1 King Nani 16 - DAWAN BÎLA AISKA

¹ Bara Dawan ba Jehú Hananí luhpia ra aisin, Basá mapara aisaia dukiara:

² “Yang tasba yamhpuska wina mai buki Israel luhpia nani, yang upliki wihtka mai mangkri. Sakuna man Jeroboam wal baku saura sma, Israel yang upliki nani ra yaram saura daukan, man saurkam ba tâwan yang kupi sauhkri.

³ Baku bamna, Basá, man âpu mai tikaisna, tamya nani wal sin baku daukaisna; Jeroboam Nebat luhpia wal dîa daukri ba baku baha ra daukaisna.

⁴ Man tamya kum tawanka bîla ba ra prubia kaka, wîna tara ba yul pibia; unta ra prubia ba, tnawira yakal nani mita pibia.”

⁵ Baasá sturka ba bara dîa daukan ba, ai aiklabanka nani daukan ba, Israel kingka nani wauhkataya ra ulban sa.

⁶ Baasá ba pruan, Tirsá ra bikan ningkara, ai luhpia Elá ai watlika ra king aimakan.

⁷ Prapit Hananí luhpia bâk, Dawan ba Baasá mapara bara ai taya nani mapara sin aisin; kan Baasá daukanka ba Dawan nakra ra saura kan. Dawan kupia sauhkan, witin ai daukanka ba, sim Jeroboam ai uplika nani aikuki dauki kata baku daukan, baha nani ra sauhki tikata ba.

Israel ra Elá bara Zimrí kingka lâka ba

⁸ Asá Juda ra pat 26 mani king aimaki kan ba ra, Elá Baasá luhpia waitna ba, Tirsá ra Israel kingka aimakan. witin mani wâl king aimakan bahara.

⁹ Sakuna Zimrí ba witin ai suldiarka kum kan, witinka ba war waginka nani bakriki prais ba lalka kan ba, bara aiklaklabra nani asla dauki ai mapara aiklabaia buan. Bara Elá ba Tirsá ra kan, witin bahara dih bla kan, Arsá king lalahka main kakaira ba watla ra.

¹⁰ Bara Zimrí ba bal dimi ikan, witin king aimakaia dukiara. Naha takan na mani 27 Asá Juda ra king aimaki kata piua ra, bara witin watlika ra king aimakan.

¹¹ Bara Zimrí ba king aimakan, bamna witin king iwaika ra iwan. Bara Baasá watla uplika sut ikan, waitna kumi sin swiras kata, taika sapa, apia pânika nani, sin sut âpu daukan, ban kra pana witin ra ikbia luki muni.

¹² Baku bamna, Zimrí bui Baasá watla aiska âpu daukan, Dawan ai bîla dîa Baasá dukiara ai prapitka Jehú bâk aisin ba kat yan aimakan.

¹³ Baasá saurka nani ba bara ai luhpia Elá saurka nani sut ba tâwan, baha saurka witin nani daukan bara Israel luhpia nani ra sin saurka ba yan daukan, aidul bahki nani bri kan bamna, Israel Gâdka ba kupia sauhkan.

¹⁴ Elá sturka nani bara dîa dîa daukan ba sut, Israel kingka nani sturka ulban wauhkataya ra ulban sa.

¹⁵ Asá Juda kingka mani 27 aimaki kan piua ra, Zimrí king aimakan yu 7 baman Tirsá ra. Bara upla nani bui kutban, Guibetón ra, baha ba filisteo nani tawanka kum kata.

¹⁶ Bara Israel war uplika nani kan ba sut walan, Zimrí ra upla dakni tara kum asla taki, bara king ba ikan. Baha piua ra, Israel war uplika sut bui Omrí ba Israel purara king mangkan. Witin ba war wihtka aiklaklabra tara kum kata.

¹⁷ Omrí, Israel war aiklaklabra ba balan, Guibetón ra aiklabaia, sakuna baha swi si Tirsá wal aiklabi pura luan.

¹⁸ Bamna Zimrí kaikan tawan ba brin kan, witin king iwaia ba watla ra dimi wan, bara watla ba pauta ni angkan, king ba baha bilara ami pruan.

¹⁹ Naha takan saurka nani daukan ba mita, baha saurka daukan ba Dawan bui yamni kaikras kan, sim Jeroboam saurka daukan kan ba baku. Witin ai saurka nani dauki kan ba tilara, Israel ra sin yan saurka daukan.

²⁰ Zimrí dîa dîa kau daukan ba, upla daknika asla dauki king Elá mapara buan ba sturka sut lika, Israel kingka nani sturka ulban wauhkataya ra ulban sa.

Omrí Israel ra king aimakan ba

²¹ Bara Israel luhpia nani ba dakni wâl takan. Bakriki kum ba Tibní, Guinat luhpia ba ai kingka mangkaia luki kan, bakriki wala ba Omrí nina bliki kan.

²² Tnata lâs ra Omrí daknika ba win takan. Tibní ba pruan, bara Omrí ba king aimakan.

²³ Asá Juda ra mani 31 king aimaki kan piua ra, Omrí Israel ra 12 mani king aimaki kan. Tirsá ra sin mani 6 king aimakan.

²⁴ Bara witin Sameria ilka ba atkan silbar 66 kilo mana Sémer wina; bara baha tawanka witin bui paskan, bara nina Sameria mâkan. Sémer wina atkan bamna, ilka dawanka ba Sémer, baha nina takan wina Sameria mâkan.

²⁵ Bara Omrí Dawan mawanra saura daukan, witin ai kainara king aimakan nani ba wal, kau saura pali daukan.

²⁶ Witin lika Jeroboam Nabat luhpia yabalka nani sut ra wapi kan, Israel ra saura yan daukan, baha saurka ba wal Dawan Israel Gâdka ra kupia sauhkan, ai gâdka bahki aidul lilka nani daukan ba wal.

²⁷ Omrí sturka nani bara dîa daukan ba, aiklaklabra kupia karna kan ba, Israel kingka nani sturka ulban wauhkataya ra ulban sa.

²⁸ Bara Omrí pruan ba ra, Sameria ra bikan. Ningkara ai luhpia Ahab ba witin ai watlika ra king aimakan.

Ahab Israel ra king aimakan ba

²⁹ Bamna Ahab Omrí luhpia ba, Israel kingka aimakan, baha piua Asá ba Juda ra pat mani 38 king aimaki kan. Omrí Israel king aimakaia tâ krikan, bara witin Sameria ra mani 22 king aimaki kan.

³⁰ Bara Ahab Dawan mawanra saura daukan, baha ba Dawan bui yamni kaikras kan. Witin ai kainara king nani kan ba sut purkara witin kau saura daukan.

³¹ Ban ai kupia lakras kan, Jeroboam Nabat luhpia saurka ba nina blikan, witin Sidón kingka Et-baal luhpia mairin, Jezabel ba ai maya brin, bara witin Baal mayuni dukia daukan.

³² Witin Baal altarka bara tempelka kum sin mâkan Sameria ra.

³³ Aserá lilka kum sin daukan, baha wal Israel Gâdka kupia sauhkan, Israel ra kingka nani sut ba wal kau saura pali daukan.

³⁴ Bamna piua ba kat Hiel Betel wina ba, Jeriko kli paskan, playa karnika bapan ba ai luhpia tawahkia Abiram rayaka mana, bara ai luhpia kau sirpi Segub rayaka mana ai durka nani mangkan, Dawan Gâd Nun luhpia Jasua bâk aisin ba kat.