1 King Nani 8 - DAWAN BÎLA AISKA

Lâ auhbaia watla ba tempel ra brih wan

¹ Bara Salaman bui Israel almukka nani asla daukan Jerusalem ra, kiamka bani lal nani ba, bara Israel luhpia nani watla uplika tâ bri nani ba sin, baha lika Dawan lâka auhbaia watla ba Saion wina Debit Tawanka ra lakaia dukiara.

² Bara king Salaman ba Israel waitnika nani sut aikuki asla takan kata, baha ba Etanim katka ra, baha lika kati 7 manka, naha piua ra sika Salaman Israel luhpia nani wal asla takan ba.

³ Israel almukka nani sut aidrubi balan bara prîs nani sin, bara lâ auhbaia watla ba brih wan,

⁴ bara Dawan wal aisaia tintka watla ba sin, tempel diara nani holikira kulkan nani ba sin, baha nani ba sika prîs nani Libait nani bui twilki kan.

⁵ King Salaman bara Israel luhpia nani sut, witin wal asla takan kan ba aikuki, lâ auhbaia watla ba mawan tani ra bûi banhwi kan, sîp bara bîp wainhka nani sakripais daukan. Uba ailal pali kan, sip kulki sakras kata.

⁶ Bara prîs nani Dawan lâka auhbaia watla ba tempel bilara plis holikira ba ra swin rayaka lilka tnawa mununhtara.

⁷ Baha nani ba bui ai tnawa mununhtara bri kan lâ auhbaia watla ba, ai dusa yari kan ba sin.

⁸ Bara dusa nani ba yari pali kan, ba mita holi pliska mawan ba wina kaiki kan. Ban sakuna lata tani wina lika sip kaikras kan, bara baha ba baku takaskan naiwa yua ba kat.

⁹ Lâ auhbaia watla ba bilara diara lika âpu kan, ban sakuna Horeb ilka ra Moses bui walpa tanhta ulban wâl mangkan ba baman bâra kan; bahara Israel luhpia nani wal Dawan lâ daukan ba, Idsip tasbaya wina takan ba piua ra.

¹⁰ Prîs nani ba holi pali watla ba wina takan ningkara, Dawan watla ba kasbrika ni aibanhwan kata.

¹¹ Prîs nani takaski ai pura sunaia sin sip apia kan, kasbrika nani ba mita, kan utla ba Dawan prana ni banhwan kan ba mita.

Salaman smalkanka ba

¹² Bara Salaman aisin: “Man, Dawan, aisaram tihmia tilara iwisma.

¹³ Sakuna yang tempel kum paski maikri, man bahara iwaia, plis kum man bahara ban kaia ra iwi kama.”

¹⁴ Ningkara king ai mawan tawi, Israel luhpia nani sut ra yamni munan, bara Israel luhpia nani ba bûi banhwi kan.

¹⁵ Bara win: “Dawan ba yamni pali kabia, witinka Israel Gâdka ba, papiki Debit ra aisin ba, witin bui aiska sut daukan bamna. Bara witin ra win:

¹⁶ ‘Idsip wina upliki Israel luhpia nani sakatna ba wina, tawan kumi sin bâk sakras kapri Israel kiamka tila wina, anira tempel kum bapka yang nini ba bahara kabia dukiara. Debit ba upliki Israel luhpia nani tâ briaia bâk sakri.’

¹⁷ Bara yang papiki Debit ai kupia ra luki kan, Dawan Israel Gâdka nina ra tempel kum paskaia.

¹⁸ Ban sakuna, Dawan bui aisiki Debit ra win: ‘Tempel kum yang nini ra mâkaia kupiam ra brisma ba, baha sât lukanka brisma ba yamni sa;

¹⁹ sakuna tempel ba man mita lika mâkma apia, ban sakuna man luhpa waitna kum sâkma ba, witin bui tempel ba paskbia yang nini ra.’

