1 King Nani 4 - DAWAN BÎLA AISKA

Salaman gabamintka

¹ Bamna Salaman lika Israel aiska kingka aimakan.

² Bara naha nani sika kau wihta tara nani kan ba: Azarías, prîs Sadoc luhpia;

³ Elihóref bara Ahías, Sisá luhpia nani, sturi âiulbra nani ba; Josafat, Ahilud luhpia, king wauhkataya âiulbra;

⁴ Benaías, Joiadá luhpia, suldiar nani wihtka tara; Sadoc bara Abiatar, prîs nani;

⁵ Azarías, Natán luhpia, pura kakaira tara; Zabud, prîs Natán luhpia, king wal lâ tânka aisi uplika;

⁶ Ahisar, king watla aiska ra diara bâra ba pura kakaira; bara Adoniram, Abdá luhpia, witin lika blestu yaka wark daukaia ba pura kakaira.

⁷ Salaman lika wihta nani lalka 12 nani bri kan Israel aiska purara. Baha nani bui king ra main kaiki kan bara watla aiska ba sin. Kumi bani lâ bri kan mani kumi bani, kati kum ba king watla ra diara bri si auhbi kaia.

⁸ Naha sika baha wihta nani lalka 12 kan ba: Ben-hur, Efraín ilka nani ra;

⁹ Ben-déquer, Macás ra, Saalbim ra, Bet-semes ra, Elón ra bara Bet-hanán ra;

¹⁰ Ben-hésed, Arubot ra, baku sin Socó ra bara Héfer tasbaya aiska ba;

¹¹ Ben-abinadab, Dor tasbaya aiska ba; witin bui Salaman luhpia mairin Tafat ba ai maya bri kata;

¹² Ahilud luhpia Baaná ba, Taanac ra, Meguido bara Bet-seán aiska, baha ba Saretán lamara sa, Jezreel mâyara, Bet-seán wina ban Abel-meholá kat, bara sin Jocmeam bailka wala ba kat;

¹³ Ben-guéber, Ramot Galaad ra, witin sin Manasés luhpia Jaír tawanka nani ai mihta ra bri kan, baha ba Galaad ra sa, baku sin Argob tasbaya ba sin, baha ba Basán ra sa, tawan tara nani asla sut 60 bâra sa, baha nani ba kutban kan, prakaika ba bras bara ayan ni daukan kata;

¹⁴ Idó luhpia Ahinadab ba lika Mahanaim ra;

¹⁵ Ahimaas lika Neftalí ra; witin sin Salaman luhpia mairin Basemat wal bri kan;

¹⁶ Husai luhpia Baaná ba lika Aser ra bara Alot ra;

¹⁷ Parúah luhpia Josafat ba lika Isacar ra;

¹⁸ Simí, Elá luhpia ba, Benjamín ra;

¹⁹ Urí luhpia Guéber ba lika Gad tasbaya ra, baha ba Sihón amorreo nani kingka tasbaya ra, bara Og, Basán kingka tasbaya ra. Baha sut purara baha tasbaya wihtka tara kum bâra kan.

Salaman sinska lâka bara pâwanka sin

²⁰ Juda bara Israel wal ba ailal pali kata, sip kulki sakras, sim kabu un ra auhya mâ ba baku, plun sin ailal bri kan. Witin nani pih bara dih ai lilia bri banhwi kata.

²¹ Bara Salaman lika baha king tasbaya aiska kingka aimaki kata, Éufrates awala ba wina filisteo tasbaya kat bara ban Idsip tasbaya lainka kat. Ai lal mana sin aibapi kata, dukia sin dauki kan Salaman raya kan yua nani sut ra.

²² Bara yu bani Salaman pata ba lika 6,600 litro plawar tangnika, bara plawar lika 13,200 litro,

²³ bîp kau batana ba matawalsip, 20 bîp wainhka twi dakaki pakan ba, sîp nani lika 100 kumi, sula wainhka nani, snapuka sâtka daiwra bara tnawira nani lika kulkras kan.

²⁴ Bara witin lika Éufrates tasbaya muna tani aiska tâ aimaki kan, Tífsah wina ban Gaza kat, bara naha tasbaya kingka nani sut purara, bara ai tnaya aiska kir kupia kumi bri kan.

²⁵ Bara Salaman raya iwan piua ra, Juda bara Israel wal trabil âpu iwi kata, Dan wina Beerseba kat, ai wainka kiwka muhungka kat bara ai kwah damni dusa mununhta kat iwi kan.

²⁶ Baha sut purkara Salaman aras dingki briaia pliska 4,000 bri kan ai war trukka araska nani dukiara, bara aras âiulra suldiarka sin 12,000 bri kan.

²⁷ Bara naha wihtka tara nani bui Salaman diara sut yabi kan. Baha nani sut Salaman tibilka ra iwaia aidrubi kan, kati bani aima kum, bara swin diara luha takras kata.

²⁸ Baku sin yan brih balan kan, barli mâ bara twi lâwan nani aras nani wark daiwra nani pata. Bamna upla bani ai warkka ba kat dauki kan.

²⁹ Bamna Gâd bui Salaman ra sins lâka bara diara tânka kaikaia lâka tara pali ba yan kata, sim auhya nani kabu un ra ba baku.

³⁰ Bara Salaman sinska lâka ba kau tara pali kata lalma uplika sut ba wal, Idsip uplika nani aiska sinska lâka ba wal sin.

³¹ Baha purkara waitna nani sut wal kau sinskira kan: Etán, Zérah kiamka ba wal kau sinskira, bara Hemán ba wal, Calcol bara Dardá Mahol luhpia nani ba wal sin kau sinskira. Bara ai nina tara tânka ba nisan nani ai tnaya kir sut ra wan.

³² Salaman sins lâka aisinka 3,000 paskan, bara lawana nani sin 1,005 ulban.

³³ Bamna Salaman dus nani pâwan ba tânka sin bri kan, bara inta wahia tânka sin, Líbano ra yalamka ba bara dusa wahia utla tnaya ra lalami pâwi ba sut. Baku sin witin daiwan nani tânka bri kan: tnawira nani, daiwan kwasi tauki ba, inska nani tânka.

³⁴ Bara Salaman sinska walaia dukiara, nisan nani sut wina upla nani aidrubi kan, king nani sin sut balan ai sinska lâka ba walaia.