1 King Nani 18 - DAWAN BÎLA AISKA

Ilayas Ahab wal prawaia wan

¹ Piua ba luan muni yumhpa luan ba ningkara, Dawan Ilayas ra balan bara witin ra win: “Man Ahab ra was, kan yang tasba purara lî blikaisna.”

² Bara Ilayas Ahab ra wan. Baha piua ra Sameria ra plun wahwan ba tara pali kata.

³ Ahab ai dukia main kakaira nani lalka Abdías ba paiwan, Abdías ba Dawan ra mayunra yabi kata bara sin witin ra kulki kata,

⁴ kan Jezabel bui Dawan prapitka nani ra iki tiki kata baha piua ra, Abdías bui prapit 100 brih, dakni wâl ra baiki saki, tasba unta ra yukuki bahara brit lî wal dakaki kan.

⁵ Bara Ahab bui Abdías ra win: —Tasbaya na wapi laki kaiks, lî iswaika nani ba, baku sin tingni nani ba sut, bara sip kabia sapa yawan twi sakaia, aras nani bara muyul nani ba dakaki raya bri kaia, baha apia kaka yawan âpu takbia.

⁶ Bara tasbaya ba witin nani baikan wâl ra daukan wapi laki kaikaia dukiara. bamna Ahab yabal kum bâk wan bara Abdías yabal walak wan.

⁷ Bara Abdías yabalku auya kan ba ra, witin Ilayas wal prawan, witin ba kaikan ba ra ai mawan ba tasba kat bawan, bara win: —¡Man ba dawanki Ilayas sma!

⁸ Bara witin bui win: —Âu, yang sika; bara man wih dawankam ra wis yang nâra sni.

⁹ Abdías aisin: —¿Dîa saura yâri kan ki, Ahab mihta ra ai mangkka witin bui yang ra ai ikaia?

¹⁰ Swer takisna man Dawan Gâdkam ba nina ra, kuntri kumi sin âpu sa, baku sin king tasbaya kumi sin âpu sa man mai plikras ba, bara sut bui win: ‘Nahara âpu sa’, bara witin pali bui sin aisin, king tasbaya nani ra, kuntri nani ra sin witin bui man ba mai sakras sa.

¹¹ ¡Bara nanara man ai wisma wih dawanki ra wimna, man nâra sma!

¹² Yang wamna ba ningkara dîa takbia ba lika, Dawan spiritka ba bui mai brih wabia yang nu âpu sna ba pliska ra. Bara Ahab ra sturka wih maisa paki si balamna ba ra, witin nahara mai sakras kaka, witin ai ikbia. Man albikam na, wahma wina Dawan ra sibrin lukisna.

¹³ ¿Dîa daukri ba dukiara kau man ra mai wiras sa ki, Dawan prapitka nani Jezabel bui iki kan piua ra? Yang mita 100 kumi yukukri, tasba unta wâl ra, bara brit lî wal dakaki kapri.

¹⁴ ¿Bara nanara man wisma, yang wih dawanki ra wiaia man ba nâra sma? Witin ba ai ikbia.

¹⁵ Bara Ilayas win: —Dawan karnika sut bri ba nina ra swer takisni, yang ya dukia daukisna ba nina ra sin, yang naiwa Ahab mawanra wamna.

¹⁶ Bara Abdías wan Ahab pliki saki maisa pakaia, bara Ahab Ilayas wal prawaia wan.

¹⁷ Ahab bui Ilayas kaikan ba ra win: —¿Baku ba ra man sma ki Israel luhpia nani ra trabil dauki ba?

¹⁸ Bara Ilayas win: —Yang apia trabil dauki ba, sakuna man bara uplikam nani wal, Dawan lâka nani ba swi si Baal nina ni bliki banhram.

¹⁹ Bamna nanara blîks, Israel luhpia nani sut Carmelo ilka ra asla takaia, Baal prapitka nani 450 ba bara Aserá gâdka prapitka 400 ba sin, baha nani ra Jezabel main kaiki plun dakaki ba.

Ilayas bara Baal prapitka nani wal

²⁰ Ahab Israel luhpia nani bara prapit nani ba sut paiwi asla daukan Carmelo ilka ra.

²¹ Bara Ilayas upla nani ba lamara wih win: —¿Ahkia kat man nani ba lukankam wâl brisma ba swiaisma? Dawan ba Gâd sa, ai nina blîks, bara Baal ba gâd sa kaka, witin ninara was. Bara upla nani pana diara aisaras kan.

²² Bara Ilayas kli upla nani ra win: —Yang yakan Dawan prapitka raya sna, sakuna Baal prapitka nani lika 450 bâra sa.

²³ Baku ba ra bîp wainhka wâl brih bal, bara witin nani kum bribia, bara iki muni pauta purara mangkbia, sakuna munhtara lika pauta klauhan mangbiara. Bara yang sin bîpka wainhka wala ba ridi daukamna, bara pauta ba purara mangkma, sakuna sim baku pauta klauhan kumi sin munhtara mangkamna apia.

²⁴ Ningkara man nani gâdkam nina mâki wini banhs, bara yang sin Dawan nina mâki winamna, ¡bara ani gâdka pauta bâk ai tânka wan marikbia ba, baha ba rait Gâd kabia! Bara upla nani sut win: —¡Baha ba aitani pali aisaram sa!

