Ululahu Samuel 6 - Buka Blahi Ka Cheke Holo

Mare neke hata fapulo Bokis Nhaꞌa Cheke igne Israel

¹ Nogna Bokis Blahi Lord igne ne au nabagna fitu nhigra Filistia.

² Eghuteuna naiknodi Filistia igre ne kilodi hatimare mae pris nei keha mae kastom eghu, naiknore ne ghusna eghu ka mare, “Tore! Na faꞌunhani si tahati Bokis Blahi ignea? Jame teke hata fapulo tahati ka namonogna na, na faꞌunhani eghu tahati eni gna na?”

³ Aonu mae pris nei mae kastom teu igre ne cheke eghu, “Jame teke hata fapulo tahati Bokis Blahi igne na, tahati na fatei kaisei namha balugna, eghume tahati na poloru ka nodi God mae Israel igne. Theome tangomana te fiti hata fapulo kolho tahati na, tahati mala fatei kaisei glepo balugna, eghuteuna tahati ginauna tangomana na teke keli fapulo na. Eghuteuna tahati ginauna na lasenila naugna unha neku neke goigoni ghita nga teuna.”

^4-5 Aonu naiknore ne ghusna eghu, “Unha nafnata namha nate fatei tahati balugna na?” Aonu mare ne cheke eghu, “Ghotilo hata gol, eghuteuna ghotilo horo glima mumuju mala jateula nhuge te goigoni ghita tahati ra eghu fifilodi re, eghuteuna horo glima mumuju mala jateula nakusi te goigoni ghita tahati ra eghu fifilodi re. Tahati na eni igne, mala nanaba ka glima king di Filistia, naugna papara igne thoke ghita tahati hui baludi noda king gre. Tahati mala fatei mumuju igre ka mare, eghuteuna tahati mala ghatho tahuni nodi God mae Israel. Jame te eghu na, mana ginauna theome goigoni ghita fabrahu baludi noda god nei noda glose igre eghu.

⁶ Tahati mala theome thufu jateula king gna Ijep baludi nogna naiknore tifa ra eghu. Tahati theome mala ghatho ihoni puhi God teke paradi mare teke ghilei snakredi naiknodi Israel mala jifla ka nodi kantri na.

⁷ “Eghume, ghotilo tarabana kaisei chariot majaghani baludi phei buluka te au thudi majaghani, nu phei buluka igre theome korho chariot ngau tifa na. Ghotilo mala nhaꞌa lao nhugha ka repa mala korho repa chariot na, nu ghotilo hata fadelei phei thudi repare mala ke pulo ka nodi suga buluka re.

⁸ Eghuteuna ghotilo hata nogna Bokis Blahi Lord ana, mala nhaꞌa lao ka chariot igne. Aonu ghotilo hata mumuju teke horo ka gol te mala poloru are, eghuteuna ghotilo lilisei ka kaisei bokis balugna nogna Bokis Blahi Lord ana ke lamna chariot. Eghuteuna ghotilo snakre teidi phei buluka igre mala korho repa chariot igne tei ka vido aheva te magnahaghei tei repa na.

⁹ Eghuteuna ghotilo filo fakeli ka repa mala laseni jame hata doglo te tei repa Bokis Blahi igne ka namono Bet-Semes ka nogna kantri na. Jame te eghuna, tuana gaoghatho teke au ka Lord te mala goigoni ghita tahati na. Nu jame theome doglo te tei repa ka vido tuana na, nodi God mae Israel gre neke theome kuru meini puhi biꞌo igne ka tahati.”

¹⁰ Aonu naiknore nomhini igne ne tei eni glepo igne. Mare hata phei buluka igre ne famamhaku chariot na ka repa, mare bobotho phei thudi re lamna suga buluka.

¹¹ Eghuteuna mare ne lilisei Bokis Blahi igne balugna keha bokis te au mumuju gol tagna na.

¹² Gnafa teuna, phei buluka igre ne funu nolo, nu repa ne theome tei tafri. Repa leghuni nabrou na doglo ne tei Bet-Semes. Eghuteuna kate nolo te tei na, repa eha ne tei. Eghuteuna glima king di Filistia igre leghudi repa ne ghilei tei posa ka nohigna namono Bet-Semes.

¹³ Ka narane tuare, naiknodi Bet-Semes igre ukli wit neu ka nagare mare te au ka sare pari na. Eghuteuna kate filoni mare Bokis Blahi igne, mare ne kelitadi fara.

^14-15 Aonu chariot igne ne posa ka nogna nagare mae Josua na, maegna ka namono Bet-Semes. Eghuteuna naꞌa mei ne snoto rhegna kaisei thina biꞌo ka vido igne. Aonu keha mae Livaet di Bet-Semes gre ne mei hata fajifla nogna Bokis Blahi Lord na ne lilisei ka thina biꞌo igne. Eghuteuna mare jaola ne lilisei ka thina tuana bokis te au mumuju gol igre. Eghuteuna maedi Bet-Semes igre ne kato chariot igne mala gaju, eghuteuna mare ne aknu falehe phei buluka igre. Eghuteuna mare ne gahu fakrono ne fafara ka Lord. Eghuteuna ka narane tuanala mare ne eni keha fafara na ka Lord.

¹⁶ Ka narane tuana, glima mae king di Filistia igre filo ka glepo igne ne ghilei gnafa. Aonu ka narane ignela glima mae king igre neke figri ka namono Ekron.

^17-18 Igne puhi teke eni naiknodi Filistia re, mare neke edi glima mumuju ka gol te jateula nhuge teu filodi re, eghuteuna glima mumuju ka gol te jateula nakusi teu filodi re, nanaba ka glima nodi namono igre, Asdod, Gasa, Askelon, Gat, nei Ekron. Glima namono biꞌo igre bara lithui ka thina, eghuteuna kmana namono ikodi au ligohodi glima namono biꞌo igre, eghuteuna namono te gnafa igre au nodi king te mala baubatu na. Eghuteuna iagho laseni, mare hata tei mumuju igre mala fafara ka Lord mala foli falehegna poloru na, naugna mare neke hata nogna Bokis Blahi mana na. Eghuteuna keha glepo na, thina biꞌo ka nagare mae Josua Bet-Semes teke lilisei mare Bokis Blahi igne au ngala jateula kaisei tuthuana eghu eigna unha teke eni jare na.

Nogna Bokis BlahiLordna au neu Kiriat-Jaerim

¹⁹ Ka narane tuana, Lord neke aknu falehe fitusalei maedi Bet-Semes naugna mare neke filo lamna ka nogna Bokis Blahi mana na. Eghuteuna naiknore ne diꞌanagnafadi fara ne tanhi ka glepo te ninhigrana te eni Lord igne.

²⁰ Naiknodi Bet-Semes igre tanhi ne cheke eghu, “Lord na blahi fara! Tahati theome nabada te au rhegna Lord na. Tahati na hata tei aheva si Bokis Blahi ignea?”

²¹ Aonu mare ne kurudi keha naikno ne tei Kiriat-Jaerim mala cheke eghu, “Maedi Filistia ra kela hata kela fapulo meihi nogna Bokis Blahi Lord na, eghuteuna mare la mei lilisei ka namono ghehati na. Jame te keli na ghotilo mei hata tei ka nomi namono na.”