1 King Nani 20 - DAWAN BÎLA AISKA

Ahab bui Siria uplika nani sauhki tikisa

¹ Bara Ben-hadad Siria kingka ba war aiklaklabra nani asla daukan, bara king wala nani 32 aikuki ai uplika takan, aras nani wagin kira, bara Sameria ra wih kutban; baha wina aiklaban bara pura luan.

² Bara maisa papakra tawan ra blikan, Israel kingka Ahab ra wiaia:

³ “Ben-hadad naku wisa: ‘Man gulkam ba yang duki sa, man mairkam nani bara luhpiam kau pain nani ba sut, yang duki kabia.’ ”

⁴ Israel kingka bui pana win: “Man wisma ba baku, dawanki king tara, yang bara dîa dîa brisna ba sut lika, man dukiam sa.”

⁵ Maisa papakra nani ba kli aima wala Ahab kaikaia wan, bara win: “Ben-hadad naku wisa: ‘Yang bui man ra bliki mai wîri: Man gulkam, mairkam nani bara luhpiam nani sut yang ra aikaia sma.

⁶ Baha purkara, yauhka naha awarka ra wihtki tara nani man ra blikamna, king wamtla ba turbi laki kaikbia, warkkam tatakra nani watla nani ba sin, bara diara manakira nani ba sut lika saki brih wan kabia.’ ”

⁷ Bamna Israel kingka ba bui tawan almukka nani sut paiwan, bara win: —Naha tânka na kasak laki kaiks, bara kaiki kaiks naha waitnika diara saura baman ai daukaia plikisa, witin bui yang ra blikan sa mairin nani ba bara gulki nani ba brih waia, yang bui lika apia sip wiras sna.

⁸ Bamna almuk nani bara tawan uplika nani bui pana win: —Man baha bîla walpara, dîa makabi ba sin yapara.

⁹ Bara king Ahab bui Ben-hadad blikan, uplika nani ra win: —Yang dawanki king ra wis, tâura dîa bliki ai win ba daukamna, ban sakuna naha lika daukamna apia. Bara maisa papakra nani dîa win ba, wih king ra win,

¹⁰ bara Ben-hadad kli Ahab ra blikan wiaia: “Gâd nani bui ban saura pali ai munan kabia, Sameria tasbaya yamhpuska nani ailal âpu sa kaka, upla nani yang nini bliki ba ra ai mihta kruskanka kum kum yabaia kumi bani ra.”

¹¹ Bara Israel kingka bui pana naku wibia win: ‘‘War kau aiklabi pura luras ba ra, baku pali aimayunaia lika sip apia sa.”

¹² Bara Benadad naha bîla nani walan ba ra, ai walka nani aikuki dih banhwi kan ba sin walan utla papakni kum ra. Bara ai aiklaklabra wihtka tara nani ra win: “¡Man nani war aiklabaia bus!” Bara witin nani sut ridi takan tawan ba mapara aiklabaia dukiara.

¹³ Bara Israel kingka Ahab ra prapit kum balan, bara win: —Dawan ba naku wisa: ‘Kaiks, man waihlam nani kwâra tara kaikisma, sakuna baha nani sut yang bui mihtam ra mangkamna, bara man tânka brima yang sika Dawan sna ba.’

¹⁴ —¿Ya bui bâk mihti ra mangkbia sa ki? —Ahab makabi walan. —Bara Dawan ba win sa wahma nani mihta bâk, baha nani naha tawanka ra tâ bri nani ba —prapit ba baku win. —¿Bara ya pali bui pas aiklabia? —Ahab kli walan. —Man pas aiklas —prapit ba bui win.

¹⁵ Bara king Ahab bui wahma nani ba asla yan buan bara wapi kaikan, baha nani tasba wihtka nani ra hilp muni kan ba, asla ba ra 232 kata, Israel aiklaklabra sut ba lika 7,000 kan.

¹⁶ Bara yu wan lal kat awarka ra taki banhwan, bara Ben-hadad baha piua ra utla papakni ra dih bla taki kan, witin bara king wala nani 32 aikuki ai uplika takan nani ba sut kira,

¹⁷ bara king tara ra hilp muni nani ba pas taki wan. Ben-hadad ra bliki maisa pakan Sameria wina waitna nani aula ba,

¹⁸ bamna king ba bila: “¡Baha nani kupia kumi lâka dukiara, apia kaka war aiklabaia dukiara balbia sin, yang bui witin nani ba raya kaka maiwanra briaia want sna!”

¹⁹ Wihta tara ra hilp muni nani ba tawan wina taki wan, witin nani ninara war aiklaklabra nani wapan.

²⁰ Bara witin nani kumi bani ai mapara balan ba ikan, bara Siria uplika nani ba plapi banhwan, bara Israel luhpia nani bui nina bliki wan. Bara Siria kingka Ben-hadad ba, aras kum ra uli plapi swak takan, aras ra uli uplika wala nani sin.

²¹ Bara Israel kingka ba wih, aras ra uli kan uplika nani ba sut ikan, baku sin wagin nani ra kan ba. Bara Siria uplika nani ba âpu daukan, pura luanka ba tara kata.

²² Ningkara prapit ba Israel kingka ra bal win: —Was, man aiklaklabra nani ba karna dauks, bara pain damra wals dîa daukaia sma ba; kan mani kumi ningkara Siria kingka kli mampara balbia puram luaia.

²³ Siria kingka wihtka tara nani ba naku win: —Man nani gâdkam ba lika il nani gâdka sa, baha mita wan pura lui banhram. Sakuna twi ra aiklaban kaka kaikaia kapram, yang nani bui pura luaia kapri.

