ايوب 28 - Muslim Sindhi Bible

ڏاهپ جو راز ( 28‏:1‏-28 )

¹ يقيناً چاندي کاڻ مان کوٽي ڪڍي وڃي ٿي، ۽ سون لاءِ بہ ڪا جاءِ آهي جتي ان کي صاف ڪيو وڃي ٿو.

² لوهہ زمين مان کوٽي ڪڍيو وڃي ٿو، ۽ پتل پٿرن مان پگھاري ڪڍيو وڃي ٿو.

³ کاڻيون کوٽيندڙ اونداهيءَ جي اونهي تهہ تائين وڃي پهچن ٿا، هائو، هو ڌرتيءَ جي اونهاين مان پنهنجي آخري وس تائين انهن ڌاتن کي ڳولي ڪڍن ٿا.

⁴ آباديءَ کان پري هو سرنگھون هڻن ٿا، جن کان واٽهڙن جا پير بہ بي‌خبر آهن، هائو، ماڻهن کان پري اهي سرنگھن ۾ رسين تي لهن چڙهن ٿا.

⁵ جنهن زمين مان خوراڪ پيدا ٿئي ٿي، تنهن کي اندران ڄڻڪ باهہ سان اٿلايو پٿلايو وڃي ٿو.

⁶ انهيءَ جي پٿرن ۾ نيلم آهي، ۽ انهيءَ جي مٽيءَ ۾ سون آهي.

⁷ سرنگھہ واري انهيءَ رستي کي ڪوبہ شڪاري پکي ڪين ٿو ڄاڻي، نڪي باز جي اک ئي انهيءَ کي ڏسي سگھي ٿي.

⁸ ڪنهن جھنگلي جانور بہ انهيءَ رستي تي قدم نہ رکيو آهي، نڪي مغرور شينهن ئي انهيءَ مٿان گذريو آهي.

⁹ انساني هٿ سخت پٿر کي بہ ڀڃيو ڇڏين، ايتري قدر جو اهي جبلن کي پاڙن کان اونڌو ڪريو ڇڏين.

¹⁰ هو ٽڪرن مان آرپار سرنگھون ٺاهين ٿا، سندن اکيون هر قيمتي شيءِ کي ڏسي وٺن ٿيون.

¹¹ هو سرنگھون کوٽيندي ندين جي سرچشمن تائين وڃيو پهچن، ۽ لڪل شين کي بہ ٻاهر ڪڍي اچن ٿا.

¹² پر ڏاهپ، هائو، ڏاهپ ڪٿان کوٽي ڪڍي سگھجي ٿي؟ دانائي آخر هوندي ڪٿي آهي؟

¹³ ڪوبہ انسان انهيءَ جو قدر ڪين ٿو ڄاڻي، نڪي اها جيئرن جي هن دنيا مان حاصل ڪري سگھجي ٿي.

¹⁴ بحر چوي ٿو تہ ”اها مون ۾ نہ آهي،“ سمنڊ جي اونهائي چوي ٿي تہ ”اها مون وٽ ناهي.“

¹⁵ اها چاندي ڏيئي بہ خريد نہ ٿي ڪري سگھجي، نڪي سون ئي ان جي قيمت بڻجي سگھي ٿو.

¹⁶ نج سون سان بہ ان جو ملهہ نہ ٿو ڪٿي سگھجي، نڪي قيمتي سليماني پٿر يا نيلم سان.

¹⁷ بيشڪ نہ سون ۽ نہ خاص شيشو ئي ان جي برابري ڪري سگھن ٿا، نڪي عمدي سون جا زيور ئي انهيءَ جو عيوض ٿي سگھن ٿا.

¹⁸ انهيءَ سان گڏ مرجان ۽ بلور جو ذڪر بہ نہ ٿو ڪري سگھجي. هائو، ڏاهپ جي ٿيلهي هيرن جواهرن جي ٿيلهيءَ کان بہ وڌيڪ قيمتي آهي.

¹⁹ نہ سوڊان جو پکراج انهيءَ جي برابري ڪري سگھي ٿو، نڪي نج سون ئي ان جو عيوض ٿي سگھي ٿو.

²⁰ تڏهن ڀلا ڏاهپ اچي ڪٿان ٿي؟ دانائيءَ جو گھر ڪٿي آهي؟

²¹ بيشڪ اها سڀني ساهوارن جي نظر کان لڪل آهي، هائو، اها اڏامندڙ پکين کان بہ ڳجھي رکي ويئي آهي.

²² قبر ۽ پاتال چون ٿا تہ ”اسان پنهنجي ڪنن سان انهيءَ جو رڳو افواہ ٻڌو آهي.“

²³ رڳو خدا ئي آهي، جيڪو انهيءَ جو رستو ڄاڻي ٿو، هو ئي انهيءَ جي گھر کان واقف آهي.

²⁴ هو ڌرتيءَ جي ڇيڙن تائين نظر ڊوڙائي ٿو، هائو، هو آسمان جي هيٺان واري هر شيءِ کي ڏسي ٿو.

²⁵ شروعات ۾ خالق جڏهن هوا جو زور مقرر ٿي ڪيو، ۽ ڪڪرن لاءِ پاڻيءَ جو مقدار ٿي مقرر ڪيائين،

²⁶ جڏهن هن برسات لاءِ قانون ٿي ٺاهيو، ۽ گجگوڙ ۽ وڄ لاءِ رستو مقرر ٿي ڪيائين،

²⁷ تڏهن هن ڏاهپ تي نظر ڪئي ۽ انهيءَ جي آزمائش ورتائين، پوءِ انهيءَ کي منظور ڪري قائم ڪيائين.

²⁸ تڏهن خدا انسان کي چيو تہ ”ياد رک، مون خداوند جو خوف رکڻ ئي ڏاهپ آهي، ۽ برائيءَ کان پري رهڻ ئي دانائي آهي.“