1 King Nani 9 - DAWAN BÎLA AISKA

Salaman wal Gâd lâ kum daukisa

¹ Bamna Salaman Dawan watla ba dauki tnata alkan ba ra, king iwaia watla ba sin, bara Salaman dîa wala nani sin daukaia lukan ba sut dauki tnata alkan ba ningkara,

² Dawan kli Salaman ra aima wâl ra latan takan, Gabaón ra latan takata ba baku,

³ bara Dawan bui win: “Yang puram sunra bara makabankam daukram ba sut walri. Yang bui naha tempel daukram na yamnika yâri sa, bahara yang nini ba swiaia ban kaia ra. Bara naha watla ba, yang piu sut main kaiki kamna bara yang sin bâra kamni.

⁴ Bara papikam Debit laimara wapan ba baku wapma kaka, kupia tâski âpu, wapni bara kasak kat, diara nani sut daukaia wîri ba dauki kan, bara lâika bîla nani ba alki bri kan, kupi lâka ba kat,

⁵ yang bui king iwaikam Israel ra ban kaia ra daukamna, papikam Debit ra aisi wisatna ba baku: ‘Man kiamkam wina luha takbia apia Israel king iwaika ra.’

⁶ Ban sakuna, man nani bara luhpiam nani sut sin, lâika bîla nani ba kulkras, lâ wala nani wîri ba sin daukras kama kaka, bara gâd bahki wala nani dukia dauki mayunma kaka,

⁷ yang bui Israel ba baha tasbaya yâri ba wina sakamna, bara naha watla yang nini ra yamnika yâri na, yang maiwan wina âpu daukamna, bara Israel luhpia nani ba nisan wala nani mita lawaska kiki kaiki kabia piua bani ra.

⁸ Bara naha tempelka na sauhki tikanka tara kabia, bara upla nani bui wih kaiki tâ iwi bara lawaska kiki wibia, dîa muni Dawan naku pali naha tasbaya ra daukan bara naha watla ra sin.

⁹ Bara pana aisi wibia, kan witin nani Dawan Gâd ra swih banhwan ba mita, Idsip tasbaya wina ai damika nani sakata ba, witin nani gâd bahki nani ra mayuni dukia daukan bamna; baha mita Gâd bui naha saurka nani sut na witin nani purara brih balan.”

Salaman wark wala nani daukan ba

¹⁰ Bara mani 20 luan ningkara, Salaman utla wâl ba mâkan kan, Dawan tempelka ba bara king iwaia watla ba sin.

¹¹ Baha nani mâkaia dukiara sika Tiro kingka Hiram bui dus nani Salaman ra bri sal yan kata, yalam dusa, awas dusa nani bara walpa klauhira sin. Pana baha mana, king Salaman bui Hiram ra, Galili tasbaya ra tawan 20 nani yaban kata.

¹² Bara Tiro kingka ba taki wan baha tawanka nani Salaman bui yan ba kaikaia, bara baha tawanka nani yan ba Hiram witin bui pain kaikras kan.

¹³ Bara win: “Muihki, ¿dîa sât tawanka nani man aikram sa?” Bara tasbaya ba nina Cabul mâkan, baha nina ba ban brisa naiwa kat.

¹⁴ Bara Hiram bui king Salaman ra gul nani blikan ba 5 ton nani kata.

¹⁵ Bara naha tânka mita sika, king Salaman upla nani ra taiban lâka ra asla daukan kan ba Dawan tempelka ba paskaia, witin ai watla pali ba, baku sin tasba yakabi daukan pliska ba bara Jerusalem kutbanka nani ba, baha purkara Hasor, Meguido bara Guézer tawanka nani ba sin.

¹⁶ Idsip kingka fero bal Guézer ba dakbi brin, bara sin angkan, bahara Kenan uplika nani iwi kan ba sut sin ikan kata. Ningkara baha tasbaya ba ai lupia mairin Salaman maya ra prisantka wisi yan.

¹⁷ Bara Salaman bui Guézer ba kli paskan, bara Bet-horón maya ba wina,

¹⁸ upla iwras tasbaya tani ra, Baalat bara Tamar sin.

¹⁹ Baku sin tawan nani Salaman plun auhbi bri kan ba kli paskan, wagin nani swiaika pliska kan ba sin paskan, aras nani watla ba sin bara dîa sut Salaman Jerusalem ra paskaia lukan ba sut paskan Líbano ra, bara witin king aimaki tawanka nani sut sin paskan kata.

²⁰ Upla nani naha tawanka ra kau takaskan ba, amorreo nani, hitita nani, ferezeo nani, heveo nani bara Jebús uplika nani atia kata, baha nani Israel luhpia nani apia kan ba.

²¹ Kiamka nani witin nani ningkara baha tasbaya ra takaskan nani kan ba, Israel luhpia nani bui sip âpu pali daukras kan ba nani ba, bara Salaman bui yan wark karna nani takaia, bara baku munan ai lal mana ba aibapi kan, ban naiwa kat sin baku sa.

²² Ban sakuna, Salaman bui Israel luhpia nani kumi ra sin yan alba baku wark takras kan, sakuna baha nani ba war waitnika nani kan, alba nani ba lalka nani kan, wagin nani lalka, apia kaka war araska âiulra nani kata.

²³ Bara Salaman ba war lalka nani bara pura kakaira nani mangki bri kan ba lika 550 waitna nani kata, baha nani sika wark taki uplika nani purara mangkan kan ba.

²⁴ Bara king fero luhpia mairin ba Debit Tawanka wina wan, Salaman bui ai watla paski yan ba ra. Bamna Salaman bui tasba yakabi daukan pliska ba paskan.

²⁵ Bara Salaman mani bani aima yumhpa, Dawan altarka ra daiwan wîna aiska angki kan, kli wal uplika takaia dukiara, kîa yamni nani angki kan ba lika, Dawan mawanra bûi ba dukiara kan, tempel ba baku dauki tnata alkan ba kat.

²⁶ Bara king Salaman but tara nani sin paskan Esión-guéber ra, baha ba Elat lamara sa, Kabu Pauni un ra, Edom tasbaya ra.

²⁷ Bara baha butka tara ra Hiram bara Salaman wal aiklaklabrika nani blikan wan, baha nani sika sailar nani bara kabu tânka pain bri uplika nani kan.

²⁸ Bamna witin nani Ofir kat wan, bara baha wina gul nani 20 ton brin bara Salaman ra bri si yan.