1 King Nani 6 - DAWAN BÎLA AISKA

Salaman tempel ba mâkisa

¹ Israel luhpia nani Idsip wina takan ba ningkara, mani 480 alkan ra, Israel luhpia nani purara Salaman mani walhwal king aimaki kan piua ra, Ziv kati ra baha ba mani kum bilara katka wâl ba, witin nani Gâd watla ba paskaia tâ krikan.

² Salaman Gâd tempel mâkan kan ba lika yarika ba 90 pît, bîla yahpika ba 30 pît bri kan bara pura tani ra bapan ba 4 pît kata.

³ Tempel watla dimaia mawan tani ra asla takaia pîska ba yarika 60 pît bri kan, utla yahpika ba wal baku. Yahpika ba utla mawan tani ra 30 pît kata.

⁴ Bara Salaman tempel mâkan ba windarka ba ayan ni daukan kan.

⁵ Baku sin utla sirpi kum paski kau draban tempel watla bri ba lamara, kutbanka nani tempel kir bri kan ba ra, rumka tara ba lama kir, rum nani kainara ba ra sin, baku sin rum sirpi nani ailal paskan.

⁶ Munhta tani rumka draban yahpika ba 15 pît bri kata, lilapas tani rumka yahpika ba 18 pît bara yumhpika ba ai yahpi kan ba 21 pît lata tani ba mâyara iki daukan kata, utla ba mawan tani ra, baku mika bînka kahbaika dusa tara ba tempel tnaya ra mangkan ba param kabia apia ba tâwan.

⁷ Tempel watla ba mâkan piua ra walpa nani pat ridi daukan ba brih balan, bamna tempel mâki kan piua ra amar binka, apia asa kra binka sapa sin walras kata, ayan sâtka nani sin binka walras kan.

⁸ Rum sirpi nani lilapas tani dimaika durka mununhta tani ba lika, tempel ba aihkika tani ra kata, bara rum lilapas ba ra luaia ba uli lui kan; bara baku sin lilapas rumka ba wina rum yumhpika ra uli waia ba, mina mangkaika ba krutni kan.

⁹ Baku bamna tempel ba paski tnata alkan, bara yalam dusa ni kusbi daukan ba ni lalaubi pura prakan.

¹⁰ Bara utla kau draban kata ba sin kir paskan, pura yahpika yarika ba 15 pît kata, baha wal utla ba tâ baiki kan yalam bri nani ba wal.

¹¹ Salaman ra Gâd bîla balan bara naku win:

¹² “Naha watla na man bui paskisma bamna, yang lâika nani bâk impaki kupi lâka ba kat daukma kaka, bara sin lâika nani ba sut alki brih baha kat wapma kaka, yang dîa papikam Debit ra wîri ba man ra daukamna.

¹³ Bara yang watla na bilara kamna Israel luhpia nani lilapas ra, bara upliki Israel luhpia nani ba lulki swimna apia.”

¹⁴ Baku bamna, Salaman utla ba paski tnata alkan.

¹⁵ Bara utla bîla tnaya nani ba yalam tatka ni kutban, mâya ba wina ban pura lal kahbaika ba kat. Awas dusa ni utla bîla ba lalaubi palkan,

¹⁶ baku sin pura wina mâya kat utla ba bilara lika yalam dusa ni lalauban kata. Baha yarika ba lika 30 pît bri kan. Baha tempel bilara plis kum bâra kan holi pali pliska.

¹⁷ Tempel mawan kat holi pali pliska ba 40 pît bri kan,

¹⁸ bara tempel bîla tani ba yalam dusa ni sakahkan kata, dusa ba kusbi daukan kan, bara sin tangni, dus mâ nani, baku kir kusbi daukan kan, baha sut ba yalam ni. Bahara walpa âpu, sut yalam ni prakan.

¹⁹ Bara Salaman holi pliska ba pain ridi daukan, bahara Gâd lâka auhbaia watla ba swiaia kan bamna.

