1 King Nani 2 - DAWAN BÎLA AISKA

Debit almuk taki aisin bîla nani ba

¹ Debit mahka pruaia yua nani ba aimakan ba ra, witin ai luhpia Salaman ra smalki win:

² “Yang mahka impakaia yabalka ra auna, upla sut wan yabalka ra. Bamna kupiam karna bri bas, bara sin waitna bas.

³ Dawan Gâdkam lâka nani ba alki bri bas, ai yabalka nani kat sin tauki bas. Ai lâka bîla nani ba aihwaki kaiki kama, ai lâka nani bara ai witniska bîla Moses lâ wauhkataya ra ulbi mangkan ba. Baku mika diara sut daukisma ba yamni kabia, ani anira wama sut ra yamni kama.

⁴ Baku mika Dawan ai win bîla ba kat daukbia, witin bui yang ra ai win ba: ‘Man luhpiam nani yabalki ba alki bribia kaka, ai kupia aiska bara ai sulka aiska ni, baku ba ra taiya nani tilara diara luha kabia apia, Israel man iwaikam ra iwi kabia.’

⁵ “Man lika pain kaikaia sma Joab Seruiá luhpia dîa ai munan ba, wibia kaka, Israel war wihtka tara wâl ra daukan ba: Abner, Ner luhpia ra, bara Amasá, Jéter luhpia wal ra ikan. War piua ra ikan ba mana, kupia kumi bri na piua ra pana tâlia laikan. Baha war ra ikata ba, baha yang purira kahbisa.

⁶ Baku bamna, man sins lâka ba kat witin wal daukma, yarka witin ban ai âuyapah prubia ra.

⁷ Barzilai, Galaad wina ba luhpia nani wal kupia kumi lâka daukma, witin nani ba sin paiwi, tibilkam ra aikuki plun pi bas. Kan witin nani bui yang ra baku pali daukan, muihkam Absalón wina plapi katna piua ra.

⁸ Baku sin, Guerá luhpia Simí ba man wal sa, Benjamín kiamka Bahurim wina ba. Yang Mahanaim ra auna kan ba ra, witin bui sika saura ai lahtuban, ban sakuna baha ningkara Jordan kat balan yang wal prawaia; bara yang Dawan nina ra swer takri witin ra ikbia apia.

⁹ Ai pâtka swi tikpara. Man lika sinskira sma bara dîa witin wal daukaia lukma ba kat daukma. Sakuna trai kaiks ai prurika ba saura kabia.”

Debit pruanka ba

¹⁰ Bamna Debit ba pruan bara ai damika nani raitika ra bikan, Debit Tawanka ra,

¹¹ Debit lika Israel aiska purara mani 40 king aimakan, baha tila wina mani 7 ba Hebrón ra, bara mani 33 ba lika Jerusalem ra.

¹² Bara Salaman ai aisika Debit king iwaika ra iwan, bara ai king lâka ba ban kan sip lakras.

Adonías king aimakaia buan

¹³ Bamna Adonías Haguit luhpia ba, Salaman yaptika Betsabé ra wan. Bara mairin ba bui makabi walan: —¿Man balram na kupia kumi lâka wal ki? Bara witin bui pana win: —Âu, kupia kumi lâka wal.

¹⁴ Baha ningkara win: —Bîla kum brisna mai wiaia. Bara mairin ba bui win: —Bamna aisas.

¹⁵ Bara witin bila: —Man tânka brisma king kaia lâka ba yang duki kan ba. Baha purkara, Israel luhpia nani ba yang bîli kaiki kan king aimakamna; ban sakuna king lâka ba yang wina ai dakbi muihki ra ni yan, kan baha ba Dawan wina sa bamna.

¹⁶ Bamna nanara yang makabanka kumi brisna, baha makabanka ba man apia ai wipara. Bara witin bui pana win: —Aisas.

¹⁷ Bamna witin bila: —Yang mamkabisna, man king Salaman ra wih makama, tânka brisma witin apia mai wibia apia, sunamita mairin Abisag ba yang ra makabi aik.

¹⁸ Bara Betsabé bui win: —Yang aitani lukisna, king ra aisamna man dukiamra.

¹⁹ Betsabé king Salaman ra balan Adonías dukiara aisaia, bara king ba buan witin ba wal prawaia. Bara sin ai lal makupan ningkara, ai king iwaika ra kli iwan. Bara adar yan ai yaptika ra iwaika tara kum sal yabia, bara mihta aihkika tani ra Betsabé iwan.

²⁰ Bara witin bila: —Man ra makabanka sirpi kumi brisna, man apia ai wipara. Bara king bui win: —Makas, yaptiki, yang apia sip mai wimna apia.

²¹ Bara ai yaptika bui win: —Abisag sunamita mairin ba, muihkam Adonías ra yas ai maya bribia.

²² King Salaman ai yaptika ra pana aisi, win: —¿Dîa muni Abisag sunamita mairin ba Adonías maya kabia wisi makabisma? Baha wal man ai wisma king lâka na sin witin ra yamna, kan witin ba muihki almuk bamna. Witin pat brisa prîs Abiatar bara Joab Seruiá luhpia ba sin.

²³ Bara king Salaman naku Dawan ra swer taki, aisin: “¡Gâd klala saura pali aikbia, Adonías naha aisin na mana ai rayaka tikras kaka.

