1 King Nani 12 - DAWAN BÎLA AISKA

King tasbaya ba baiki sakan

¹ Roboam Siquem ra wan, Israel luhpia nani sut bahara aidruban kan ba mita, king mangkaia dukiara.

² Bara ban kan Jeroboam, Nabat luhpia ba walan baha piua witin kau Idsip ra kan, witin bahara plapan kata king Salaman sîa, bara bahara takaski kan.

³ Bara blikan Jeroboam ba paiwaia, bara witin ba balan, bara Israel luhpia nani asla takan kan ba sut bui Roboam ra aisi, bara win:

⁴ —Papikam lâka ba uba karna pali kan; bamna nanara man papikam lâka ba wirâ swapni dauks, bara karban wirha wan purara wan sunan ba wina sin, bara yang nani lika man dukiam dauki banhwamna.

⁵ Bara Roboam pana win: —Man nani was, bara yu yumhpa lubia ba ra, kli aidrubi bal. Bara upla nani ba mahka wan.

⁶ Bamna king Roboam bui kupia kraukanka makabi walan ai papika Salaman kau raya kan ba piua ra, almuk nani ai mawanra bri kan ba ra sin makabi walan: —¿Dîa kupia kraukanka yang ra aiki banhwisma naha uplika nani ra wiaia?

⁷ Bara witin nani Roboam ra aisi, win: —Man naiwa naha uplika nani warkka dadaukra takaia, witin nani warkka yamni daukaia kaka, witin nani ra bîla yamni nani aisas bara witin nani warkkam dauki ban kabia.

⁸ Sakuna witin lika almuk nani kupia kraukanka yan ba tnaya ra lakan, bara witin wal pâwan wahmika nani wina kupia kraukanka makaban, bara baha nani ai mawanra banhwi kan.

⁹ Baha nani ra makabi walan: —¿Dîa kupia kraukanka yawan yabia naha uplika nani ra, kan witin nani isti ai munisa dîa wiaia sna ba, karban wirha aisiki mita yabi kan dukiara?

¹⁰ Bara wahma nani witin wal pâwan nani ba bui pana aisi, win: —Naku aisas naha uplika nani ra, naha bîla nani witin nani mai wibia taim: ‘Papikam mita karban wan sunan ba, man mita wi ra mâyara iks; man naku aisi wis: Papiki ba karna kan kaka, yang lika man nani ra kau karna kamna;

¹¹ papiki karban wirha mai sunan ba, yang lika karbanka ba kau wirha mai sunamni; aisiki bui wipaia kiwka ni mai wipi kan, sakuna yang lika silak kakma tatwa ni mai wipamni.’

¹² Yu yumhpa alkan ba ra, Jeroboam upla nani sut wal Roboam ra aidrubi balan, king piua win ba kat, witin nani yu yumhpa kat witin ra kli aidrubi balbia.

¹³ Bara king ba upla nani ra karna pali aisin, witin almuk nani mita kupia kraukan yan ba aisaras,

¹⁴ bara wahma nani mita kupia kraukanka yan ba saki upla nani ra aisi, win: “Papiki mita karban wirha mai sunan ba, yang mita karban kau wirha mai sunamna, papiki mita wipaia kiwka ni mai wipan ba, yang bui mai wipaisna wipaika tâura ayan tatwa nani wilki muni.”

¹⁵ King ba upla nani bîla walras kan, baha ba Dawan bui pat baku daukan kan, Dawan ai bîla ba kat daukaia prapit Ahías, Siló wina bâk aisin ba, Jeroboam Nabat luhpia ba dukiara.

¹⁶ Israel luhpia nani sut kaikan king ba witin nani ra walras kan, bara pana naha bîla nani win: “¡Yang nani lika Debit wal diara daukaia âpu! ¡Jesé luhpia prapatika ba wal yang nani diara âpu! ¡Israel luhpia nani, wamtla ra was! ¡Bara Debit lika ai watla uplika ba main kaikbia!” Bamna Israel luhpia nani sut mahka ai watla nani ra wan.

¹⁷ Bara Roboam lika Israel luhpia nani Juda ra kan nani ba kingka ban aimaki kan.

