1 King Nani 5 - DAWAN BÎLA AISKA

Salaman lâ daukan Hiram Tiro kingka ba wal

¹ Tiro kingka Hiram bui sin ai albika nani Salaman ra blikan. Witin walan Salaman ba Dawan lâka ra yamni munan bara ai papika Debit watlika ra king aimakata, kan Hiram bui piua bani Debit ra latwan kaiki kan.

² Bamna Salaman bui Hiram ra bliki maisa pakan:

³ “Man kaikisma yang papiki Debit mita Dawan ai Gâdka ra sip tempel kum mâki yaras kan, war nani ai tnaya kir aiklabi kan bamna, Dawan bui ai waihla nani yan ai mina mununhtara taiban ba piua kat.

⁴ Sakuna nanara Dawan Gâdki mita tawan nani sut wal kupia kumi lâka aikan sa, waihli nani ba âpu sa, diara saura kumi âpu sa sibrinka lukaia.

⁵ Baku bamna brinki sa nanara, Dawan Gâdki nina ra tempel kumi mâkaia, Dawan Gâd bui papiki ra aisi win ba baku: ‘‘Man luhpiam ba yang mita yarka man king iwaikam ra iwbia ba, baha bui yang nini ra tempel kumi mâki aikbia.’’

⁶ Bamna nanara, Líbano ra blîks yalam dusa nani klakaia, bara albiki nani ba man albikam nani ra hilp muni kabia, bara albikam nani mana dîa ai wima ba yang aibapamna. Man bui kasak kaikisma, yang nani tilira dus klakaia tânka bri ba âpu sa, Sidón uplika nani baku.”

⁷ Bamna Hiram Salaman aisin ba walan, bara uya pali lilia taki naku win: “¡Naiwa Dawan ba yamni pali kulkan kabia, kan witin Debit ra luhpa waitna sinskira kum yan, naha nisanka ban ailal na purara king aimakaia!”

⁸ Bamna Hiram bui Salaman ra ai bîla bliki maisa paki win: “Dîa bîlam bliki maisi pakram ba sut walri; bamna yalam dusa bara awas dusa nani brin mai dauki ba kat, yang dauki maikamna.

⁹ Albiki nani ba Líbano wina kabu kat saki wabia, baha wina rap baku dauki man nani kat brih wabia brin mai dauki ba kat bri si lanhki maikbia, bara man brima. Bamna nanara, man mita yang brinki ba daukma, baha lika plun aikma king watla dukiara.”

¹⁰ Baku bamna, Hiram bui Salaman dîa brin dauki kan ba kat yan: yalam dusa, bara awas dusa nani.

¹¹ Salaman bui Hiram ra yabi kan ai uplika nani dakakaia, plawar mâ baril 4,400,000 yan, bara batana laya oliv wina daukan 4,400, naku yabi kan Salaman bui Hiram ra mani bani.

¹² Dawan aisin baku, witin Salaman ra sins lâka yan. Bara Hiram Salaman wal ba kupia kumi lâka bri kan, witin nani wal lâ daukan kata ba baku.

¹³ Bamna Salaman Israel aiska ra lâ kum mangki asla daukan, bara baha asla daukanka ra upla 30,000 nani waia ridi takan kata,

¹⁴ baha nani ba Líbano ra bliki kan kati bani, ai piua kat 10,000 waitna nani, kati kum kaia dukiara, kati wâl ba lika ai watla ra kan. Bara Adoniram lika baha daknika nani lalka kata.

¹⁵ Bara Salaman bri kan diara twatwilkra nani ba 60,000, il ra dus nani klaklakra ba 80,000;

¹⁶ baha tnaya ra Salaman wark lalka nani 3,300 bri kan. Naha nani bui wark taki nani ba pura kaiki kan.

¹⁷ Bara king bui win: “Walpa tara nani bara manakira sâtka nani ba bri balbia, baha ba tempel watla playa kabia, baku sin walpa nani klaki pain daukan ba sin brih balbia.”

¹⁸ Utla mâmakra nani ba Salaman bara Hiram uplika nani kan, bara Guebal uplika nani sin witin nani mahka dus nani bara walpa nani sin ridi daukan, tempel ba daukaia dukiara.