1 King Nani 17 - DAWAN BÎLA AISKA

Ilayas lî auhbia apia maisa pakisa

¹ Prapit Ilayas Tisbé tawanka wina, Galaad tasbaya pîska ba wina kan ba, Ahab ra win: “¡Israel Dawan Gâdka raya iwi ba nina ra swer takisna, witinka dukia daukisna ba, lî auhbia apia, diwas laya sin âpu kabia naha manka nani ra, yang bui wimna ba kat!”

² Bara baha mita Dawan bila Ilayas ra naku win:

³ “Naha wina taki lalma tani ra was, bara Querit tingnika ra wih yukuws, Jordan lalma tani ra.

⁴ Baha wina lî di kama, bara yang bui kuskuspiram nani blikrika bahara plun mai dakaki kabia.”

⁵ Bara witin wan Dawan dîa win ba kat, Querit tingnika lamara takaskan, Jordan lalma tani ba kat.

⁶ Bara kuskuspiram nani bui plun wîna wal sal yabi kan, titan bara tutni ra. Lî lika tingni ba wina di kan.

⁷ Sakuna yu nani luan ba ra, tingni ba lâwan, lî auhras kan ba mita.

Ilayas bara Sarepta wina piarka mairin ba

⁸ Bara Dawan Ilayas ra win:

⁹ “Man bus, bara was Sarepta ra Sidón tasbaya ra; bara man bahara takaski bas, yang bahara piarka mairin ra wîri sa, man ra plun mai dakaki kaia.”

¹⁰ Bamna Ilayas buan, bara Sarepta ra wan. Bara witin tawan dimaia durka kat wan ba ra, piarka mairin kumi pauta wahbi kan, bara witin lamara wih aisin: —Pliskam pali, glas kum ra lî wirâ aik diaia.

¹¹ Bri sal yabaia auya kan ba ra, Ilayas kli winan bara witin ra win: —Pliskam pali, brit sin wirâ lupia pan sal aik.

¹² Bara piarka mairin ba pana win: —Yang swer takisna Dawan Gâdkam ai kaikisa, yang brit angkan âpu, sumi bilara plawar wiria lupia baman brisna, bara batana laya sin wiria lupia sumi ra brisna, bara nanara pauta pîs wirâ wahbi kapri baha wih piakaia dukiara, yang duki bara luhpi dukiara sin. Baha ba pih ningkara, plun bla prui banhwamna.

¹³ Ilayas pana win: —Si bripara, was bara aisaram baku dauks, sakuna tâura yang duki turtiya luhpia kum dauki sal aik; ba ningkara man bara luhpiam dukia dauks.

¹⁴ Kan Israel Dawan Gâdka ba, naku win sa: “Sumi bilara plawar bara batana laya ba sin danh takbia apia, baha yua Dawan bui swika tasba ra lî auhbia ba kat.”

¹⁵ Piarka mairin ba wan, bara Ilayas dîa win ba kat daukan. Witin ai luhpia bara Ilayas kat yu ailal pata bri kan.

¹⁶ Bara sumi ra plawar ba bara batana laya ba danh takras kan, Dawan dîa Ilayas bâk aisin ba baku.

¹⁷ Naha diara nani ningkara, piarka mairin luhpia waitna ba siknis takan, bara sikniska takan ba saura pali kan bamna, ban ai wingka ba puhbras takaskan.

¹⁸ Bamna piarka ba Ilayas ra win: —¿Man wal yang dîa daukaia sna, Gâd waitnika sma ba? ¿Balram sa saurki nani dukiara kupi kraukaia, bara luhpi ba sin yarka pruaia?

¹⁹ —Luhpiam ba nâra aik —Ilayas win. Bara piarka ba plahpia wina witin brin, bara yapi kan ba rumka ra brih uli wan, bara ai krikrika ra tnikan.

²⁰ Bara witin ai bîla baikra karna Dawan ra ai pura sunan: “Dawan bara yang Gâdki, ¿naha piarka watla ra takaskisna na, witin ra sin sarka tara paskuma ki, bara ai luhpia waitna ba ikram?”

²¹ Bara tukta ba purara aima yumhpa aitnikan, bara Dawan ra ai bîla baikra tara winan: “Dawan Gâdki, mamkabisna naha tukta sulka ba kli witin ra yas.”

²² Bara Ilayas bîla baikra ba Dawan walan, bara tukta waitna sulka ba kli witin ra yan bara rawan.

²³ Ilayas mahka tukta ba brih, ai rumka ba wina mâyara iwi wih, ai yaptika ra yaban bara Ilayas win: —¡Kaiks, man luhpiam ba raya sa!

²⁴ Bamna mairin ba mita Ilayas ra win: —Nanara kaikisna man ba Gâd waitnika kumi sma, bara man dîa aisisma sut ba kasak sa.