²⁰ Bamna holi pliska ba lika bîla tani ra kata, baha yarika bri kan 30 pît, bîla yahpika ba sin 30 pît bri kata, bara pura yahpika ba sin 30 pît bri kan. Baha aiska gul ni lalauban kata. Baku sin altar yalam ni daukan kan ba sin gul ni lalaubi prakan.

²¹ Bamna Salaman tempel bîla ba gul aihwa ni lalaubi prakan, bara holi pliska pali ba sin gul ni lalaubi prakan, dur dimaika ba gul sialaka awa dauki paman.

²² Baku bamna gul ni lalaubi prakan tempel aiska ba, baku sin holi pliska mawanra altar ba sin gul ni lalaubi prakan.

²³ Baku sin rayaka bri ba lilka wâl oliv dusa ni daukan, holi pliska pali bâra swiaia, bara kumi bani yarika ba lika 15 pît bri kan.

²⁴ Bara tnawa kumi bani ba 7 pît hap bri kan, bara tnawa wala ba sin 7 pît hap bri kata. Baku bamna tnawa ba tâ kumi wina tâ wala ba kat 7 pît hap bri kan.

²⁵ Bara rayaka bri nani wâl ba sin 15 pît kan, wâlsut ba sim yahpika bri kata. Bara paskanka ba sin wal baku kata.

²⁶ Yarika pura tani ba 15 pît bri kan, wala ba sim wal baku kata.

²⁷ Bara Salaman bui holikira Pliska ba kat swin. Bara rayaka bri nani ba, ai tnawa nani ba ilingki bri kan, bara tnawa kumi ba utla tnaya kumi ra kangbi kata, bara tnawa wala ba lika utla un tnaya wala ra kangbi kata; bara tnawa wala wâl ba, pana pana kangbi kan Plis holikira lilapas ba kat.

²⁸ Bara diara rayaka bri lilka ba sin gul lalaubi prakan,

²⁹ bara tempel bîla, lata tani, tnaya ba aiska, dus ni kusbi daukan, lilka sât sât tâ kum wina wala kat rayaka bri lilka nani bûi kata ba kat, bara kûku dusa sâtka tangni lilka nani sin daukan.

³⁰ Tempel bîla aiska ba gul ni lalauban lata tani ra sin.

³¹ Holi pali pliska ra dimaia durka ba oliv dusa ni daukan kata, dur apiska nani bara playa bapan nani ba lilka nani tnaya baikanka matsip bri kata.

³² Dur wâlsut ba lika oliv dusa ni daukan kata, dur bani ra lilka nani mangkan kan, rayaka bri ba lilka, kûku dusa lilka, tangni nani ni daukan, gul lalauban.

³³ Tempel ra dimaika lilapas ra playka ba oliv dusa ni lilka daukan.

³⁴ Sakuna dur wâlsut lika awas dusa ni daukan kata, dur kumi ba pîs wâl ra baiki mangki pami swin, bara wâlsut ba wilwi tawi kan.

³⁵ Bara kusbi daukan rayaka brih nani ba lilka, kûku dusa lilka tangni wal kraun daukan sâtka lilka nani mangkan, bara gul ni lalaubi prakan.

³⁶ Bara utla kutbanka painkira bîla tani ra walpa wina kusbi daukan nani ba lain yumhpa lama kat, lama kat mangkan; lain kumi bani bînka ba yalam dusa ni kusbi daukan.

³⁷ Salaman mani walhwal king aimaki kan ba piua ra, Ziv katka ra witin Dawan watla playa ba bapan.

³⁸ Bara witin mani 11 king aimaki kan, bara baha Bul katka kan, mani bilara 8 kati ba, baha manka kat tempel ba aiska pali paskan. Baha warkka aiska daukaia ulban kan ba paski danh daukan 7 mani bilara. Dîa dukia nani sut tempel kum nit ba, bahara paskan kata.