²⁰ “Bara Dawan witin dîa ai pramiska aisin ba daukan sa. Baku bamna, yang papiki Debit watlika ba briri sa, bara sin Israel kingka iwaika sin briri, bara Dawan Israel Gâdka ba nina ra tempel kumi mâkri sa.

²¹ Bara sin Dawan lâka auhbaia watla kum sin paskri, bahara sika Dawan wan damika nani wal lâ daukan ba, Idsip tasbaya wina sakan ba piua ra.”

²² Ningkara Salaman Dawan altarka mawan tani ra buan, Israel luhpia nani sut mawanra sin. Ai mihta nani kasbrika purara buki,

²³ bara win: “Dawan, Israel Gâdka, man baku Gâd wala âpu sa, kasbrika purara, baku sin naha tasba mâyara sin âpu, man alki brisma ba baku lâ daukan lâka, bara kupia yamni lâka sut albikam nani ra, baha nani ai kupia aiska kira man dukiam dauki nani ra.

²⁴ Aisiki Debit ra dîa daukaia win ba kat pali daukram sa, man pali aisi wiram bara mihtam pali ni dauki tnata alkram naiwa yua diara taki na.

²⁵ Bara nanara, Dawan, Israel Gâdka, papiki Debit ra dîa daukaia wiram ba, dauks: ‘Man kiamkam nani tila wina luha takbia apia yang maiwanra, Israel kingka iwaika ra iwaia ba, luhpiam nani yabalki ba alki bribia kaka, bara man tauki katma baku laimara tauki kabia kaka.’

²⁶ Baku bamna, Dawan, Israel Gâdka, albikam papiki Debit ra dîa man bîlam wiram ba kat daukma.

²⁷ “Ban sakuna, ¿baha ba kasak sa ki, Gâd ba naha tasba purara iwi kaia? Bara kaiks kasbrika pura ba bara yahpika ba sip alki briras sa, bara nahki sip kabia naha tempel yang bui paski maikri na.

²⁸ Baha sut purkara man albikam pura sunra ba walma, ai makabanka ba sin, alai, Dawan, yang Gâdki, naiwa albikam ai pura suni na man walma.

²⁹ Man lika naha tempelka na kakna bara tihmia aihwaki kaiki kama, naha tempelka ra man wiram bâra kaia, man wali kama albikam naha tempelka ra bal, ai pura suni piua ra.

³⁰ Baku bamna, albikam pura sunra ba walma, bara uplikam Israel luhpia nani sin, naha watla ra bal ai pura suni ba walma. Man iwaikam kasbrika purara pali ba wina wali kama, pâtka ba sin ban swih tikma.

³¹ “Ban kra upla kum ai uplika mapara saura daukbia, bara witin bal Dawan nina ra swer taki, man tempelkam ra bal naha altarkam lamamra bubia kaka,

³² man kasbrika pura ba wina wali lâ kasak ba daukma, bara albikam pâtkira ba pâtka yama, bara ai daukanka ba ai lal purara batakma, kasakkira ba kasakkira kulkma, ai kasakka lâka mana kat yama.

³³ “Man uplikam Israel luhpia nani ra waihla nani bui pura lubia piua ra, ningkara kli man ra tawi muni ninam ra ai saurka dahra sâkbia kaka, bara witin nani naha tempelka ra ai pura sunbia kaka,

³⁴ kasbrika pura ba wina witin nani ra wali kama, bara ai saurka nani ba ban swih tikma, bara kli yarka ai damika nani ra yaram tasbaya ra tawi balbia.

³⁵ “Witin nani mampara saura daukan ba tâka mita lî auhras kabia, bara witin nani naha watla ra bal man ninam ra makabi ai saurka sin dahra sâkbia kaka, ai saurka daukan ba wina kli tawbia, sari sin takbia kaka,

³⁶ kasbrika pura ba wina man wali kama, bara man albikam nani bara uplikam Israel luhpia nani saurka ba ban swih tikma. Yabal yamni ba mariki kama, bara witin nani bahak impaki tauki kabia, bara ai tasbaya purara lî yama, man bui witin nani ra yaram ba, ai almukka nani tasbaya ra.

