1 King Nani 11 - DAWAN BÎLA AISKA

King Salaman gâd bahki nani ra ai pura sunisa

¹ Sakuna king Salaman king fero luhpia mairin ra latwan kaikan, ba wina tringsar mairin wala nani ra sin latwan kaikan: Moab, Amón, Edom, Sidón bara hitita mairka nani ra.

² Baha uplika nani sât dukiara sika Dawan bui Israel luhpia nani ra win kan ba, baha mairka nani wal bribia apia, kan mairka nani ba mita munka gâd bahki nani ra ai kupia ba yaka tniwbia. Sakuna baha mairka nani ra sika Salaman bui latwan kaiki aikuki wal asla takan.

³ Bara ai maya baman 700 bri kan king watla ra, bara tnaya ra ai mairka nani, wibia kaka ai lilika mairin nani ba 300 bri kan; bara naha mairka nani tâka sika witin ai kupia ba Gâd wina tnaya ra lakan kan ba.

⁴ Bara Salaman ba pat almuk takan kan, bara ai mairka nani bui munan ai kupia laki gâd bahki nina blikan, baha mita ai kupia aiska ba Dawan ai Gâdka ra yaras kan, ai papika Debit daukan ba baku.

⁵ Salaman lika Sidón nani gâdka bahki Astarté ra nina blikan, baku sin Milcom, Amón uplika nani gâdka saura pali kulkan ba ra sin nina blikan.

⁶ Bara Salaman daukanka ba Gâd bui saura pali kaikata, kan witin ai aisa Debit baku Dawan nina kasak pali blikras kan.

⁷ Baha yua nani ra Salaman utla kum mâkan, Jerusalem lalma tani, unta tilara aidul bahki Quemós ra mayunaia; baha ba Moab uplika nani aidulka kan, baku sin Moloc ra, naha lika Amón uplika nani gâdka bahki kan ba.

⁸ Baku ai mairka tringsar nani ra dauki yan, bara mairin nani ba bui kîa yamni angki yabi kan, baku sin sakripais nani dauki yabi kan ai gâdka bahki nani ra.

⁹ Bara Dawan, Israel Gâdka, Salaman mapara ai kupia sauhkata, kan witin wina ai kupia ba tnaya ra lakan bamna, kainara Dawan ba Salaman ra aima wâl pali latan takata,

¹⁰ bara naha pali dukiara sika witin ra maisa pakan ba gâd bahki nani nina blîkbia apia, sakuna Salaman lika Dawan dîa win ba witin kulkras daukan.

¹¹ Bara Dawan bui Salaman ra win: “Naha man daukisma ba, wal lâ daukan ba wina bara yang dîa lâika maikri ba kulkras takram ba mita, man wina king lâka ba sakuna bara upla wala kum man dukiam dauki kata ra yabuna.

¹² Ban sakuna, man kau raya sma yuam ra baha daukamna apia, papikam Debit latwanka ra, sakuna luhpiam mihta wina dakbi sakamna.

¹³ King lâka aiska ba dakbi sakamna apia, kiamka kum mihta ra swimni, Debit albiki ba latwanka ra, bara Jerusalem latwanka ra sin, kan baha ba yang mita bâk sakri sa bamna.”

¹⁴ Bara Dawan bui Salaman waihla kum bukan, Hadad, Edom wina ba king kiamka wina kan, witin ba sin Edom uplika kan.

¹⁵ Debit Edom ra pura luan ba piua ra, Joab suldiar nani wihtka tara ba balan upla pruan nani ba bikaia. Bara baha piua Edom ra waitna nani kan ba sut ikan kata,

¹⁶ kan kati 7 Joab bahara takaski kan, bara sin Israel luhpia nani ba, baku sika Edom waitnika nani sut âpu daukan ba.

¹⁷ Sakuna Hadad ba plapan witin aikuki, Edom uplika nani, ai papika albika nani kan ba kum kum sin. Witin nani Idsip ra wan; baha piua ra Hadad ba kau tuktan sirpi kan.

¹⁸ Bamna Madián wina taki banhwan, bara Parán ra balan; bara witin mani wal Parán waitnika nani sin brih, Idsip kingka fero ra balan, witin nani ra utla yan bara plun sin, baha purkara tasba sin yan.

¹⁹ Bara Hadad ra king fero uya yamni kaikan, bara ai masaya wal maya baikan, kwin mairin Tahpenés muihnika ba.

²⁰ Bara Tahpenés muihnika ba luhpa waitna kumi baikan nina ba Guenubat mâkan, Tahpenés bui yan tiala dakakan king fero watla ra, bara Guenubat ba king fero watla ra kan, king fero luhpia nani aikuki.

²¹ Sakuna Hadad Idsip ra walan Debit ba Joab war wihtka wal ba pruan, bara Hadad bui king fero ra win: —Ai swis tasbayi ra mahka wamna.

²² King fero pana win: —¿Dîa muni? ¿Yang wal sma na, dîa mapara kau luha sma ki, bara kli tasbayam ra waia ai wisma? Bara pana win: —Diara luha apia sni; diara kumi mamkabisna ba sika, ai swis tasbayi ra wamna.

