1 King Nani 22 - DAWAN BÎLA AISKA

Micaías maisa pakisa Ahab ra waihla nani mita pura lubia ba

¹ Mani yumhpa ban luan, Siria bara Israel wal tilara war âpu kan.

² Bara mani yumhpa piua ra, Juda kingka Josafat ba Israel ra wih kaikan.

³ Bara Israel kingka ba mita ai wark uplika tara nani ra win: —Man nani kasak tânka brisma, Ramot Galaad tasbaya ba yawan wan dukia sa. ¿Dîa muni yawan mita diara daukras, Siria kingka mihta wina baha ba dakbi briaia?

⁴ Bara Josafat ra makabi walan: —¿Brinkam sa ki, yang wal waia Ramot Galaad tasbaya mapara aiklabaia? Bara Josafat bui Israel kingka ra pana win: —Yang lika man wal sni, bara upliki nani, araski nani sin man wal sa, bara uplikam nani wal sin.

⁵ Sakuna kau waras ba ra, Dawan ra makabi wals ai kupia lâka sapa.

⁶ Bara Israel kingka mita prapit nani 400 asla dauki, baha nani ra makabi walan: —¿Ramot Galaad tasbaya ba mapara war aiklabaia wamna, apia kaka wamna apia ki? Bara prapit nani ba win: —Aiklas, Dawan bui king lâka man mihtam ra mangkaia sa bamna.

⁷ Bara Josafat mita win: —¿Naha tani ra Dawan prapitka wala kum âpu sa ki, yawan bui witin nani ra sin makabi walaia?

⁸ Bara Israel kingka ba mita pana Josafat ra win: —Waitna kum nâra sa, yawan sip sa witin bâk Dawan ra aisaia. Baha lika Micaías Imlá luhpia ba, sakuna yang mita baha kulkras, kan aima kumi sin diara yamni dahra aisi ai wiras sa, sakuna saura baman. Bara Josafat mita win: —Baku man aisapara.

⁹ Baha ningkara Israel kingka mita wihtka kum ra wini, naku adar yaban: —Pat pali, Micaías Imlá luhpia ba wih bri bal.

¹⁰ Bamna Israel kingka Josafat bara Juda kingka ba wal ai king iwaika ra iwi kan, bara war aiklabaia prâka dimi, aidrubanka daukaia pliska Sameria dimaika getka lamara; bara prapitka nani sut witin nani mawanra dahra aisi banhwi kata.

¹¹ Bara Sedequías, Quenaaná luhpia ba, ayan ni bîp aringka nani daukan bri kan, bara naku winan: “¡Dawan naku wisa: ‘Naha aringka nani wal Siria uplika nani sut ba mangki âpu pali daukamna!’ ”

¹² Bara prapit nani sut ba baku baman ai dahra aisi, win: “Ramot Galaad tasbaya ra uli was bara pura luma, kan Dawan mita tawanka ba mihtam ra mangkan kabia.”

¹³ Micaías mata blikan uplika ba aisi, naku win: —Kaiks, prapit nani sut ba bîla yamni baman king ra aisisa; baku bamna man sin baha nani wal baku bîla yamni nani aisama, bara man maisa pakma pura lubia ba dukiara.

¹⁴ Bara Micaías pana win: —¡Dawan nina mâki swer takisna, Dawan dîa ai wibia ba baha aisamna!

¹⁵ Bamna witin king ra balan, bara king makabi walan: —Micaías, ¿yang nani Ramot Galaad tasbaya mapara aiklabaia wamna, apia kaka ban swi banhwamna ki? Bara Micaías win: —Was bara pura luma, bara Dawan bui king lâka ba mihtam ra mangkan kabia.

¹⁶ Bara king bui win: —¿Aima an kat taibi mai munrika, Dawan nina ra diara kasak ba ai wima ki?

