1 King Nani 10 - DAWAN BÎLA AISKA

Sabá kwinka Salaman kaikaia balan ba

¹ Sabá kwinka ba walan nahki Salaman nina ba ban tara pali kulkan ba Dawan mawanra mayunra tara pali sa, bara kwin ba Jerusalem ra balan, makabanka karna nani brih balan, Salaman ra makabi wali traika kaikaia dukiara.

² Kwin ba balan upla kutbi kir nani aikuki, ai prana daukanka tara aikuki, diara sâtka ailal sin kiamil ra suni brih balan, isint kîa pain nani bara gul klauhi ba, pranakira sin ailal brih balan. Witin Salaman ra balan ba ra, dîa dîa makabi walaia bri kata ba sut makabi walan, ai kupia ra bri kan ba sut sin win.

³ Bara ai makabanka nani sut tânka nani ba Salaman bui saki win, diara âpu kan king bui tânka sip wiras kaia ba.

⁴ Bara Sabá kwinka bui Salaman sinska tânka aiska ba kaikan, utla mâkan ba sin,

⁵ ai pata piaika ra plun nani pi kan ba, wihtka nani dimaika watla ba, wain tibil ra kahbi nani ba, ai dukia dadaukra nani prâka dimra nani ba, tâ uplika nani ba, bara wîna aiska Dawan watla ra angki kan ba sut kaikan, bara witin tâ iwan.

⁶ Witin king ra win: “Kasak pali, tasbayi ra man diara sut daukisma walri ba, man dukiam nani brisma ba bara sinskam lâka tara brisma ba sin walri baha sut ba kasak sa.

⁷ Yang pali bui kasak lukras kapri, sakuna nahara balri ba kat, yang kaikisni baha ba bakriki sin ai wiras kan; sinskam lâka ba tara pali sa, bara yamni sa, sturkam yang walri ba wina kau pura luan sa.

⁸ ¡Nahki lilia sa mairkam nani ba, bara dukiam dadaukra nani ba sin lilia ai dara walisa, baha nani man wina sinskam lâka wali ba!

⁹ ¡Dawan Gâdkam ba yamni pali kabia, witin aitani lukan ba man ba Israel king iwaika ra iwaia! Kan Dawan lika piua bani ra Israel ra latwan kaikisa, bara man ba king mai mangkan sa, lâ wapni bara kasak kat daukaia.”

¹⁰ Bara kwin ba mita king ra yan gul 5 ton bahmuna, isint kîa painkira bara diara sâtka ailal pali, walpa manakira nani, kau aima kumi sin baku isint nani briras kata, Sabá kwinka bui Salaman ra yan ba.

¹¹ Hiram dwarka tara Ofir wina gul brih balan, baku sin dus painkira bara walpa manakira nani sin.

¹² Bara dus painkira nani brih balan ba wal, king mita Dawan tempelka barandika ba paskan, bara baku sin king watla, bara sin arp sâtka nani paskan ba sin miusik pulaia. Upla kaikras baha dusa painkira nani brih wan baku naiwa kat.

¹³ Bara king Salaman bui Sabá kwinka dîa makabi walan nani dauki kan ba, sut pali win. Baha purkara, Salaman witin mita sin kau prisant yan. Bara kwin ba mahka wan ai albika nani aikuki ai tasbaya ra.

Salaman yuyaka bara prana ba sin

¹⁴ Mani bani Salaman gul ai mihta ra alki kan ba sika 25 ton, naha tilara kulkras kan

¹⁵ diara wauhi atki uplika nani wina lal man aibapi kan ba lalahka nani, baku sin Arabia kingka nani bara baha tasbaya ra wihta tara nani ba wina sin lalah bri kan ba kulkras kata.

¹⁶ Ningkara king Salaman blikan, gul ni kaina kahbaika tara nani 200 paskan, kaina kahbaika kumi bani ba ai mana taki kan gul 15 paun nani.

¹⁷ Baku sin kaina kahbaika sirpi nani 300 paskan gul ni, kumi bani ai mana tikan kan gul 4 paun nani. Bara king watla kum nina ba ‘‘Líbano Ilka’’ mâki kan ba ra bri si swin.

¹⁸ Bamna Salaman king iwaika tara kum elepant napa ni daukan, bara win baha ba gul pali wal pura ba lalaubaia.

¹⁹ King iwaika ba mina mangki ulaika 6 daukan, mina kahbaika ba wina krukma baku daukan kata, bara klahkla wâl daukan kan ai mihta mangkaika, bahara layan lilka wâl sin paski mangkan bûi kan.

²⁰ Bara mina mangki ulaika tnaya ra 12 layan nani lilka dauki mangkan bûi kan. King nani aimakan ba, kumi sin nahmuna yaban paskras kan.

²¹ Baha purkara kâp nani Salaman bri kan ba sut, gul ni daukan kan. Bara baku sin, king watla ra plun piaia dukia nani bri kan ba sut, gul ni daukan baman kan, baku sin tibil ra, kitsin dukia nani sut “Líbano Ilka’’ ra watla bilara nani kan ba sin. Silbar ni daukan dukia nani ba âpu kan Salaman piua ra, silbar ba uya kulkanka âpu kan ba mita.

²² Kan sîp tara nani king bri kan ba Tarsis wina bali kan, mani yumhpa bani aima kum, Hiram sîpka nani ba wal. Bara brih bali kan gul, elepant napa, ruskika nani bara pikak nani sin.

²³ Bara baku king Salaman ba kau tara taki kata king wala nani sut purkara, yuyaka lâka mapa ra bara sins lâka mapa ra sin.

²⁴ Upla nani ba brin dauki kan Salaman ra kaikaia, bara sinska lâka Gâd mita yan ba sin walaia.

²⁵ Bara witin nani sut wina mani bani diara nani, silbar, gul, prâk nani, aiklabaia dukia nani, kîa painkira nani, aras bara muyul nani sin bri sal ai prisantka yabi kan.

Salaman ba wagin bara aras nani ba bisniska daukisa

²⁶ Bara Salaman ba wagin bara aras âiulra nani ba sut asla daukan, asla sut bri kan ba 1,400 wagin nani, aras âiulra nani ba 12,000 kan. Baha nani sut ba wagin nani watla ra blikan, baku sin king suldiarka nani Jerusalem ra bâra sin blikan.

²⁷ Bara king ba Jerusalem ra yan silbar walpaya baku kan, bara yalam dusa ba lika kwah damni dusa twi ra ba baku yan pâwi kan.

²⁸ Bara Salaman araska nani ba, Musri bara Cilicia wina brih bali kan, bara diara wauhi âiatkra nani ba baha kat atki kan.

²⁹ Bara wagin kum Idsip wina brih balan ba mana silbar mâ 600, aras kum mana ba sin 150 kulkan. Bamna hitita kingka nani bara Asiria uplika kingka nani ba, Salaman uplika nani wina naha dukia nani ba atki kan.