³⁷ “Ban kra tasbaya ba ra plun tiwbia, siknis nani balbia, plun nani ra sikniska alkbia, tuhtu nani, tristrisia nani, plun sauhkaia yula nani iwbia, witin nani iwi tasbaya ra waihla nani bui bal kutbi bribia kaka bara pât wala siknis sât wala nani balbia kaka,

³⁸ pura sunra nani, makabanka nani kra ani uplika bal daukbia, apia kaka man uplikam Israel luhpia nani tilara ban kra ya ai kupia ra pâtka ba ai dahra walbia kaka, naha tempel ra bal ai mihta buki ai pura sunbia sa kaka,

³⁹ kasbrika purara iwisma pali ba wina wali kama, bara pâtka ba ban swih tikma. Ningkara man mahka dîa daukaia lukma ba daukma, kumi bani ra ai daukanka ba kat mana yama, man baha nani kupia ba kaikisma bamna. Man baman sika upla nani sut kupia tânka kaikisma ba.

⁴⁰ Baku man sibrinkam wal iwi kabia, ai damika nani ra tasba yaram ba ra iwi piua ra.

⁴¹ “Baku sin tringsar nani man uplikam, Israel wina apia ba, man ninam dukiara tasba laihura ba wina balbia.

⁴² Bara ninam tara ba walbia, mihtam bara klamhkla aiska karnika ba kaikbia, bara naha tempelka ra bal ai pura sunbia.

⁴³ Man kasbrika purara ba wina walma, iwaikam ba wina. Bara tringsar nani dîa mangkbia ba kat dauki yama, baku ba ra tasba aiska ra iwi uplika nani ninam ba kakaira takbia, bara sibrinkam sin bribia, tawankam Israel luhpia nani baku baha tânka bribia. Bara tânka bribia, man ninam naha tempelka watla ra yang bui maikri ba ra mayuni ba.

⁴⁴ “Uplikam nani ai waihla nani mapara aiklabaia taki wabia ani anira man blîkma ba, witin nani man ra ai pura sunbia, man tawan bâk sakram ba ra kaiki, bara tempel watla yang mita paskri ba ra sin;

⁴⁵ man bui witin ai pura sunra ba kasbrika pura ba wina walma, ai makabanka ba, bara baha pâtka man mita wapni dauki yama.

⁴⁶ “Ban kra mampara saurka daukbia kaka, upla kumi sin âpu sa saura daukras ba, bara man bui witin nani ra kupiam sauhki, ai waihla nani mihta ra mangkma kaka, witin nani ba alki priski brih wabia, waihla tasbaya ra, laihura kra, apia lamara kra,

⁴⁷ bara witin nani priski brih wan tasbaya ba kat ai kupia lakbia kaka, ai pura man ra sunbia priski brih wan ba tasbaya wina, witin nani ai saurka daukan ba tânka bribia bara saura daukan ba sin,

⁴⁸ bara witin nani ai kupia aiska, ai sulka aiska lakbia kaka, ai waihla nani tasbaya ra priski brih wan ba wina, ai damika tasbaya nani yaram ba tani ra tawi, naha tawanka man mita bâk sakram na, bara naha watla man ninam ra paskri na tani ra tawi ai pura sunbia kaka,

⁴⁹ kasbrika purara man iwaikam ba wina walma, bamna ai pura sunra bara ai makabanka ba kasakka lâka ra daukma.

⁵⁰ Bara man uplikam nani mampara saura daukan pâtka ba swih tiks, mampara bûi kupiam sauhkanka daukan ba sut ban swih tikma, bara priski brih wan nani ba bui yarka umpira kaikbia.

⁵¹ Kan witin nani ba sika man uplikam nani bara man pali dukiam ba. Baha nani sika Idsip wina sakram ba, kubus kum ami slilwan baku kan ba wina.