¹⁷ Bara Micaías bila: “Yang bui Israel luhpia nani sut ra kaikri, yakaban kan il nani ra; sîp nani ai sîpkas baku. Bara Dawan bila: ‘Naha nani ai dawanka âpu; kumi bani kli wamtla nani ra was, kupiam kumi.’ ”

¹⁸ Bara Israel kingka bui Josafat ra win: —¿Yang bui man ra mai wiras katna ki witin bui yang ra diara yamni kumi sin dahra aisi ai wiras, sakuna saura baman ai wisa?

¹⁹ Bara Micaías kau aisin: —Baku aisaram ba mita, Dawan bîla na wals: Yang kaikri Dawan ba ai king iwaika ra iwi kan, bara kasbrika ra insal nani sut ba lika witin ai tnaya kir bûi banhwi kata, ai mihta aihkika tani bara ai mihta smihka tani ra sin.

²⁰ Bara Dawan makabi walan ya bui king Ahab ra munka Ramot Galaad tasbaya ra uli wih, bahara prubia. Bara kum kum b, diara kum aisi kan, bara wala nani ba diara wala aisi kan.

²¹ Sakuna spirit kum taki, Dawan mawanra bûi muni win witin mita baha ba daukbia. Bara Dawan ba makabi walan baha ba nahki daukaia,

²² bara spiritka ba mita win spirit kuninkira kum king prapitka nani ra yarka aisabia. Bamna Dawan win, baha pain sa bara witin wabia kunin munaia, bara baku wih daukbia.

²³ Bara nanara pat nu sma Dawan mita man prapitkam nani bîla ra kunin aisaia piritka nani mangkan sa, bara Dawan ba wilin pali takan sa man puramra pât saura brih balaia.

²⁴ Bamna Sedequías, Quenaaná luhpia, Micaías lamara bal mawanra pruki, naku win: —¿Dawan spiritka ba yang wina taki anik wata ki, baku man ra aisaia?

²⁵ Bara Micaías mita pana win: —Man kaikma, baha yua utla kumi wina utla wala ra yukuwi tauki kama ba ra.

²⁶ Bara Israel kingka ba mita win: —¡Micaías ba alks bara naha tawanka wihtka Amón ra bri si yas, bara yang luhpi Joás mawanra sin!

²⁷ Bara witin nani ra wis, yang wisni, waitnika na silak ra mangki bri kabia, plun uya yabia apia, brit lî wal baman, yang pruras kli tawi balamna ba kat.

²⁸ Kau ban Micaías aisin: “Man raya kli balma kaka, Dawan ba yang bâk aisaras kan.”

²⁹ Baku bamna, Israel kingka bara Josafat Juda kingka ba, Ramot Galaad tasbaya mapara wan.

³⁰ Bara Israel kingka bui Josafat ra win: —Yang lika war aiklabaia prâka ba dimras aiklabaisna, sakuna man lika yang prâika na dimi aiklas. Bamna Israel kingka ba, baku kwalka dimi war aiklaban.

³¹ Sakuna Siria kingka ai war aiklaklabrika lalka tara nani 32 ba war wagin nani ra mangki bliki muni win, aiklabia apia lalka tara nani mapara, bara sirpi nani ba mapara sin apia, sakuna Israel kingka ba baman mapara aiklabia.

³² War waginka kiaptinka nani Josafat kaikan ba ra, witin nani lukan Josafat ba Israel kingka, bara kutbi brin mahka aiklabaia. Ban sakuna Josafat hilp makabi ai pura winan,

³³ bara war wagin lalka nani bui kaikan baha ba Israel kingka apia kan, bara witin nani bui witin mahka swih ki tnaya ra tawan.

³⁴ Sakuna suldiar kumi ai pantamangka ba ban lulkan, bara king Ahab war kwalka dimi kan ba lilapas bâk diman, baku ba ra ai war wagin uli kan waitnika ra win: —War wagin mawan ba wilbi laki, mahka brih was. Ai sâks pat muni naha warka na wina, kan kasak pali ai insauhkan bamna.

