1 King Nani 7 - DAWAN BÎLA AISKA

Salaman utla wala nani mâkan ba

¹ Baha ningkara Salaman king watla ba mâkan, 13 mani kat tnata alkan.

² Baku sin Líbano ilka ra king watla wala mâkan, baha nina ba “Líbano Untika” mâkan. Watla yarika ba 150 pît bri kan, yahpika ba 75 pît, pura tani ra ba 45 pît pura bri kan, bara playa walhwal lain bani ra kan ba bui tâ baiki bri kan; playa sut ba bîn tara nani ba mita alki tâ baiki kan, dusa nani ba yalam baman kan.

³ Lal kahbaika aiska ba yalam tatka ni pura lalauban kata, playa tara nani 45 ba sut ra karnika yabi kata, lain bani ba playa tara 15 bri kan.

⁴ Utla tnaya kumi bani ra windar yumhpa bâra kan.

⁵ Durka nani bara windarka nani ba sin wapni pali bapan kata, windar ba lama kat mangkan, wal ai mawan kat kan, lain yumhpa ra.

⁶ Baku sin utla bilara iwaia pliska kum kan ba, yarika ba 75 pît kan, yahpika ba lika 45 pît bri kan, bara baha mawanra iwaia pliska wala playka tara ba bui alki bri kan.

⁷ Ba purkara lâ daukaia king iwaika rumka kum paskan, nina ba Lâ daukaia Pliska, bahara Salaman upla lâka nani dauki kan, bara mâya tani wina pura kat ba lika yalam ni lalauban.

⁸ Salaman king watla ra iwi kan ba latka nina tani ra, yar kum paskan. King watla mâkan ba Salaman king fero lupia mairin ai maya brin ba, takaskaia watla paskan.

⁹ Baha watla nani sut mâkan ba, playka bapan ba wina dur dimaika ba kat, bara latka tara pîska ba walpa manakira ni kusbi, bara klaki dakbi mangkan latara bara bîla tani ra sin.

¹⁰ Watla playa ba walpa tara manakira kan, walpaya nani kum kum ba 12 pît yarika kan, wala nani ba 15 pît kata.

¹¹ Ba wina pura tani ba sin walpa manakira nani kan, bara yalam dusa ni kutbanka ba kat lalaubi prakan.

¹² Bara kutbanka tara ba mawan tani ra, walpa kusban nani ai lama kat yumhpa mangkan kata. Bara sin yalam dusa bînka lain kum kan, baku sin Dawan watla bîla tani bara utla kutbanka ba sin.

Salaman ba Hiram wal lâ daukisa

¹³ Bara king Salaman bui blikan Tiro wina Hiram ba bri balan,

¹⁴ witin ba Neftalí kiamka wina piarka mairin kumi luhpia waitna, papika ba bras warkka dauki kan. Witin ba Tiro wina kan, bamna Hiram lika bras warkka daukaia sinska lâka tânka ni banhwan kata. Witin Salaman ra balan, bara dîa warkka bri kan ba sut dauki yan.

¹⁵ Bara bras playka wâl ba slilki dauki yan, kumi bani yarika ba 27 pît bri kan, baha ba kumi wina wala ba kat kiwa ni wilkan kan; kiwka yarika ba bri kan 18 pît.

¹⁶ Bras playka tara wâl sin daukan, baha playka tara nani ba lal kahbaika nani bri kan; playka tâ kumi ba yarika 7 pît hap bri kan, playka tara wala ba sin wala ba wal baku kata, 7 pît hap kan.

¹⁷ Baha purkara ayan ni pitbanka wâl pitban, sîn kum baku, baha playa tara nani wâl ba purara sakahkaia. Bara playka tara nani un raitka kumi bani ra baha pitbanka kum mangkan, playka nani ba purara.

¹⁸ Diara krukma sâtka nani sin wâl paskan pitbanka bani kainara bara lain ra paman, bîn playka bani lal purara mangkaia dukiara. Bînka playka wala nani ba wâl sim baku daukan.

¹⁹ Dur dimaika lamara playa tara nani paskan kan ba lika, klutang tangnika baku kata, kulki kaikan 6 pît yarika bri kan.

²⁰ Playa tara wâl ba pura tani ra diara krukma nani 200 bri kan lama kat. Bîn playka tara lal aiska ba Ilis mamanka sâtka ba ni aiska pura praki bri kan.

²¹ Hiram naha playka tara nani ba tempel dimaika ra bapan, ai pliska kat kumi bani ba bapan; bara aihkika tani ra ba nina Jaquín mâkan, bara playa wala smihka tani ra bapan ba nina Bóaz mâkan.

²² Bara playa tara nani bapan ba lal pura nani ba klutang tangni baku sâtka mangkan kata, bara baku playa bapanka warkka nani ba dauki tnata alkan.

Tempel bilara iwaika nani

^23-26 Baha ningkara, Hiram lî alkaia watla tara krukma kum bras ni daukan, paknika ba 7 pît hap, yarika 15 pît, yahpika kir ba lika 45 pît bri kan. Bara taya pura aiska ba tangni lilka wâl bara dus mâ nani lilka ni sakahkan. Bara playa nani ba naku paskan: bîp bul 12 bras ni daukan, baha purara kahban bûi kan, yumhpa ba yahbra tani ra kaiki kata, yumhpa wala ba waupasa tani ra kaiki kan, yumhpika wala nani ba muna tani ra kaiki kan, lâs yumhpika ba lalma tani ra kaiki kan. Laya watla ba twaknika 3 ins bri kata. Bara un pura ba tumtum tangnika baku ni kir sakahkan kata; bara laya watla ba lî 10,000 gialan alki kan.

