1 King Nani 14 - DAWAN BÎLA AISKA

Ahías bui Jeroboam kauhaia ba maisa pakisa

¹ Bamna baha piua ra Jeroboam luhpia Abías ba siknis takan,

² bara Jeroboam ai maya ra win: —Bus, mamwan ba praks, baku lika upla mai kaikbia apia man ba yang mayi sma ba, bara man Siló ra was, bahara prapit Ahías bâra sa. Witin bui ai win, yang naha uplika nani kingka aimakaia sna ba.

³ Bamna brit matawalsip, turtiya, bara nasma laya watla kum brih witin ra was, bara tuktika na dîa takaia ba mai wibia.

⁴ Bara Jeroboam maya baku daukan. Witin buan bara Siló ra wan, bara Ahías watla ra balan. Bara Ahías baha piua diara sip kaikras kata, kan uba almuk ba mita ai nakra nani ba pukni takan kan.

⁵ Bamna Dawan bui Ahías ra win: “Kaiks, Jeroboam maya man ra aula, ai luhpia siknis ba dukiara mamkabi walaia. Bara dîa man wiaia sma ba luki bas, witin aula ba sin ai mawan praki aula.”

⁶ Bara Ahías dimi aula ba walan, bara mairin ba ra win: —Bal dims, Jeroboam maya. ¿Dîa kan kunin dauki, upla wala natka ra aulma? Kaiks, yang na man ra ai blikan sa, diara karna mai aisaia,

⁷ bamna tawi wih Jeroboam ra wis: ‘Dawan Israel Gâdka ba, naku wisa: Upla nani tila wina yang mai sakri, bara king mai mangkri upliki Israel ba purara.

⁸ Bara king lâka ba Debit watla wina saki man ra maikri, bara man lika albiki Debit kan ba baku apia sma. Witin bui yang lâika nani ba kulkan, bara ai kupia aiska wal nini blikan, yang naikra nani ra diara wapni baman dauki kan.

⁹ Ban sakuna, man kainamra kan nani ba wal kau saura daukram; bara man kupi sauhkram, gâd bahki nani lilka paski daukram, bara yang na man ninamra ai lakram.

¹⁰ Baku bamna, kaiks Jeroboam kiamka ra lahtuban lâka brih aulna; bara Jeroboam kiamka wina waitna nani ba sut âpu daukamna, alba nani, pri nani Israel ra ba sut, bara Jeroboam watla wina kiamka nani ba sut pahbi sakamna, daiwan tâskika pahbi yakabi ba baku.

¹¹ Jeroboam uplika nani tawan ra prubia ba yul nani bui pin kabia. Twi ra prubia ba lika, daiwan tnawira nani pâli tauki ba bui pibia, kan Dawan bui baku aisin sa.’

¹² “Bamna man mahka wamtla ra tawi was. Bara tawan ra minam nan taima ba ra, tukta ba prubia.

¹³ Bara Israel aiska ba ini yauhbia bara biki sin banhbia; kan Jeroboam kiamka tila wina, baha baman bikan kabia, kan witin baman diara yamni kum daukan sa Israel Dawan Gâdka mawanra, Jeroboam watla bilara.

¹⁴ Bamna Dawan bui king kum bukbia Israel aiska purara. Jeroboam yua ra, watla uplika nani ba sauhki tikan kabia. Naiwa wina ai kainara, baha daukan kabia.

¹⁵ Dawan mita Israel ba singban kabia, lî aubra nani bui yauhrus dusa ra muni ba baku. Bara Israel ba, naha tasbaya yamnikira ai damika nani ra yan kan ba wina lulki sakan kabia, bara yakaban kabia Éufrates wina kau laihura, kan gâd bahki Astarté lilka daukan bara Dawan kupia sauhkan bamna.

¹⁶ Bara Dawan bui Israel ba mihta ra mangkan kabia, Jeroboam saurka tâwan, witinka saura pali daukan bara Israel ra sin yan saura daukaia.

¹⁷ Bara Jeroboam maya buan bara mahka wan, bara Tirsá ra balan. Witin ai watla durka ra nan bal diman wal, tukta ba pruan.

¹⁸ Bara Israel aiska ba pura mata ini banhwan, ningkara bikaia brih wan. Witin ai albika prapit Ahías aisin ba kat takan.

¹⁹ Jeroboam sturka nani ba bara war aiklabanka, witin nahki king aimakan ba, Israel kingka nani sturka ulban wauhkataya ra sut ulbi mangkan sa.

²⁰ Jeroboam king aimakan ba lika mani 22. Witin pruan bara ai watlika ra ai luhpia Nadab king aimakan.

Roboam Juda ra king aimakan ba

²¹ Salaman luhpia Roboam ba Juda ra king aimaki kan, mani 41 bri kan ba ra. Witin Jerusalem ra 17 mani king aimakan, baha sika tawan kum Dawan mita bâk sakan tawanka ba, bahara witin ai nina bâra kaia. Roboam yaptika nina ba Naamá, Amón wina kata.

²² Sakuna Roboam Dawan nakra ra saura daukan, kupia sin sauhkan, ai damika nani wal, kau mapara saura daukan.

²³ Kan witin nani sin gâd bahki nani watla paskan, walpa nani bara dus playa kutbanka nani bukan Dawan bahki ra mayunaia dukiara, kiuhsi nani ra, dus tnawa ailal bri nani munhtara sin.

²⁴ Baha tasbaya ra bâra kan, ur waitna bara mairin nani sâtka, bara nisan wala nani saurka lâka nani ba bri, ai gâd bahki ra mayuni kan. Dawan bui Israel luhpia nani mawan wina lulki sakan saurka nani sut alki brih dauki kan.

²⁵ Roboam mani matsip king aimaki kan piua ra, Idsip kingka Sisac ba Jeroboam pura luan;

²⁶ Dawan watla ra diara nani bâra kan ba brin, bara king iwaia watla ra diara nani bâra kan ba sin brin, baku sin Salaman bui kan kahbaika nani gul ni daukan ba sut sin brih wan.

²⁷ Bara baha watlika ra, Roboam bui bras ni kaina kahbanka nani daukan, bara suldiar nani lalka nani ra yan, baha nani ba king watla durka main kaiki kan bamna.

²⁸ Ani piua ra king ba Dawan watla ra dimi wi kan ba ra, suldiar nani bui brih wi kata. Ningkara kli rumka ra bri si swi kan.

²⁹ Roboam sturka nani bara dîa witin daukan nani sut ba lika, Juda kingka nani sturka ulban wauhkataya ra sa.

³⁰ Bara Roboam lika Jeroboam wal piua bani war aiklabi kan.

³¹ Bara Roboam ba pruan ba ra, ai damika nani raitika ra bri si bikan, Debit Tawanka ra. Ai yaptika nina Naamá, Amón wina kan. Bara ai watlika ra ai luhpia Abiam king aimakan.