Ululahu Tesalonika 5 - Buka Blahi Ka Cheke Holo

Tarabana mala meigna Lord

¹ Uve kheraguro, ghehati theome nabami te riso ari ka ghotilo eidi narane ba nhigra mala pulo meigna Lord.

² Ghotilo thofno laseni fara eigna theo kaisei naikno te laseni. Narane mala ke pulo meigna Lord tuana ginauna farhanidi naikno jateula kaisei mae blau te mei bongiro ia eghu.

³ Kate chekeni naiknore, “Pharikeli nei nasnagla,” God ginauna ghosei roꞌedi, jateula khabru ghosei te mei ka gaꞌase te namo karha sua ia eghu. Eghuteuna naikno tuare ginauna theome rikha.

⁴ Nu kheraguro, ghotilo theome au kate romno. Eghume narane tuana ginauna theome farhani ghami ghotilo jateula kaisei mae te mei ka suga na te mala blau.

⁵ Ghotilo hui nogna naikno naphae. Ghotilo nogna naikno narane. Tutuani tahati theome nogna bongi ba gromno.

⁶ Eghume tahati thosei jateula keha naikno te thuru te theome lasedi glepo igre, nu tahati dofra nei reireghi fakeli ghita theda.

⁷ Eigna iheire te thuru, thuru bongiro, eghuteuna iheire te koꞌu dranga, koꞌu bongiro.

⁸ Nu tahati nogna narane. Eghume tahati reireghi fakeli ghita theda. Noda fatutuani nei noda namha ranghini God jateula noda greoreo, nei noda grouronu te mala hatini tahati u karha fei tifa na jateula noda khepi eghu.

⁹ God theome vahi ghita mala para ghita kate diꞌatagna, nu mala hatini tahati u thofno nakarha na ka noda Lord Jisas Kraes.

¹⁰ Mae Jisas neke lehe eida tahati mala tangomana tahati te karha balugna mana tifa tifa, neubane karha neu ba lehehi kate mei mae Jisas na.

¹¹ Eghume fari totoghoi nei fari faheahetai, jateu te eni ghotilo gognaro gne eghu.

Farirhiu leghu lahu nei kubae

¹² Uve kheraguro, ghehati gognaro na tore ghami ghotilo mala ghatho tahudi naikno te loku heta balumi ghotilo, iheire God teke vahidi mala reireghi ghami nei farirhiu ghami eigna nakarhagna khiloau na.

¹³ Thofno ghatho tahudi fara nei namhadi eghu eigna nodi gloku te edi ranghi ghami ghotilo ra. Au fodu ka pharikeli.

¹⁴ Kheraguro, ghehati tore ghami ghotilo mala cheke fahetadi iheire te thodo loku. Fafranedi iheire te mhaghu. Toghodi iheire te nigra. Thoghei famane cheke ranghidi naikno te gnafa.

¹⁵ Fiofilo fakeli, thosei snakreni kaisei naikno me foli fapulo glepo te diꞌa ka ihei tughuni glepo te diꞌa. Nu fariuriu eni unha te keli koba fari themi, ba ranghidi naikno te gnafa.

¹⁶ Gleale'a koba.

¹⁷ Tarai koba.

¹⁸ Cheke fakeli eidi gobigna lepo fateo, neubane unha te keli ba diꞌa. Tuana unha God te magnahagheni ka ghotilo naikno khiloau ra.

¹⁹ Thosei fakhusuni nogna gloku mae Tharunga te Blahi na.

²⁰ Thosei susukuni chekedi hatimare mae profet.

²¹ Nu fariuriudi gobigna lepo fateote'o. Loku famaku ka unha te keli.

²² Tafradi gobigna lepo te diꞌa.

²³ Ghehati tarai ka God thegna, mae ihei te tusu ranghi ghami nogna pharikeli, mala faklino ghami fabrahu. Ghehati tarai ka God mala batu fakelidi nagnafami, tharungami nei thinimi fateo, mala theo kaisei najafra kate mei noda Lord Jisas Kraes.

²⁴ Mae ihei te kilo ghami ghotilo ginauna na eni igne ranghi ghami ghotilo. Ghotilo tangomana te fatutuani ni mana.

²⁵ Kheraguro, tarai mei ghami.

²⁶ Kubaedi kherada ka namono Tesalonika balu namha.

²⁷ Iara cheke ka ghotilo, ka nogna nolaghi Lord, mala iu'iju letas igne ranghidi kherada te gnafa jare Tesalonika.

²⁸ Iara toreni nogna khokofakasai mae Jisas Kraes noda Lord mala au balumi. Me gnafa. Iara, mae Pol.