⁵² “Baku bamna, man aman pali wali bas albikam pura sunra na, bara uplikam Israel luhpia nani makabanka ba sin yawan ra wan wals, ay, Dawan, man ra makabisna piua ra.

⁵³ Kan man, Dawan, bâk sakram man dukiam baku nisan wala nani tila wina; man wisatma ba albikam Moses bâk, damiki nani Idsip wina sakatma piua ra.”

⁵⁴ Salaman Dawan ra ai pura suni makabanka ba sut tnata alkan ba ningkara, witin ai lula krikan kan ba wina buan, Dawan altarka mawan tani ra bara ai mihta kasbrika purara tani ra bukan,

⁵⁵ bara witin ban ai mina ra bûi, Israel luhpia nani sut ra yamni win, ai bîla baikra karna wini:

⁵⁶ “¡Dawan ba yamni pali kabia, ai uplika Israel luhpia nani ra kupia kumi lâka yan ba, dîa witin pramis win ba kat! Dîa dîa witin ai albika Moses ra aisin ba kumi sin swiras, sut kat yan aimakan.

⁵⁷ “Dawan wan Gâd ba, yawan aikuki kabia wan damika nani wal kata ba baku, bara wan lulki sin swibia apia,

⁵⁸ witin ra wan kupia ba yaka tniwaia, baku mika yawan lika witin ai kupia lâka nani ba daukbia, ai lâka bîla nani mangkan ba bara ai lâka nani ba alki bri kabia, wan damika nani ra yan lâka nani ba.

⁵⁹ Bara puri sunra bîla nani sut ba lika, Gâd, lamamra kabia, kakna ra, tihmia ra sin; baku mika witin ai albika bara ai uplika Israel luhpia nani ba kaina kahbi kabia, diara bani ba piua kat.

⁶⁰ Baku ba ra nisan nani tasba ra iwi ba kaikbia Dawan ba Gâd sa, bara wala lika âpu sa.

⁶¹ Baku bamna kupiam ba kasak bris, Dawan wan Gâdka wal, bara dîa lâ mangkan ba alki brih dauks, bara bîla sin wawalra bas naiwa yua na baku.”

⁶² Naha ningkara king ba bara Israel uplika sut Dawan ra sakripais dauki yaban.

⁶³ Baku ba ra king Salaman, kumi wal kli uplika takaia sakripais Dawan ra daukaia dukiara, bîp bul nani 22,000 bara sîp nani 120,000 yan kata. Naku sika king bara Israel luhpia nani sut wal aikuki, utla ba Dawan mihta ra mangkan.

⁶⁴ Baha pali piua ra, king bui kutbanka painkira tempel lilapas kan ba, baha ba Dawan watla ba mawan tani ra kata ba Dawan mihta ra mangkan. Bahara aiska angkan sakripaiska nani daukan, plun mâ nani prisantka, daiwan batanka ba, kli wal uplika takaia natka nani ba sin. Kan bras altarka Dawan kaiki ba sirpi kan, bahara sip aiska angkaia sakripaiska ba, plun mâ nani prisantka ba, daiwan batanira angki daukaia, kli wal uplika takaia sakripais nani ba alkras kan.

⁶⁵ Baha piua ra, Salaman bara Israel luhpia nani upla ailal nani dihwan ba balan kan, Hamat ra dimaika ba wina Idsip tingnika ba kat, Dawan Gâd mawanra bal, Utla Papakni liliaka ba daukan. Baha ningkara kli yu 7 liliaka wala daukan, asla lika yu 14 lilia dauki kata.

⁶⁶ Bara yapra wala ba, upla nani lakula wisi mahka wan, bara upla nani bui king ra yamnika yaban bara mahka ai watla nani ra liliakira wan, diara sut yamnika Dawan wina Debit bara Israel tawanka ra daukan ba dukiara, ai kupia pah impaki wan kata.