¹⁸ Bara king Roboam bui Adoram ba blikan wan, Israel kiamka nani warkka pura kakaira kan ba sin blikan wan, sakuna Israel luhpia nani mita witin ba walpa ni sabi ikan. Bamna king Roboam pat pali war waginka kumi ra aimaki Jerusalem ra plapan.

¹⁹ Bara baku sika Israel luhpia nani ba Debit watla mapara bûi, dakwi takan ba naiwa yua ba kat.

²⁰ Bara baku kan, Israel luhpia nani sut bui walan Jeroboam ba kli tawi balan sapa, witin ba paiwi brih balan upla nani mawanra, bara witin ba Israel aiska kingka mangkan, kiamka kumi sin swiras kata Debit watla uplika nina blikaia, Juda kiamka baman lika.

²¹ Bamna Roboam Jerusalem ra balan ba ra, Juda watla uplika nani bara Benjamín kiamka nani sut asla daukan wina waitna nani 180,000 sakan bara war uplika nani baku ridi daukan, Israel watla uplika nani mapara war aiklabaia, king lâka ba kli laki yaia Salaman luhpia Roboam ra.

²² Sakuna Dawan bîla ba Gâd waitnika Semaías ra balan, bara win:

²³ “Salaman luhpia Roboam Juda kingka ra wis, bara Juda watla uplika nani sut ra bara Benjamín kiamka ra, baku sin upla wala nani sut ra,

²⁴ Dawan naku aisin sa: Man nani wapara, muihkam Israel luhpia nani mapara aiklapara, man nani kumi bani kli wamtla ra taws, kan naha diara na yang mita daukri sa.” Bara witin nani Dawan bîla ba walan, bara kli tawi mahka wan, Dawan bîla win ba kat.

Jeroboam bui aidul lâka ba bapisa

²⁵ Bamna Jeroboam Siquem tawanka ba kli paskan, baha lika Efraín ilka nani ra, bara witin bahara iwan. Bara Penuel ba sin kli paskan.

²⁶ Sakuna Jeroboam lukan: “Debit watla uplika ba sip sa king lâka ba kli tawi briaia,

²⁷ naha uplika nani Jerusalem ra wabia kaka Dawan tempelka ra sakripais daukaia. Ban kra uplika nani na sip sa Roboam, Juda kingka ra tawaia, bamna yang ra ai ikbia bara Roboam ra tawi banhbia, witinka Juda kingka ba.”

²⁸ Bara aisinka kum daukan ba ningkara, king ba bui gul ni bîp lilka wâl daukan, bara upla nani ra win: “Man nani uya pali Jerusalem ra impaki wisma. Kaiks nâra sa man nani gâdkam nani ba, witin nani bui sika Idsip wina mai saki brih balan ba.”

²⁹ Bara Betel ra kum, wala ba Dan ra mangkan.

³⁰ Bara naha tâka mita sika upla nani ba saura daukata, kan upla nani ba Betel ra bara Dan ra wi kan baha nani ra ai pura suni mayunaia.

³¹ Idan nani ai pura sunaia watla nani sin mâkan, upla nani ba tila wina prîska nani sin mangkka, baha nani ba Libai daknika nani wina apia kan ba.

³² Baha purkara, witin bui lilia tara piua kum mangkan kati 8 aimaki yua 15 ra, lilia tara Juda ra lilia tara dauki ba baku daukaia, bara king pali bui altarka purara sakripais nani daukan. Naha lika Betel ra daukan, bîp lilka nani paskan ba ra sakripais nani yabi, bara prîs nani sin ai warkka ra mangkan idan pura sunra pliska nani paskan ba dukiara.

³³ Baku bamna, kati 8 aimakan yua ba sin 15 ra, sakripaiska ba altarka purara Jeroboam bui daukan Betel ra, gâd bahki ra mayunaia dukiara. Baha liliaka sika witin ai kupia ra luki si daukan ba, witin dîa want ba kat, bara Israel luhpia nani ai pura suni kaia yua kum piua yaia, baha katka bara baha yua altar ra bal kîa yamni angki yan.