Ululahu Samuel 24 - Buka Blahi Ka Cheke Holo

Mae Devet ne theome faleheni King Sol

¹ Ke leghugna te magra te gnafa ka armi gna Filistia igne, mae Sol neke pulo mei. Keha mae ne toutonu ka mana te au teu mae Devet ka namono nagou rhegna En-Gedi.

² Aonu mana ne atha thilo thogha maedi Israel ne tei hironi mae Devet rhegna thina biꞌo Nanigot Mata.

³ Mae Sol ne mei ka kaisei gluma rhegna nabrou te au sipu na ne ruma lamna ne tei mata. Nu mae Devet balu nogna soldia mare poru lamna fara ke leghugna gluma tuana.

⁴ Nogna soldia mae Devet igre ne cheke faꞌikoi eghu ka mana, “Igne nou narane iagho te mala faleheni mana na! Lord neke chekenihi te mala lisa ari ka khamemu iagho nou naokare tekuna. Iagho tangomana te eni unha te magnahagheni iagho na.” Aonu mae Devet thoghei ne tei ke leghugna mae Sol ne kusu katha vido ka nogna pohe mana na, nu mae Sol ne theome laseni igne.

⁵ Ke leghugna igne, mae Devet ne funu diꞌanagnafa eigna unha te eni thegna na.

⁶ Mana ne cheke faꞌikoi eghu ka mae te tei balugna re, “Lisa lao ka Lord, iara theome tangomana te eni kaisei puhi te diꞌa ka nogu funei na, eigna Lord neke vahini mana.”

⁷ Aonu mana figri gaoghathodi nogna soldiare mala thosei tei aknu falehe mare. Aonu mae Sol jifla ka gluma igne ne tei.

⁸ Mae Devet jifla mei ke leghugna mana ne eha eghu tei ka mae Sol, “King!” Kate filo faleghu mae Sol na, mae Devet ghatho tahuni mana ne tuturupuku ne tufru soru pari ka glose na

⁹ ne cheke eghu, “Iagho thosei fanomho ka mae ihei te toutonu chaghi ranghi nigho na, iara theome tangomana te falehe nigho iagho na.

¹⁰ Iagho laseni unha teke eni ka gluma na ginei ia. Lord neke snakre mei nigho iagho ka nogu nolaghi iara! Nu iara theome magnahagheni te falehe nigho iagho na. Iara kokhoni nigho iagho neke cheke eghu, ‘Iara theome tangomana te goigoni ni nogu funei na, naugna Lord neke vahini mana.’

¹¹ Mama, filo mei sagho ka nou nabreku pohe igne. Jame magnahaghei aknu falehe nigho iara na, iagho jame neke falehehi! Nu iara neke atha kolho katha nou nabreku pohe iagho! Filo sagho, iara theome ghathoni kaisei glepo te mala falehe nigho iagho na. Iara jaola neke theome eni kaisei glepo te diꞌa ranghi nigho iagho, nu iagho hiro ghau iara mala falehe ghau iara!

¹² Lord ginauna fate ghita tapa, mala laseni mae ihei ka tapa te jafra na! Nu snakreni Lord mala para nigho iagho eidi glepo te edi iagho ka iara igre, naugna iara ginauna theome eni kaisei glepo te mala goigoni nigho iagho na!

¹³ Iagho laseni cheke gna tifa igne, ‘Naikno te diꞌa na kolho te eni glepo te diꞌa na.’ Iara theome tangomana te eni kaisei glepo te diꞌa ka iagho.

¹⁴ “Iagho nodi king mae Israel, naugna unha sagho te ngolhi ghau iara gnea? Iara gne kaisei khuma lehe kolho. Iara kaisei theli ikoi kolho!

¹⁵ Toreni Lord mala fate ghita, nei cheke ranghi ghita, ihei ka tapa te jafra na. Toreni Lord mala fifilo ka puhi igne mala togho ghau nei fasnagla ghau eghu iara ka glepo te eni iagho ka iara igne.”

¹⁶ Kate cheke te gnafa mae Devet cheke igre, mae Sol ne cheke eghu, “Thuguo Devet, naoglamu iagho site nomhini iara ignea?” Aonu mana ne tanhi fabiꞌo fara.

¹⁷ Mae Sol ne cheke eghu ka mana, “Iagho doglou, iara nga te jafra na. Iagho eni unha glepo te keli na ranghi ghau iara. Nu iara eni unha glepo te diꞌa na ranghi nigho iagho.

¹⁸ Gognarona, iara laseni, iagho kokhoni ghau iara. Lord neke atha mei ghau iara ka khamemu iagho, nu iagho neke theome falehe ghau iara.

¹⁹ Thono ninhigrana fara ranghini ihei te snakre teini nogna naoka na jame te auhi ka khamegna mana na. Iara toreni Lord mala tusu ranghi nigho glepo te keli, naugna iagho neke theome falehe ghau iara ginei ia!

²⁰ Tutuani, iara laseni, iagho ginauna mala king gna Israel, kate funei iagho na, Israel ginauna kaisei kantri rheta fara.

²¹ Iagho nhaꞌa cheke ka nanghagna Lord mala thosei goigonidi iheire nate karha mei ka vikegu iara gre, nei thosei ghiha koko nanghadi thabuknagu iara ra.”

²² Aonu mae Devet ne leghuni unha te chekeni mae Sol igne ne nhaꞌa cheke ka mana. Mae Sol figri neke pulo ka namono, nu mae Devet neke figri balu nogna soldia ka nodi vido mala poru na.