زبور 24 - Muslim Sindhi Bible

جلال واري بادشاهہ لاءِ گيت

(دائود جي زبورن ۾ شامل)

¹ ڌرتي ۽ ان جون سموريون شيون خداوند جون آهن. هائو، هي جهان ۽ ان جا رهاڪو سڀ خداوند جا ئي آهن.

² هن سمنڊن جي تري تائين زمين جو بنياد رکيو آهي، بيشڪ هن انهيءَ کي بحرن جي مٿان قائم ڪيو آهي.

³ اهي ڪير آهن، جيڪي خداوند جي جبل مٿان چڙهي سگھندا؟ اهي ڪير آهن، جيڪي سندس مقدس هيڪل ۾ حاضر ٿي سگھندا؟

⁴ رڳو اهي ئي اهو سڀ ڪري سگھندا، جن جا هٿ صاف ۽ دل پاڪ آهي، جن باطل سان دل نہ لڳائي آهي، نڪي وري ڪوڙو قسم کنيو اٿائون.

⁵ بيشڪ اهي ئي پنهنجي خداوند کان برڪت لهندا، ۽ پنهنجي ڇڏائيندڙ خدا طرفان بي‌ڏوهي قرار ڏنا ويندا.

⁶ هي اهي ئي ماڻهو آهن جيڪي خدا جا طالبو آهن، هائو، جيڪي يعقوب جي خدا جي ديدار جا طالبو آهن.

⁷ اي هيڪل جا دروازؤ! اوهين پنهنجا سردر مٿي ڪريو. هائو، اي قديم دروازؤ! اوهين بلڪل اوچا ٿيو، تان‌تہ جلال وارو بادشاهہ اندر اچي.

⁸ هاڻ اهو جلال وارو بادشاهہ ڪير آهي؟ اهو خداوند ئي تہ آهي جيڪو قوي ۽ قادر آهي. اهو خداوند ئي تہ آهي جيڪو جنگ ۾ زورآور آهي.

⁹ اي هيڪل جا دروازؤ! اوهين پنهنجا سردر مٿي ڪريو. هائو، اي قديم دروازؤ! اوهين بلڪل اوچا ٿيو، تان‌تہ جلال وارو بادشاهہ اندر اچي.

¹⁰ هائو، اهو جلال وارو بادشاهہ ڪير آهي؟ جيڪو خداوند قادرِمطلق آهي سو ئي جلال وارو بادشاهہ آهي.