1 King Nani 13 - DAWAN BÎLA AISKA

Jeroboam altarka bapi ba mapara prapit aisin ba

¹ Jeroboam ba Betel ra kîa yamni dauki dukia nani altar purara angki kan, bara Dawan mita prapit kum blikan Juda wina Betel ra;

² bara Dawan adarka ba mita, ai bîla baikra karna wal altar ba mapara aisin: “Altar, altar: Dawan naku wisa: ‘Debit kiamka wina tukta waitna kumi aisubi takbia, ai nina ba Josías mâkbia, idan nani ai pura suni ba watla ra prîs nani bâra ba witin mita baha nani ba man puramra sakripais daukbia, man puramra kîa yamni ba sin angkbia, upla dusa nani sin witin bui man puramra angkbia.’ ”

³ Bara baha sim yua, prapit ba sain diara aihka kum daukan, bara win: “Naha sika sain aihka daukaia Dawan maisa pakan ba, bara altar ba kriki yuya baman daukan kabia bara yamhpuska purara ba aihka aihka sakan kabia.”

⁴ Bara king Jeroboam ba Gâd waitnika bîla baikra sut walan, witinka Betel ra altar ba mapara karna aisin ba. Bara altar pura ba wina ai mihta sakbi win: “¡Witin ba alki silak ra mangks!” Sakuna witinka mapara ai mihta sakban ba kat karna takan, bara kli sip kruskras kata.

⁵ Baha minitka ra altar ba tartar baiwi yuya baman takan, bara yamhpuska nani bahara kan ba pâli lap tiwan, Gâd waitnika bîla wina dîa adarka aisin ba kat takan.

⁶ Bara king ba Gâd prapitka ra win: —Mamkabisna, Dawan Gâdkam ra yang dukira pura suni makama, baku mika mihti na kli yamni takbia. Bara prapit Dawan ra ai pura sunan, bara king mihta ba kli yamni takan pas kata baku.

⁷ Bara king ba Gâd prapitka ra win: —Bal yang wal waitla ra bâra plun piaia, bara prisantka kum maikamna.

⁸ Sakuna prapit ba king ra win: —Wamtla bakriki prais aikaia wima sin, sip man wal wamna apia, plun sin pimna apia, lî sin dimna apia naha pliska ra;

⁹ kan Dawan baku ai win: ‘Plun pima apia, lî sin dima apia, yabalkam auma ba bâk sin balpara.’

¹⁰ Bara prapit ba yabal walak kli mahka wan, bara Betel wina balan yabalka bâk kli waras kata.

¹¹ Bamna Betel ra prapit almuk kum iwi kata, baha luhpia nani balan bara Gâd prapitka Betel ra dîa daukan ba sut win, bara king ra dîa bîla nani aisi win ba sut sin ai papika ra win.

¹² Bara ai aisika witin nani ra makabi walan: —¿Ani yabalka bâk impakata? Bara luhpia waitna nani ba bui marikan, ani yabalka bâk Gâd prapitka Juda wina balata ba wan ba.

¹³ Bara witin ai luhpia waitna nani ra win: —Biriku ba nina palki aik. Bara witin nani biriku ba nina palki yan, bara witin uli,

¹⁴ Gâd prapitka Juda wina ba ninara wan. Bara kaikan usupum dusa kum mununhtara iwi kan, bara win: —¿Man ki Gâd waitnika Juda wina balan ba? Bara witin win: —Yang sika.

¹⁵ Bara win: —Bal yang wal, waitla ra plun pis.

¹⁶ Sakuna prapit Juda wina ba win: —Man wal sip wamna apia, wamtla ra sin dimamna apia, baku sin naha pliska ra plun pimna apia, lî sin dimna apia,

¹⁷ kan Dawan ba param pali ai win: ‘Bahara man brit pipara, lî sin dipara, yabalkam auma bâk sin kli tawpara.’

¹⁸ Bara almuk ba kli kli aisi kan: —Yang na sin man wal baku prapit kum sna, bara insal kum Dawan blikan, yang ra ai win: ‘Man bui witin ba wamtla ra bri bal, baku mika plun pibia, lî sin dibia.’ Baku prapit ba kunin munan.

¹⁹ Bara prapit Juda wina ba witin wal wan, bara ai watla ra plun pin, lî sin din.

²⁰ Bara witin nani wâl kau tibil ra kan piua ra, Dawan ba prapit almuk bâk sturi aisata, Juda wina prapitka ra munan kli tawi balan ba ra.

²¹ Bara Gâd prapitka Juda wina balan ba ra almuk ba bui bîla baikra karna wal naku wisata: —Man Dawan mai win ba kat daukras kapram, dîa lâka maikan ba pura luram Dawan Gâdkam adarka ba wali daukras, kapram,

²² man ban kli tawram bara plun piram, lî sin diram ba, Dawan bui mai win kan man baha pliska ra plun pima apia, lî sin dima apia, baha sut tâka mita man wînam tara ba damikam nani raitika ra mai bikan kabia apia.

²³ Bara prapit Juda wina ba, plun pin bara lî sin din ba ningkara, prapit almuk ba bui biriku kum munhta palki yan,

²⁴ bara witin mahka impakan. Yabal ra auya kan ba ra layan kum takan, bara witin ba ikan. Ai wîna tara ba yabal ra prawi kan, witin ai lamara biriku ba bûi kan, layan ba sin pruan ba lamara kan.

²⁵ Baha pliska bâk upla kum kum lui kan, bara witin nani kaikan wîna tara yabal ra prawi kan ba, bara layan kum sin witin pruan ba lamara kan ba. Bara kaiki banhwan uplika nani bui prapit almuk ra wih win, dîa kaikan ba.

²⁶ Prapit almuk ba wali win: “Baha ba Dawan prapit Juda wina kata ba sa. Kan witin Dawan bîla lulkan, baku bamna Dawan bui layan mihta ra mangkan pîs ra baman daukan, Dawan witin bui dîa win ba kat takan.”

²⁷ Bara ai luhpia nani ra win biriku kum nina palki yabia, bara witin nani baku daukan.

²⁸ Bara prapit almuk ba taki wan, bara wîna tara ba yabal ra prawi kan sakan, biriku bara layan nani ba sin lamara kan, layan ba bui wîna tara ba piras kan, baku sin biriku ba ra sin watawi munras kan.

²⁹ Bara prapit almuk ba bui Gâd prapitka Juda wina pruan ba wîna tara ba brin, bara biriku ra suni brih ai tawanka ra brih balan, bara sarka tara brih naha ba bikan.

³⁰ Witin ai raitika pali ra bikan, bara pura mata ini win: “¡Alai, muihki!”

³¹ Bikan ba ningkara, ai luhpia nani ra win: —Yang pruamna taim, wîni tara ba biks Gâd prapitka bikan ba raitika lamara.

³² Kasak pali, piua balbia ba ra, aimakbia Dawan bîla aisin ba Betel altarka bâra ba mapara, gâdkas nani Sameria tawanka ra ai purara sunaia watla nani mâkan ba mapara aisin ba sin.

³³ Baha sut purkara, Jeroboam ai yabalka saura ba sip swiras kata, kau ban prîs nani mangki gâd bahki ra pura sunaia dukiara, witin yaura mangkaia lukan uplika ra, witin mita yaura yamni luki ba prîs nani mangki kan.

³⁴ Bara Jeroboam naha saurka daukan ba mita, ai kiamka nani bara witin sin tasba wina âpu daukan.