پيدائش 46 - Muslim Sindhi Bible

يعقوب ۽ سندس ڪٽنب جو مصر ڏانهن وڃڻ

¹ پوءِ يعقوب پنهنجو سڀ ڪجھہ کڻي اُٿي روانو ٿيو. جڏهن هو بيرسبع ۾ آيو تڏهن پنهنجي پيءُ اسحاق جي خدا لاءِ قربانيون پيش ڪيائين.

² تڏهن خدا يعقوب سان رات جي وقت رويا ۾ ڳالهايو. هن کيس چيو تہ ”يعقوب! اي يعقوب!“ هن جواب ڏنو تہ ”اِجھو، آءٌ حاضر آهيان.“

³ تڏهن هن چيس تہ ”آءٌ خدا آهيان، تنهنجي پيءُ جو خدا. تون مصر وڃڻ کان نہ گھٻراءِ، ڇو تہ آءٌ اتي تو منجھان هڪڙي وڏي قوم پيدا ڪندس.

⁴ آءٌ تو سان گڏ مصر هلندس ۽ آءٌ ئي وري تو کي موٽائي آڻيندس ۽ يوسف پنهنجي هٿن سان تنهنجيون اکيون بند ڪندو.“

⁵ پوءِ يعقوب بيرسبع مان روانو ٿيو. سو يعقوب جي پٽن پنهنجي پيءُ، پنهنجن ٻارن ۽ پنهنجين زالن کي انهن گاڏين ۾ چاڙهيو جيڪي فرعون يعقوب کي وٺي اچڻ لاءِ موڪليون هيون.

⁶ هنن پنهنجو چوپايو مال ۽ ٻيو سمورو سامان جيڪو ڪنعان جي ملڪ ۾ گڏ ڪيو هئائون، سو سڀ کڻي مصر ۾ آيا. يعقوب سان پنهنجو سمورو اولاد گڏ هو.

⁷ هو پنهنجي ڌيءَ، پٽن، پوٽن ۽ پوٽين، مطلب تہ پنهنجي سڄي اولاد کي پاڻ سان گڏ مصر ۾ وٺي آيو.

يعقوب جو اولاد

⁸ اسرائيل يعني يعقوب جا پٽ جيڪي ساڻس گڏ مصر ۾ آيا، تن جا نالا هي آهن. سندس وڏو پٽ روبن هو

⁹ جنهن جا پٽ هي هئا: حنُوڪ، فلو، حصرون ۽ ڪرمي.

¹⁰ سندس ٻيو پٽ شمعون هو جنهن جا پٽ هي هئا: يموايل، يمين، اُهد، يڪين، صُحر ۽ شاؤ‌ل جيڪو هڪڙي ڪنعاني عورت مان پيدا ٿيو هئس.

¹¹ سندس ٽيون پٽ لاوي هو جنهن جا پٽ هي هئا: جيرشون، قهات ۽ مراري.

¹² سندس چوٿون پٽ يهوداہ هو جنهن جا پٽ هي هئا: شيلاہ، فارص ۽ زارح. پر يهوداہ جا ٻہ ٻيا پٽ عير ۽ اونان اڳ ۾ ئي ڪنعان جي ملڪ ۾ مري ويا هئا. فارص جا پٽ حصرون ۽ حمول هئا.

¹³ سندس پنجون پٽ اِسڪار هو جنهن جا پٽ هي هئا: تولع، فووہ، يسوب ۽ شمرون.

¹⁴ سندس ڇهون پٽ زبولون هو جنهن جا پٽ هي هئا: سرد، اَيلون ۽ يحليل.

¹⁵ اهي سڀيئي لياہ جو اولاد آهن جيڪي کيس فدان‌ارام ۾ سندس ڌيءَ ديناہ سوڌا يعقوب مان ڄاوا. اهي جملي ٽيٽيهہ ڄڻا هئا.

¹⁶ يعقوب کي لياہ جي ٻانهيءَ مان ٻيا پٽ بہ هئا. سندس پهريون پٽ جد هو جنهن جا پٽ هي هئا: صفيان، حجي، سوني، اصبان، عيري، ارودي ۽ اريلي.

¹⁷ سندس ٻيو پٽ آشر هو جنهن جا پٽ هي هئا: يمنہ، اِشواہ، اِشوي، بريعاہ ۽ سندن ڀيڻ سرہ. بريعاہ جا پٽ حبر ۽ ملڪي‌ايل هئا.