²³ Gâd bui Salaman mapara waihla kumi bukan, baha ba Rezón Eliadá luhpia waitna ba; witinka ai dawanka Hadad-ézer wina plapan kan, Sobá kingka ba wina.

²⁴ Bara witin ba upla nani asla daukan, bara âimplikra daknika kum lalka aimakan, bara Debit bui Sobá uplika nani ba âpu daukan. Baha ningkara, Damaskus ra wih bahara takaskan, bara witin ba Damaskus ra king aimakan.

²⁵ Bara Salaman yua nani sut ra, Israel luhpia nani wal ai waihla kata. Hadad mapara diara saura kum ba sika, witin bui Israel luhpia nani ra misbara kaiki kan, bara baku natka ra Rezón ba Siria ra king aimakan.

²⁶ Baku sin Jeroboam, Nabat luhpia, Efraín Seredá wina ba Salaman albika kan ba, witin yaptika nina ba Serúa, piarka mairin kata, witin ai mihta king mapara bukan.

²⁷ King mapara Jeroboam buan ba naha tâwan sa: Salaman lika tasba yakabi daukan pliska ba paski kan, bara ai papika Debit Tawanka ra dimaia untika pîska kum ba sin praki kata.

²⁸ Bara Jeroboam ba waitna kupia karna kan, bara sin karnika ailal bri kan; Salaman mita kaikan wahma na wark tatakra waitnika sa, bara Josep kiamka aiska ba witin mihta ra mangkan.

²⁹ Bamna baha yua nani ra, Jeroboam b, Jerusalem wina taki auya kan, witin yabal ra prapit Ahías, Siló wina ba wal prawan; bara witin ba prâk tara raya pali kumi ni ai pura prakan kan, baha piua upla âpu kan, witin wâl baman twi ra kan.

³⁰ Bara Ahías baha prâka tara raya pali ai pura praki kata ba, pîs 12 ra kalkan,

³¹ bara Jeroboam ra win: “Pîs matawalsip ba man bris, Dawan Israel Gâdka ba naku wisa: ‘Bara kaiks, yang Salaman kingka lâka ba dakbri sakuna man ra kiamka matawalsip maikuna.

³² Bara Salaman ra kiamka kumi baman yabuna, Debit albiki ba latwanka ra, bara Jerusalem latwanka ra sin. Baha tawanka ba yang bui bâk sakri, Israel kiamka sut ba tila wina.

³³ Witin bui yang ba ai swin bara Sidón nani gâdka Astarté ra ai pura suni mayunan, Moab uplika nani gâdka Quemós ra, bara Amón uplika nani gâdka Moloc ra sin. Bara yabalki nani ra wapras, diara wapni daukras naikra nani ra, bara lâika bîla nani sin kulkras, ai aisa Debit daukan ba baku.

³⁴ Ban sakuna, king lâka ba bara dîa dîa sin ai mihta ra ba wina kumi sin sakamna apia, ban swirka king baku bâra kabia ai rayaka aiska ra, yu nani sut ra sin, Debit albiki ba latwanka ra, witinka yang bui bâk sakri ba. Bara witin sin lâika bîla nani bara dîa lâ mangkri ba sin lulkan.

³⁵ Sakuna king lâka ba ai luhpia mihta wina sakamna bara man ra maikamna, baha taya matawalsip ba kingka kaia.

³⁶ Bara ai luhpia ra kiamka kumi yabamna, baku mika albiki Debit ba maiwanra piua bani ingni kumi kabia Jerusalem ra. Baha tawanka yang bui bâk sakri ba, nini bahara swiaia ba mata.

³⁷ Bamna yang bui man ba mai saki brimna bara king aimakma, dîa man brin mai dauki kabia ba sut purara king kama Israel ra.

³⁸ Bara dîa mai wimna ba aman walma kaka, yabalki nani kat sin tauki kama kaka, naikra nani ra diara wapni ba kat daukma kaka, bara lâ nani mangkri ba bara lâika bîla nani ba alki kama kaka, albiki Debit daukan ba baku, yang lika man wal kamna bara utla kumi ban kaia ra bapi maikamna, bara sin Israel ba mihtam ra mangkamna.

³⁹ Bara yang bui naha tâwan Debit watla uplika nani ra klala yamni ban kaia ra lika apia.’ ”

⁴⁰ Baha mita Salaman bui trai munan Jeroboam ikaia; sakuna Jeroboam Idsip ra plapan, bahara Sisac king aimaki kan, bara witin bahara takaskan Salaman pruan ba kat.

Salaman pruanka ba

⁴¹ Salaman sturka nani bara dîa dîa sut daukan ba, bara ai sinska lâka ba sut lika, Salaman sturka ulban wauhkataya ra bâra sa.

⁴² Salaman Jerusalem ra Israel luhpia nani sut purara king aimakan 40 mani.

⁴³ Bara Salaman pruan ba ra, Debit Tawanka ra bri si bikan, baha lika aisa. Ningkara ai watlika ra ai luhpia Roboam king aimakan.