زبور 52 - Muslim Sindhi Bible

دغاباز زبان

(استاد موسيقار لاءِ. دائود پنهنجو هي زبور تڏهن چيو جڏهن دوئيگ ادوميءَ وڃي سائول کي ٻڌايو تہ ” دائود اخيملڪ جي گھر ۾ داخل ٿيو آهي.“)

¹ اي زورآور ظالم! تون بڇڙائيءَ تي ڇو ٿو فخر ڪرين؟ جڏهن تہ رڳو خدا جي رحمت ئي دائمي آهي.

² تنهنجي زبان بڇڙائيءَ جا منصوبا پيئي جوڙي. اها پاڪيءَ جيان تکي آهي ۽ دغابازيءَ سان پيئي هلي.

³ تون ڀلائيءَ کان وڌيڪ بڇڙائيءَ کي پسند ڪرين ٿو. هائو، تون سچ کان وڌيڪ ڪوڙ کي پسند ڪرين ٿو.

⁴ اي دغاباز زبان وارا! تون ظلم واري ڳالهہ ٻولهہ ڪرڻ کي پسند ٿو ڪرين.

⁵ تنهنڪري خدا تو کي هميشہ جي لاءِ برباد ڪري ڇڏيندو. هو تنهنجي گھر مان تو کي پڪڙي ڪڍي ٻاهر ڦٽو ڪندو، بلڪ دنيا منجھان ئي تنهنجي پاڙ پٽي ڪڍندو.

⁶ سچار ماڻهو تنهنجو حال ڏسي عبرت حاصل ڪندا. پوءِ اهي تو تي کلندا ۽ تنهنجي لاءِ هيئن چوندا تہ

⁷ ”ڏسو، هي اهو ماڻهو آهي، جنهن خدا کي پنهنجي پناهہ‌گاهہ نہ بڻايو، بلڪ پنهنجي گھڻيءَ دولت تي ئي ڀروسو رکيائين، ۽ پنهنجي بڇڙائيءَ ۾ پڪو ٿي ويو.“

⁸ پر آءٌ خدا جي گھر ۾ زيتون جي سرسبز وڻ وانگر آهيان. منهنجو ڀروسو هميشہ تائين خدا جي دائمي شفقت تي آهي.

⁹ اي خدا! تو جيڪي ڪجھہ ڪيو آهي، تنهن لاءِ آءٌ تنهنجو سدائين شڪرگذار رهندس. آءٌ تنهنجي نيڪ بندن جي اڳيان تنهنجي چڱي نالي جي تعريف پيو ڪندس.