²⁴ Nanara daukaia ba lika king nani ba sut sakaia, baha watlika ra aiklaklabra lalka nani mangkaia.

²⁵ Bara was, war waitnika nani ridi daukma tâura war waitnika nani tikram ba baku, aras ni kaka, aras ni, wagin ni kaka, wagin ni. Ningkara witin nani wal yawan aiklabaia twi langni ra, bara yawan kaikbia sip pura luras kabia sapa. Bara Benadad bîla kat wali dîa win ba baku daukan.

²⁶ Mani kumi luan ningkara, Ben-hadad Siria war waitnika nani sut ra wauhkataya ulbi blikan, bara Afec ra aidrubi balan Israel luhpia nani mapara aiklabaia.

²⁷ Israel luhpia nani sin pain pali tânka ba laki kaikan, bara plun nani saki brih Siria uplika nani mapara aiklabaia taki wan. Bara Israel luhpia nani mita ai waihla nani kainara takaski banhwan, guts daknika baikanka wâl baku takan, bara Siria uplika nani mita tasbaya ba sut kutbi brin.

²⁸ Bara naha piua ra prapit kum Israel kingka ra balan, bara win: —Dawan ba naku wisa: ‘Siria uplika nani aisin, yang ba il nani gâdka kum sna, sakuna il bîla nani gâdka apia sni; bamna yang naha ailalka tara na sut mihtam ra mangkamna, bara man kaikma yang sika Dawan sna ba.’

²⁹ Yu 7 witin nani pana pana ai kiampka nani ai mawan kat bapi bri kata, bara yu 7 alkan ba ra mahka aiklabi banhwan. Israel luhpia nani mita Siria aiklaklabrika nani ra baha yua 100,000 ikan.

³⁰ Wala nani lika Afec tawanka ra plapi banhwan, sakuna tawan kutban nani ba wina 27,000 aiklaklabra purara kauhan. Ben-hadad sin tawan ra plapi bal bahara yukuwi kan, utla kumi wina utla wala ra yukuwi tauki kan.

³¹ Bara wihtka tara nani ba mita win: —Kaiks, yang nani walri Israel kingka nani ba, dîa dauki ba ai bîla kat daukisa. Baku bamna kaisa kwala siksa nani dimaia, wan nana ra sin kiwa nani mangki taki, Israel kingka ra waia kaikaia sip kabia sapa, bara wan saurka swih tikbia bara wan ikaia apia.

³² Bara kwala saura dimi banhwan, ai nana ra sin kiwa nani mangki, Israel kingka ra aidrubi balan bara win: —Ben-hadad bila king ra mamkabisa ai saurki swih tikma, bara ai rayaka tikma apia wisa. Ahab pana win: —¿Kau raya sa? ¡Yang maipara witin ba muihki kum baku sa!

³³ Baha waitnika nani kaikan naha na diara pain takuya talia sa, ai bîla wina aisinka nani takan ba, bara sin win ba: —Benadad ba man king, muihnikam sa. Bara witin bui win: —Wih brih bal. Bara Ben-hadad king Ahab ra balan, bara Ahab mita ai waginka ra sunan.

³⁴ Bara Ben-hadad mita win: —Papiki mita tasbayam dakbi brin ba, yang bui kli maikamni; bara man kli Damaskus ra bisnis daukaia sip sma, yang papiki Sameria ra bri kata ba baku. —Yang wina lika, yang pramis takisna mai swiaia man mahka waia —Ahab baku win. Baku natka ra, Ahab Benadad wal lâ kum daukan witin ba swika waia.

³⁵ Ban sakuna, waitna kum prapit daknika ba wina, makaban ai uplika kum ra, Dawan adarka ba kat: —¡Ai klaks, pliskam pali! Sakuna wala ba mita wilin apia kan baku daukaia.

³⁶ Bara prapit ba win: —Dawan bîla wali daukras kapram bamna, man ba yang wina taki wama ba ra, layan kum mita mai ikbia. Bara prapitka baha wina taki wan ba ra layan kum wal prawan, bara witin ra ikan.

³⁷ Baha ningkara prapit ba waitna wala kumi wal prawan, bara witin ra sin makaban ai wîna ra klakbia. Bara waitna ba mita prukan bara insauhkanka yaban.

³⁸ Bara prapit ba mahka wan, yabal ra king bîla kaikaia. Kwala sât wala dimi yukuwan, ai nakra ra sin kwala pîs wilkan.

³⁹ King ba lui auya kan ba ra, prapit ba ai bîla karna wini, witin ra win: —Man albikam na taki wan kau war aiklabi kan piua ra, bara kaiks war aiklaklabra kumi mita silak uplika kumi bri laimara bal ai win baha waitnika ba aihwaki kaiki kamna, swirka plapbia kaka yang rayaki ba witin rayaka mana kabia, apia kaka silbar mâ 3,000 aibapamna.

⁴⁰ Bara man dukiam dadaukra na wark uya bri kapri daukaia, ban nâra kapri waitnika kata plapi swak takan. Bara Israel kingka pana win: —Baha ba man sma; man param pâtkira taki, silp damhra aisaram sa.

⁴¹ Witin kwala pîs ai nakra ra wilkan kata ba lanhkan, bara Israel kingka bui latan kaikan, baha ba prapit nani wina kumi kata ba.

⁴² Bara prapit ba witin ra win: —Dawan naku wisa: ‘Man mita waitnika ba swiram plapan, witinka pruaia pâtka brin kata ba; rayaka ba mana man rayakam ni aibapaia sma, uplikam nani ba witin uplika nani wal kulkan sa.’

⁴³ Bamna Israel kingka ba sari takan bara ai kupia sarikira king watla ra mahka wan, Sameria ra.