1 King Nani 19 - DAWAN BÎLA AISKA

Ilayas ba Horeb ra plapisa

¹ Ahab bui Jezabel ra Ilayas dîa daukan ba sut pali win, nahki Baal prapitka nani ra nana dakban ba sin win.

² Bara Jezabel bui maisa papakra kum Ilayas ra blikan bara win: “¡Man ba Ilayas sma, yang na Jezabel! Yauhka naha awarka ra yang bui baha Baal prapitka nani ra munram ba baku, man ra mai munras sna kaka, gâd nani ba bui kau saura pali ai munbia.”

³ Bara ai dara walan diara saura takisa witin ai mapara, bara ai rayaka swaki sakaia dukiara Beerseba ra wan, baha ba Juda tasbaya kata, ai albika lika bahara swin.

⁴ Bara witin lika upla iwras tasbaya bâk yu aiska kum wapi wan, bamna wih dus kum munhtara iwan, mahka pruan dauki kan, bara win: “¡Nanara aitani sa, Dawan, rayaki na sâks, kan yang na kau yamni apia sna, papiki nani ba wal!”

⁵ Bara dus ba munhtara aitniki si, mahka yapan, bara tisku kan insal kum mita kangbi, bara win: “Bûi plun pis.”

⁶ Bara witin kaikan, kaiks turtiya angkan kum ai lal tani ra kan masku purara, bara lî sumi kum sin. Bara pata ba pin, laya ba sin din, baha ningkara kli mahka aitnikan.

⁷ Bara kli aima wala Dawan insalka balan, bara kangbi naku win: “Bûi plun pis, kan kau yabal wihka wapaia brisma.”

⁸ Bara Ilayas plun ba pin bara sin din. Bara baha pata ba ai karnika yaban mahka yu 40 bara 40 tihmia wapan, Dawan ilka Horeb ba kat.

⁹ Bahara wan ba ra, tasba unta kum ra diman, bara bahara tihmia luan. Bara Dawan bui witin ra aisin, bara naku win: “Ilayas, ¿man nahara dîa daukisma ki?”

¹⁰ Witin pana win: “Dawan, daihra walri, Dawan karnika sut alki brisma ba tâwan uya pali lawri sa, kan Israel luhpia nani man lâmka ba swin, bara altarkam nani sut batakan, bara prapit nani sut sin ikan sord ni. Bara yang baman takaskri, bara ai plikisa rayaki na sakaia dukiara.”

¹¹ Bara Dawan bui win: “Latara taki bal, bara bus maiwanra il ba purara.” Baha sim minitka ra Dawan luan, bara pâsa tara karna pali krawan, ban il nani ba baiwi kan, walpa tara nani ba sin tartar baiwi kan Dawan kainara, sakuna pâsa ba tilara Dawan bâra âpu kan. Bara pâsa ba luan ningkara, tasba nikban, sakuna tasba nikban ra Dawan âpu kata.

¹² Tasba nikban ba ningkara pauta klauhan balan, sakuna pauta klauhan ba tilara Dawan âpu kata. Bara pauta klauhan ninara bîla baikra kum takan tawa bara swapnikira.

¹³ Ilayas baha walan ba ra, ai kwalka ni ai mawan prakan; bara taki wih tasba unta pura ba kat buan, bara bîla baikra kum witin ra bal win: “Ilayas, ¿man nahara dîa daukisma ki?”

¹⁴ Bara witin mita pana win: “Daira walri, Dawan, man karnika sut alki brisma ba tâmwan uya lawisna, kan Israel luhpia nani man lâmka ba swin, man altarkam nani ba sut sauhki tikan, bara prapit nani sord ni baman ikan, bara yang baman takaskri, bara yang ra sin ai ikaia plikisa.”

¹⁵ Bara Dawan pana win: “Yabalkam bâk kli tawi was, Damaskus upla iwras, tasbaya bâk. Bara Hazael ba Dawan yamnika yaia batanka ba ni laiks, Siria kingka kaia,

¹⁶ bara Nimsí mulika Jehú ba sin batana laikma, Israel kingka kaia; bara Safat luhpia Ilaidsa ba, Abel-meholá wina ba, batana yûkma man wamtlika ra prapit kaia.

¹⁷ Bara ya Hazael sordka wina swakbia ba Jehú bui ikbia, bara Jehú sordka wina swakbia ba, Ilaidsa bui ikbia.

¹⁸ Bara yang yarka Israel ra kabia 7,000 waitna nani, witin nani ai lula Baal ra krikras sa, bara sin kau kiawalras nani ba.”

Ilaidsa paiwanka ba

¹⁹ Ilayas baha wina taki auya kan, witin Sefat luhpia Ilaidsa ba wal prawan, tasba baiki kan, bîp wainhka yok mangki yan ai kainara tasba baiki kan, bara lâs ba lika witin brih auya kata. Bara Ilayas bûi Ilaidsa kaina bâk tawi ai prâka ni pura prakan.

²⁰ Bara witin bîp nani ba swi si, Ilayas ninara plapi balan, bara win: —Mamkabisna ai swirka, yang wih papiki bara yaptiki kiawalamna, ba ningkara ninam blikamna. —Sip sma waia —Ilayas win—, sakuna kupiam krauki bas man ra dîa daukri ba.

²¹ Bara Ilaidsa ba Ilayas wina mahka wan, bara bîp wainhka wâl iki taman, bara tasba baiki dusa ba ni muki bîp wîna angki upla ra yan piaia. Baha ningkara Ilayas ninara mahka wan, bara dukia dauki kan.