1 Kronikas 20 - DAWAN BÎLA AISKA

Debit bui Rabá pura luan ba

¹ Piua kum, twi kura baiwi katka ra kan taim, king nani ai natka ba kat impaki watauki kan, bara Joab ba impakan ai war waitnika nani kira bara Amón uplika nani bâra ba tasbaya ra wan. Bara Rabá tawanka ba kutban, ningkara aiklabi sauhki tikan. Baha piua ra Debit lika Jerusalem ra takaskan.

² Ningkara, Debit bui king kraunka ba king lal wina brin, baha lika gul ni paskan ba, walpa klauhira bri kan ba 33 kilo wirhika bri kan; ningkara baha ba Debit lal ra mangkan. Debit sin tawan ba wina diara manakira nani ailal sakan,

³ bara tawan bilara kau upla nani bâra kan ba sin baha wina saki, ningkara wark takaia mangkan, sâ ni wark daukaia, plun mâ taya sakaia bara asa ni warkka nani daukaia. Baku Debit Amón uplika nani ra daukan, bara baha wina aiklaklabrika sut wal Jerusalem ra balan.

Kiamka tara nani mapara aiklabanka

⁴ Baha ningkara, aiklabanka tara kum takan filisteo nani aikuki Guézer tasbaya ra. Baha piua ra Sibecai, Husá wina ba, Sipai ra iki saura munan, witin sika upla kiamka tara kan.

⁵ War tara wala aiklabanka bri kan ba, filisteo mapara Jaír luhpia Elhanán bui Lahmí ra ikan, Goliat muihnika ra, Gat wina ba, ai langsika ba yari bara tara pali kan.

⁶ Gat ra war kli aiklaban. Waitna tara yari kum bâra kan, mihta sirpika nani 24 bri kan, mihta bani ra sirpika 6 bri kan, mina bani ra sin sirpika 6 bri kan. Naha nani ba sin waitna tara ba kiamka,

⁷ sakuna Israel luhpia nani ba mistik tara takan, baha mita Janatan ra ikan, witinka lika Simá luhpia Debit muihnika ba.

⁸ Naha waitnika nani kiamka tara ba, Réfah kiamka, Gat tawanka wina; ban sakuna, Debit bara ai suliarka nani mihta ra aimakan.