai mangkbia yua ra, bara Dawan Gâdkam lâka nani sut ba kulki kama.

¹³ Diara sut mampa ra yamni kabia, Dawan bui Moses ra, Israel luhpia nani dukiara lâ nani yan ba aiska alki brima kaka, bamna kupiam karna brih pain bapi bûi bas, bara swapni taki si bripara.

¹⁴ Bamna kaiks, yang Dawan watla ba mâkaia dukiara wark karna pali takri sa; gul 3,300 ton kuki swiri, 33,000 ton kuki swiri silbar, baha purkara bras nani bara ayan nani ba lika sip kulkaia apia prais. Baku sin tat bara walpa nani ridi daukri sa, man kau prakma dukiara.

^15-16 Baha sut purkara, man wark uplika ailal pali brisma, walpa warkka tânka bri nani ba, walpa ni utla paskaia tânka bri nani, tat ni utla paskaia tânka bri nani, wark sât sât daukaia tânka yamni bri uplika nani lika sip kulkras pali, gul, silbar, bras bara ayan warkka lan nani ailal pali. Baku bamna, mihtam ba wark ra dingks, bara Dawan tâm baikbia.”

¹⁷ Baha sut ningkara, Debit bui Israel lalka nani sut ra maisa pakan ai luhpia Salaman ra tâ baikbia, naku aisi:

¹⁸ “Dawan Gâdkam ba man nani wal sa, bara tasba aiska ra kupia kumi lâka maikan sa, witin bui sika tasba aiska ba mihtam ra mangkan sa, bara tasba aiska na Dawan mihta ra sa bara ai upla nani ba sin.

¹⁹ Bamna nanara, Dawan wan Gâd ba wal prawaia wilin pali taki banhs. Baku bamna, watla ba paski banhs bahara lâ nani ba swiaia, Dawan lâka auhbaia watla daukan ba bakska ba, bara dîa dîa dukia wala nani sunu kulkan ba, Dawan watla raya paskaia wisna ba ra bri si swibia.”