1 King Nani 21 - DAWAN BÎLA AISKA

Ahab bara Nabot wainka nasla ba

¹ Naha diara nani ningkara, Nabot Jezreel wina ba, wain nasla kum bri kan, baha ba Sameria kingka Ahab watla lamara kata.

² Yu kum Ahab bui Nabot ra win: —Wainkam nasla ba yang ra aik, kiabits nani baku nasla kum daukaisna, kan king watla wal lamara sa bamna. Bara yang baha watlika ra wain nasla wala kau pain maikamna, apia kaka man lalah ni want sma kaka maikamna.

³ Bara Nabot bui Ahab ra win: —Gâd bui yamni kaikras kabia, aisiki nani prapatika ba maikamna sa kaka.

⁴ Bara Ahab ai watla ra wan, sari bara ai kupia baiwan pali kira, Nabot Jezreel wina ba bui bîla nani aisi win ba wali, baha lika ai aisika nani prapatika ba sip yabia apia win ba. Bara ai watla ra wih krikrika ra aitnikan, ai mawan ba utla tnaya tani ra laki, bara plun sin piras kan.

⁵ Ai maya Jezabel witin ra balan, bara win: —¿Dîa muni sari sma, bara plun sin piras sma ba?

⁶ Bara Ahab bui pana win: —Kan Nabot Jezreel wina ba wal aisari, bara wîri ai wainka nasla ba aikbia, lalah mana, apia kaka kau pura brin dauki kaka wain nasla wala ba mana yaia wîri, bara witin ai win ai wainka nasla ba yang ra sip aikras.

⁷ Bara ai maya Jezabel mita win: —¿Man apia ki nanara Israel purara king ba? Bus, bara plun pis, diara dih lilia taks. ¡Yang bui Nabot Jezreel waitnika wainka nasla ba maikamna!

⁸ Bamna witin Ahab nina ra wauhkataya nani ulban, bara king mihtadingka ba ni sîl prakan, bara almuk nani ra bara Nabot takaski kan tawanka lalka nani ra sin blikan.

⁹ Bara wauhkataya nani ulban kan ba naku kata: “Maisa paki banhs plun piaia apia, bara Nabot ba upla nani mawanra mangks.

¹⁰ Ningkara witin mawanra kuninkira wâl yas bubia, bara witin nani Nabot mapara kunin aisi wibia witin ba Gâd mapara bara king mapara sin saura aisan. Bara ningkara sâks, bara walpa ni sabi iki banhs.’’

¹¹ Bara Nabot tawanka uplika almuk nani bara tawan ra tâ bri nani ba, Jezabel dîa win ba kat daukan, dîa ulbi blikan kan ba baha kat daukan.

¹² Bara plun kaiki piaia apia ba dukiara maisa pakan, bara Nabot ba upla nani mawanra yan buan.

¹³ Bara kunin aisasara wâl balan, bara witin mawanra iwan, bara baha waitna kuninkira wâl ba, Nabot mapara kunin aisi upla nani ra win Nabot lika Gâd mapara bara king mapara sin saura aisin. Bamna tawan ba wina latara saki bri si walpa ni sabi ikan.

¹⁴ Baha ningkara Jezabel ra bliki maisa paki win, Nabot ba walpa ni sabi ikan sa.

¹⁵ Jezabel walan Nabot ba walpa ni sabi ikan sa, bara Jezabel bui Ahab ra win: —Mahka bus, bara Nabot Jezreel wina wainka nasla ba bris, lalah mana maikaia apia win ba, kan Nabot ba raya apia sa, witin ba pat pruan sa.

¹⁶ Bara Ahab lika Nabot pruan ba wali, mahka buan, Nabot Jezreel wîna ba wainka nasla ba wih witin ai dukia brin.

¹⁷ Bara Dawan bîla baikra Ilayas Tisbé wina ba ra balan, bara naku win:

¹⁸ “Bus bara mahka was Israel kingka Ahab, Sameria wina ba ra was, naha piua ra witin lika Nabot wainka nasla ra sa. Nasla ba witin dawanka takan sa.

¹⁹ Bara man wis: ‘Dawan naku wisa: Man mita Nabot ba ikram, bara ai dukia ba dakbi briram bamna, Nabot tâlia yul nani daban ba pliska ra, man tâmlia sin yul nani dabia.’ ”

²⁰ Bara Ahab bui Ilayas ra win: —¿Baku bamna man, yang waihli sma ba, kli ai sakram ki? Bara pana aisi, win: —Âu, pliki mai sakri, kan man ba Dawan lamara saura baman daukisma.

²¹ Baku bamna, Dawan ba naku win sa: ‘Kaiks, yang bui man puramra pât saura brih aulna, kiamkam nani Israel ra ba sut âpu daukamna; bara Ahab watla ba sut sauhki tikamna, waitna nani Israel ra bâra ba sut sin.

²² Bara man wamtla ba, Jeroboam Nabat luhpia watla bîla baku daukamna, bara Baasá Ahías luhpia watla ba baku sin, baha kiama karna lâka Israel ra dauki kupi sauhkan ba.’

²³ Jezabel dukiara sin Dawan naku aisin sa: ‘Yul nani bui Jezabel wîna ba pibia, Jezreel twiya nani ra.’

²⁴ Bamna Ahab kiamka nani tawan ra prubia ba, yul nani bui pibia, bara twi ra prubia ba lika tnawira yakal nani mita pibia.

²⁵ Ahab baku upla wala âpu kata, Dawan nakra nani ra saura dauki kan ba, kan ai maya Jezabel bui maisa kapi kan baha saurka nani daukaia ba.

²⁶ Witin ba saura pali kulkan kata, gâdkas nani yabalka ra wapan, amorreo nani dîa pali daukan ba baku daukan, baha nani Dawan bui Israel luhpia nani wina lulkan ba.

²⁷ Bara Ahab naha bîla nani sut walan, bara ai prâka nani kalkan bara sari kwalka diman, plun sin piras, baha kwalka wal ban yapan, bara ai kupia bawikira ban tauki kan.

²⁸ Bamna Dawan bîla ba Ilayas Tisbé wina ra balan, bara naku win:

²⁹ “¿Man kaikras sma ki, Ahab nahki yang laimara bawan lâka bri ba? Bamna yang laimara bawan ba mita, witin ai yua nani ra pât saura bri balamna apia, raya piua ra ai luhpia nani ra saura lâka ba brih wamna.”