²⁴ Dawan nina mâki swer takisna, witin bui sika king ai mangkan na aisiki Debit king iwaika ra, pamali karnika kum sin paski aikan witin ai win ba baku, naiwa pali Adonías ba pruaia sa!”

²⁵ Bamna king Salaman Joiadá luhpia Benaías ba blikan wan, Adonías ra ikaia bara wih ikan.

²⁶ Bara king bui prîs Abiatar ra win: “Man tasbayam Anatot ra mahka was. Man ba lika aitani pali sa mai ikan kaia, ban sakuna naiwa lika mai ikamna apia, kan man Dawan Gâd lâka auhbaia watla ba brih aisiki Debit tâura wapram. Ba purkara man sin sari taki katma, aisiki dîa dîa dukiara sari taki kan piua ra.”

²⁷ Baku sika Salaman Dawan prîska Abiatar ra warkka wina saki lulkan, Dawan aisin bîla nani sut aimakaia ba mata, witin Siló ra aisin ba Elí taika nani dukiara.

Joab plapi kan ikan ba

²⁸ Bara diara takan ba sturka Joab ra balan, kan Joab lika Adonías daukanka ba pain kulkan, sakuna Absalón daukanka ba saura kulkan. Bara Joab Dawan tintka watla ra plapi wih, altar ra bîp aringka nani ba tnaya ra yukuwan.

²⁹ Bara Salaman ra maisa pakan, Joab plapi Dawan tintka watla ra wih altar ba lamara yukuwisa, bara Salaman Joiadá luhpia Benaías ra adar yan wih ikbia.

³⁰ Bamna Benaías Dawan tintka watla ra dimi, Joab ra win: —King bila man naha wina takma wisa. Bara Joab bila: —¡Apia! ¡Nahara yang pruamna! Bamna Benaías baha bîla nani ba king ra bal win: —Joab naku wisa, bara baku sin maipara aisin.

³¹ Bara king bui win: —Witin aisin ba kat dauks. Iki muni biks, bamna yang puri wina bara aisiki watla uplika wina sin nina diki sâks, Joab tala pâtkas laikan ba.

³² Bara Dawan bui ai tâlia ba tahki witin lal ra sunbia, kan witin bui Ner luhpia Abner, Israel war wihtka tara wâl kan ba ikan skiru ni, bara Jéter luhpia Amasá ba sin, witin Juda war wihtka tara pali kan ba.

³³ Baha nani tâlia ba Joab purara kauhan sa, ai kiamka nani purara sin ban kaia ra; ban sakuna Debit bara ai kiamka nani purara bara ai king iwaika purara sin Dawan wina ban kaia ra kupia kumi lâka bâra kabia.

³⁴ Bamna Benaías Joiadá luhpia ba, wih ki Joab ba ikan, bara witin ba ai watla ra upla iwras tasbaya ra bikan.

³⁵ Bara king Joiadá luhpia Benaías ba, suldiar nani wihtka tara mangkan, bara Sadoc ba king mita prîs mangkan Abiatar watlika ra.

³⁶ Baha ningkara king mita Simí ba paiwan balan, bara win: —Man Jerusalem ra utla kumi paski bahara bas. Bara baha wina man plis kumi ra sin wapara,

³⁷ luki bas ani piua man taki Cedrón tingnika luma kaka, kasak pali mai wisna man pruma, bara tâliam ba man puramra kabia.

³⁸ Bara Simí pana win: —Baha bîla ba pain sa. Kingki tara dîa wiram ba kat albikam na daukbia. Bara Simí piua wihka pali Jerusalem ra takaski kata.

³⁹ Sakuna mani yumhpa luan ningkara, Simí albika wâl ba plapan Aquís Maacá luhpia Gat kingka ra. Bara Simí ra maisa pakan: “Kaiks, man albikam wâl ba Gat ra sa.”

⁴⁰ Baku ba ra Simí mahka bûi ai birikuka ridi dauki Aquís ra wan Gat ra ai albika nani plikaia. Bamna Simí Gat ra wih ai albika nani ba brih balan.

⁴¹ Ningkara Salaman ra maisa pakan Simí ba Jerusalem wina taki Gat kat wih kli tawi balan sa.

⁴² Bamna king bui Simí ba paiwan balan, bara win: —¿Yang Dawan nina mâki swer taki mai wiras katna ani yua man plis kum ra taki wama kaka, man pruma mai wîri apia ki? Bara man ai wiram bîla ba pain sa, bara man baha kat wali daukma.

⁴³ ¿Bara dîa muni man Dawan ra swer takram ba daukras kapram, yang dîa mai wîri ba sin?

⁴⁴ Man pain damra walisma, saurka nani aisiki Debit mapara daukram ba, bamna Dawan bui baha saurka nani ba sut kli laki man lamla purara sunan sa.

⁴⁵ Sakuna king Salaman ba yamni pali kulkan kabia, bara Debit king iwaika ba Dawan mawanra ban bâra kabia.

⁴⁶ Baha ningkara Joiadá luhpia Benaías ba blikan wan bara Simí ra sabi ikan. Baku king lâka ba Salaman mihta ra baku ban kaia lâka ra wan.