Ululahu Tesalonika 4 - Buka Blahi Ka Cheke Holo

Nafnata nakarha te keli tagnani God

¹ Uve kheraguro, gognaro na iara au keha glepo te mala chekedi ka ghotilo. Ghehati neke farirhiu ghami ghotilo nafnata nakarha te keli tagnani God igne. Eghuteuna ghotilo auhi ka nafnata nakarha tuana. Gognaro na ghehati tore ghami ghotilo ka nanghagna Lord Jisas mala au fabrahu ka nafnata nakarha te keli tuana.

² Eigna ghotilo lasedihi farirhiu teke tusu ari tami ka nogna nolaghi noda Lord Jisas.

³ Te chekeni iara igne unha te magnahagheni God na. Mana magnahaghei ghami ghotilo te blahi nei klino. Eghume te keli na ghotilo te au fadelei ka gnognoro.

⁴ God magnahaghei ghami ghotilo mae nalha'ura te sopa ghatho tahudi khetomi are ka puhi te thofno blahi fara.

⁵ Thosei lisa lao thinimi are ka gnognoro jateula naikno te theome laseni God ra eghu.

⁶ Eghume theome tangomana kaisei mae te eꞌei puhi diꞌa ranghini mae kheragna fofodu na ka puhi igne. God ginauna fatedi naikno te edi glepo igre. Ghehati kulu cheke faheta ka ghotilo eigna igne.

⁷ Naugna God neke kilo ghita mala naikno blahi eghuteuna theome magnahaghei ghita te au ka nakhibo.

⁸ Eghume ihei te tirogna leghuni farirhiu igne, mana theome tirogna leghuni naikno nu mana tirogna leghuni God, mae ihei teke tusu ranghi ghau nogna Tharunga te Blahi.

⁹ Ghehati theome naba te riso ari ka ghotilo eigna te mala namhani kherada fofodu ka khiloau. Naugna God thegna farirhiu ghamihi ghotilo te mala fari namhai na.

¹⁰ Tutuani fara, ghotilo namhadi kherada te gnafa ka namono Masidonia. Eghume ghehati tore ghami fara kheraguro mala biꞌo e biꞌo ghotilo nomi namha na ranghidi.

¹¹ Hati nhetami na au ka nakarha te muana. Loku fakelidi nomi gloku themi are, nei loku ka khamemi themi are. Naugna ghehati neke kulu chekehi ka ghotilo te mala edi glepo igre.

¹² Te leghudi ghotilo farirhiu igre, naikno te au ke kosigna khiloau gne ginauna ghatho tahu ghami ghotilo. Eghuteuna ghotilo ginauna theome rouronu ka ihei malagna unha te nabami themi na.

Meigna Lord

¹³ Kheraguro, ghehati magnahaghei ghami ghotilo te thofno lasedi iheire tela lehehi ra. Ghehati theome magnahaghei ghami ghotilo te diꞌanagnafa eidi iheire tela lehehi jateula naikno te diꞌanagnafa te theome fatutuani ni mae Jisas.

¹⁴ Tahati fatutuani ni mae Jisas neke lehe eghuteuna ke karha fapulo. Eghume, tahati jaola fatutuani narane ke pulo meigna mae Jisas, God ginauna hata fodu balugna mae Jisas naikno khiloau teke lehe ra.

¹⁵ Unha te chekedi ghehati gognaro igre nogna farirhiu thegna Lord. Tahati karha teu ka narane ke pulo meigna Lord na ginauna au balugna mana, nu theome thofno tei mala au balugna mana ke uludi iheire tela lehehi ra.

¹⁶ Lord thegna ginauna mei funu kligna. Tahati ginauna nomhini kaisei neha biꞌo balu naoglagna kaisei mae funeidi engel nei balu naogla khufli nogna God. Eghuteuna naikno khiloau teke lehe ra ginauna kulu kegra mala thafoni Lord.

¹⁷ Ke leghugna igne, tahati karha au teu ka nauthoglu igne God ginauna salo fodu haghe ghita baludi mare ke lamna grokho mala thafoni Lord ka maloa. Eghuteuna tahati ginauna au balugna Lord tifa tifa.

¹⁸ Eghume fari totoghoi ka cheke igre.