²⁷ Baku sin mununhtara plamaya ba bras matawalsip ni daukan kan, kumi bani yarika ba 6 pît bri kan, yahpika ba sin 6 pît kan, pura yarika ba 4 pît hap bri kan.

²⁸ Plaika nani ba naku natka ra mangkan kan, diara nani pamaika sin daukan.

²⁹ Bara baha pîska nani lilka mangkaika tilara kan ba, purara bri kata layan lilka nani, bîp lilka nani bara rayaka wâl bri nani ba sin. Witinka nani pura bara mununhta tani ba, kau pura prakanka nani sin bâra kan, kasak yamni skahkan kan tangni nani wal.

³⁰ Plaika walhwal bani ba mina wilwaika walhwal bras ni daukan bri kan; lilapas ba sin bras ni daukan kata, un tnaya walhwal bani ra kiwa pitban nani bâra kan, baha ba skahkan tangni nani ba ni, lî iswaika munhta tani bâk.

³¹ Bara lî iswaika ba 18 ins bri kata, pura wina mununhta kat waia ba lika 7 ins bri kan.

³² Mina walhwal ba lika 25 ins bri kan mununhta tani ra, bara wilwaika lilapas ra ba alki kata, laih mununhta pali kat.

³³ Bara wilwaika paskanka ba lika, wagin mina wilwaika nani ba wal baku kata. Lilapaska mihta ba, ingni prukaika ba, untika ba, bara maisa wila ba sut lika bras ni daukan kan.

³⁴ Baku bamna, playka walhwal ba bui alki bri kan playka wala nani ba ra.

³⁵ Bara playa karnika purara pîs kum bâra kan ba, 9 ins yahpika bri kata. Bara playa karnika ba purara lilka mangkaika bâra kan, bamna sut ba kumi ra baman prakan.

³⁶ Hiram lilka mangkaika tatka nani daukan kan, bara tatka pîska nani ra lilka sâtka nani karbi mangkan, rayaka bri lilkika nani, layan lilka, kûku dusa nani, kumi bani wal asla ai watlika kat ban kata, tnaya kir ba sin sakahkan kan.

³⁷ Naha natka kat playa karnika ba matawalsip daukan kata wal baku, bara paskanka ba wal kumi kata. Kulki bapanka ba lilka kusbi mangkanka ba wal sin kumi kata.

³⁸ Bara lî plapaika matawalsip bras ni daukan kata, kumi bani ba 6 pît bri kan. Kulki kaikan 200 gialan bri kata, kumi bani ba karnika matawalsip ba purara.

³⁹ Bara playa karnika matsip mangkan tempel aihkika tani ra, bara matsip wala ba mihta smihka ra mangkan. Bara laya watla ba utla aihkika tani ra mangkan, lalma tani ra, bara waupasa tani ra sin.

⁴⁰ Baha purkara Hiram dikwa nani, subil nani, kâp tara nani paskan, Dawan tempelka ra wark nani daukaia Salaman witin ra win ba, baha sut witin daukan.

⁴¹ Naha dukia nani sika witin paskan ba: tempel playka tara wâl, playka ba sakahkaia kiwka wâl, dur purara mangkaia prana wâl,

⁴² bara dus mâ baku wâl dukia nani 400 paskan, playka kum ra 200 prakaia, playka wala ra 200.

⁴³ Plaika nani ba karnika matawalsip paskan, baha purara lî plapaika matawalsip paskan.

⁴⁴ Tank ba, bîp wainhka 12 bui buki bri kan.

⁴⁵ Baha purkara dikwa tara nani, subil bara kâp tara nani sin paskan. Bara dîa dîa wark daukaia dukia nani Hiram bui Salaman ra dauki yan ba Dawan tempelka watla dukiara, baha nani ba bras dukia lalalni ni daukan kata.

⁴⁶ King warkka sut daukan ba Jordan tasbaya ra sika, tasba slaubla ailal bri ba, Sucot wih Saretán wal lilara.

⁴⁷ Bara Salaman uya lukras kata, diara nani bras ni daukan ba paun munaia, ailal pali kan ba mita.

⁴⁸ Bamna Salaman Dawan watla aiska paskan wina, diara nani kau bâra kan ba ni daukan gul altarka kum, Dawan yamni munan britka kahbaika tibilka kum sin gul ni daukan.

⁴⁹ Kiandil bapi swiaika pliska ba sin gul klauhira ni daukan, ningkara Holikira pliska ba ra swin, matsip ba aihkika ra bara matsip wala ba smihka ra. Tangni lilka ni daukan kata diara sami alkaika ba, gul aihwa ni daukan kan.

⁵⁰ Baku sin kâp nani, diara klakaia dukia sirpi nani, diaia tara nani, ispan tara, kîa yamni angkaia dukia nani, sut ba gul ni paskan. Baku walpa klauhira nani wal, utla bilara dimaia dur pîska nani ba sin, walpa klauhira ni daukan kata. Holi pali pliska ba bara tempel bilara diara nani ba sut sin gul ni paskan.

⁵¹ Bara king Salaman bui Dawan tempelka ra wark daukaia dukia nani ba sut daukan ningkara, ai papika Debit tempel dukia nani bri kan ba, gul bara silbar nani, baha nani sut Dawan tempelka ra bri si swin, tempel dukia kukanka wal praki auhbi swin.