¹⁸ اهي سڀيئي زِلفاہ جو اولاد آهن، جيڪا لابن پنهنجي ڌيءَ لياہ کي ٻانهي ڪري ڏني هئي. اهي جملي سورهن ڄڻا هئا.

¹⁹ يعقوب کي سندس زال راخل مان يوسف ۽ بنيامين نالي پٽ هئا.

²⁰ مصر جي ملڪ ۾ يوسف کي اون شهر جي مذهبي اڳواڻ فوطيفرع جي ڌيءَ آسنات مان منسي ۽ افرائيم ڄاوا.

²¹ بنيامين جو اولاد هي هو: بلع، بڪر، اشبيل، جيرا، نعمان، اخي، روش، مفيم، حُفيم ۽ آرد.

²² اهي جملي چوڏهن ڄڻا راخل مان يعقوب جو اولاد هئا.

²³ يعقوب کي راخل جي ٻانهيءَ مان ٻيا پٽ بہ هئا. سندس پهريون پٽ دان هو جنهن جو پٽ حُشام هو.

²⁴ سندس ٻيو پٽ نفتالي هو جنهن جا پٽ هي هئا: يحصي‌ايل، جُوني، يصر ۽ شليم.

²⁵ اهي پٽ بلهاہ مان آهن، جيڪا لابن پنهنجي ڌيءَ راخل کي ٻانهي ڪري ڏني هئي. اهي جملي ست ڄڻا هئا.

²⁶ يعقوب جي نُنهُن کان سواءِ سندس پنهنجو اولاد جو ساڻس گڏ مصر ۾ آيو، سي جملي ڇاهٺ ڄڻا هئا.

²⁷ يوسف کي ٻہ پٽ مصر ۾ ڄاوا هئا. اهڙيءَ طرح يعقوب جي ڪٽنب جا سڀيئي ماڻهو جيڪي مصر ۾ آيا سي ستر ڄڻا هئا.

يعقوب ۽ سندس ڪٽنب جو مصر ۾ پهچڻ

²⁸ يعقوب پاڻ کان اڳي يهوداہ کي يوسف ڏانهن موڪليو تہ جشن جو رستو معلوم ڪري اچي. پوءِ جڏهن اهي جشن جي علائقي ۾ اچي پهتا،

²⁹ تڏهن يوسف بہ پنهنجي گاڏي تيار ڪرائي پنهنجي پيءُ سان ملڻ لاءِ جشن ڏانهن ويو. جڏهن يوسف کيس ڏٺو تہ ڀاڪر کڻي وڌائينس ۽ ڳچ دير تائين پئي رنو.

³⁰ تڏهن يعقوب يوسف کي چيو تہ ”مون تو کي جيئرو جاڳندو اچي ڏٺو آهي، سو هاڻي منهنجو موت اچي تہ ڀلي اچي.“

³¹ پوءِ يوسف پنهنجي ڀائرن ۽ پنهنجي پيءُ جي باقي خاندان کي چيو تہ ”آءٌ وڃي ٿو فرعون بادشاهہ کي ٻڌايان تہ ’منهنجا ڀائر ۽ منهنجي پيءُ جو خاندان، جيڪي ڪنعان جي ملڪ ۾ رهندا هئا سي مون وٽ اچي ويا آهن.

³² اهي ماڻهو ڌنار آهن ۽ مال چاريندا آهن. انهن پنهنجا ڍور ڍڳا، رڍون ٻڪريون ۽ ٻيو بہ جيڪي وٽن هو سو آندو آهي.‘

³³ جڏهن فرعون اوهان کي سڏائي ۽ پڇي تہ ’اوهان جو ڌنڌو ڪهڙو آهي؟‘

³⁴ تڏهن اوهين جواب ۾ چئجوس تہ ’اسين توهان جا ٻانها پنهنجن ابن ڏاڏن وانگر ننڍپڻ کان وٺي اڄ ڏينهن تائين مال چاريندا رهيا آهيون.‘ پوءِ هو اوهان کي جشن جي علائقي ۾ رهڻ ڏيندو.“ انهيءَ جو سبب هي آهي جو مصر جا ماڻهو ڌنارن کان ڪراهت ڪندا هئا.