³⁵ Baha yua war ba kau karna taki kan, bara king ba ban ai waginka bilara kan iwras. Siria uplika nani pana pana ai mawanra kat bûi kata. Sakuna tutni kat mahka pruata, kan ai tâlia ba ban plapi kan war waginka bîla ba wina.

³⁶ Bara yu pat dimuya kan awarka ra, maisa papakra kum kiamp ba wina taki bal, naku wini aisin: “¡Upla kumi bani ai tawanka ra mahka wabia, ai tasbaya ra,

³⁷ kan king ba pruan!” Bamna Sameria ra bri si bikan.

³⁸ Bara king tâlia ba Sameria laya madakura ra bri si sikban, bara yul nani Ahab tâlia ba dabi kan bara bahara sika ur mairka nani aihtabaika pliska kata ba, Dawan bîla dîa aisin ba kat takan.

³⁹ Bamna Ahab sturka nani kau bâra ba, bara dîa dîa daukan ba, utla nani elepant napa wal paskan ba bara tawan nani paskan ba sut lika, Israel kingka nani sturka ulban wauhkataya ra ulban sa.

⁴⁰ Bara king Ahab ba pruan, bara ai watlika ra ai luhpia Ocozías king aimakan.

Josafat Juda ra king aimakan ba

⁴¹ Asá luhpia Josafat mahka Juda kingka aimakan, Ahab Israel ra mani walhwal king aimaki kan piua ra.

⁴² Josafat mani 35 bri kan piua ra king aimakan, bara witin Jerusalem ra mani 25 king aimakan. Ai yaptika nina ba Azubá, Silhí luhpia kata.

⁴³ Bara witin ai aisika Asá yabalka nani sut ra tauki kan, tnaya ra sin tawras pali. Dawan nakra nani ra diara yamni baman dauki kan. Baha sut purkara, gâd bahki watla nani bara sakripais dauki kan upla nani bahara aidul ba sakras kan, bâra kîa yamni angki kan.

⁴⁴ Bara Josafat lika Israel kingka wal kupia kumi daukan.

⁴⁵ Josafat sturka nani bara diara tara nani daukan ba bara war nani daukan ba sut lika, Juda kingka nani sturka ulban wauhkataya ra ulban sa.

⁴⁶ Waitna nani mairin nani ur taki ban ai pura suni nani kan ban swin kan ba Asá piua ra, Josafat mita sika sut pali kangban tasba wala ra wan.

⁴⁷ (Baha piua ra, Edom ra kau king âpu kan, wihta tara baman bri kan king watlika ra.)

⁴⁸ Josafat sin duri tara nani paskan, Tarsis bara Ofir wina gul nani brih balaia dukiara; ban sakuna sip waras kan, Esión-guéber ra pîs ra baman takan bamna.

⁴⁹ Bamna Ahab luhpia Ocozías bui Josafat ra win, yaka ai uplika nani ba witin uplika nani aikuki bûtku wabia, sakuna Josafat bui swin waras kata.

⁵⁰ Josafat pruan bara ai damika Debit Tawanka ra bikan. Baha ningkara ai luhpia Joram king aimakan.

Ocozías Israel ra king aimakan ba

⁵¹ Josafat lika Juda ra mani 17 king aimaki kan piua ra, Ocozías, Ahab luhpia ba, Israel ra bara Sameria ra king aimakan mani wâl.

⁵² Sakuna Jeroboam, Nebat luhpia ba, ai daukanka ba Dawan nakra ra saura daukan, Israel ra sin yan saura daukan ai aisa bara ai yaptika wal saura dauki kan ba yabalka ra wapan.

⁵³ Baha purkara, Baal ra ai pura suni mayunan, ai aisa saura dauki kata ba baku. Bamna baku, Dawan ra kupia sauhkan, witinka Israel Gâdka ba.