²⁵ Bara Ilayas bui Baal prapitka nani ra win: —Bîp wainhka kumi bri bal ridi dauks, man nani kau ailal sma bamna. Bara gâdkam ra puram suni makas, ban sakuna pauta lika mukpara.

²⁶ Bara bîp wainhka yan kan ba wina kum ridi daukan, bara witin nani Baal nina mâki titan wina yu wan lal kat wini kan: “¡Baal, yawan ra aisas!”, sakuna bîla baikra kumi sin âpu kata. Ban sakuna witin nani wapi srutwi kan, altar witin nani paskan ba lamara.

²⁷ Ban sakuna yu wan lal kat piua ra, Ilayas mita baha nani lawaska kiki win: —Bîlam baikra kau karna wins, witin ba gâd kum sa bamna. Ban kra witin wark brisa, apia kaka twi ra iwaia wan, apia kaka yabal ra impaki taukisa. ¡Ban kra yapisa, bara munka buaia sa!

²⁸ Bara witin nani ai bîla baikra karna wini kan, witin nani ai natka baku. Skiru ni, apia kaka kalkaia dukia sâtka wala nani wal ai wîna ba klaki kan, ban sin ai taya aiska ba tala baman kan.

²⁹ Yu wan lal kat piua ba luan kata, bara witin nani lal saura takan kan, baku ban wini banhwi kan, kîa yamni angkaia piua ba kat; sakuna bîla baikra kumi sin bal takras kan. Ya pali bui pana aisaia ba âpu kan, wini banhwi ba walaia ba sin âpu kan.

³⁰ Bara Ilayas bui upla nani sut ra win: —Laimara aidrubi bal. Bara upla sut witin lamara aidrubi balan, bara Dawan altarka sauhkan kan ba, witin bui kli paskan.

³¹ Bara Ilayas walpa 12 brin, Jekob luhpia nani 12 kulki ba baku, Dawan witinka ra win ba baku, witin nina ba Israel mâkan kabia.

³² Walpa nani ba wal Dawan nina ra altar kumi paskan, baha ningkara altar tnaya kir ba lî plapaika salhkan, batil kwarika ba sât yawanaiska kumi pura matawalsip alkaia pitka praiska kat.

³³ Ningkara pauta ba ridi daukan, bara bîp wînka ba pîs pîs ra klakan, bara pauta ba purara mangkan.

³⁴ Baha ningkara win: —Sumi walhwal lî banhki daukbia, bara daiwan wîna aiska angkaia ba purara, bara sin pauta ba purara lî ba laikbia win. Bara kli win baku daukbia. Bara baku daukan, aima yumhpa baku daukan witin nani.

³⁵ Baku ba ra, altar ba kir lî baman plapi kan, baku sin lî plapaika salhkan kata ba sut lî banhwan kata.

³⁶ Mahka wîna aiska angkaia piua aimakan ba ra, prapit Ilayas bui altar ba lamara balan bara win: “Ebraham, Aisak bara Jekob Dawan Gâdka, naiwa yua latan mariks man ba Israel Gâdka sma ba, bara yang na man dukiam dadaukra sna ba sin, man ai wiram ba mita yang naha diara nani sut na daukisna.

³⁷ Ai aisas Dawan, ai aisas, baku mika naha uplika nani kaikbia man ba Dawan Gâd sma tânka ba, bara yas witin nani kupia ba kli man ra tawbia.”

³⁸ Bara Dawan Gâd wina pauta klauhan bal iwan, bara aiska angkaia wînka ba aman, pauta ba, walpa nani ba, bara tasba yamhpuska nani, bara lî plapaika ra lî kan ba sut âpu lâwan.

³⁹ Upla nani baha kaiki, tasba kat bawan, bara win: “¡Dawan sika Gâd sa, Dawan Gâd sa!”

⁴⁰ Bara Ilayas witin nani ra win: —¡Baal prapitka nani sut alki banhs! ¡Yarka kumi sin swakbiara! Bara upla nani mita sut alki banhwan, bara Ilayas brih wan Quisón tingnika ra, bara bahara sut kat nana dakban.

Ilayas ai pura sunisa lî auhbia dukiara

⁴¹ Bara Ilayas bui Ahab ra win: —Mahka wih plun pis, diara sin dis, kan lî kum balaia binka takisa.

⁴² Bara Ahab mahka wan, plun pin bara diara laya sin din. Bara Ilayas Carmelo ilka bahna ra ulan, bara tasba ra ai lula krikan, ai mawan ba ban ai lula nani kat mangkan.

⁴³ Bara ai albika ra win: —Nanara uli wih, kabu tani ra kaiks. Bara witin uli wih kabu tani ra kaikan, bara win: —Diara âpu sa. Bara Ilayas win: —Kli uli was, aima 7 ba kat.

⁴⁴ Aima 7 ba kat alba ba win: —Yang kaikisna kasbrika sirpi kumi upla kum mihta yahpika baku kabu wina ulan sa. Bara witin bila: —Ahab ra wih wis ai waginka ra uli mahka wabia, baku mika lî bui kaina dakbia apia.

⁴⁵ Baku ba ra naha pliska ra ban kan, kasbrika ba tihmu dingkan, klaut nani bara pâsa sin, bara lî tara kum auhan. Bara Ahab mahka ai waginka ra uli Jezreel ra balan.

⁴⁶ Bara Dawan Ilayas ra karnika yan, witin ai maisa pain wilki Ahab kainara plapi Jezreel ra wan.