Ululahu Kronikols 24 - Buka Blahi Ka Cheke Holo

Mae pris ka tharaknagna mae Eron

^1-2 Mae Eron au fati thugna nalhaꞌu, mae Nadab, mae Abihu, mae Eleasa nei mae Itama. Eghuteuna mae Nadab ghe mae Abihu gre, phiamare neke kulu lehe neke lehe nga mae kmadi na, eghuteuna phiamare neke theo kaisei thudi nalhaꞌu. Aonu mae Eleasa ghe mae Itama kolho teke pris tughuni mae kmadi na. Eghume mae pris ka tharaknagna mae Eron igre te loku ka Sugagna Lord.

³ Ka narane te king mae Devet igre, mana magnahaghedi nodi gloku mae pris gre te famane doglo fara, aonu mana ne fofota mae pris igre ka nodi soasopai tothoghei. Eghuteuna Pris Sadok ka tharaknagna mae Eleasa ghe Pris Ahimelek ka tharaknagna mae Itama, phia mae igre ne toghoni mae Devet kate fofotadi mare na.

⁴ King Devet ne fofota vikegna mae Eleasa gne ka nabotho namno tothoghei, eghuteuna tharaknagna mae Itama na ne fofota ka nhana tothoghei. Mana eni igne naugna phaꞌu mae ka tharaknagna mae Eleasa gne ne kmana fara salaꞌudi phaꞌu mae ka tharaknagna mae Itama.

⁵ Phei tharakna igre kafe au nodi mae pris nei mae biꞌo eghu ka Sugablahi na. Aonu mae Devet, mae Sadok nei mae Ahimelek, thilo mare ne lalahu khale mala laseni mae ihei nate hata nafnata gloku tuana. Tuana puhi te eni thilo mare te fofotadi mare ka puhi te doglo.

⁶ Eghuteuna mae Semaea thugna mae Netanel, kaisei mae Livaet, mana ne rioriso soru nanghadi hatimare mae lida teke vavahi mare igre. King Devet baludi nogna mae biꞌore, nei Pris Sadok, nei Pris Ahimelek thugna mae Abiata, nei hatimare mae biꞌo ka tharaknadi hatimare mae pris nei ka hatimare mae Livaet, mare te gnafa na kafe filoni nei laseni eghu glepo igne.

⁷ Ka thofno narane gna na mare ne vavahi tothoghei igre: Ulu lahu na nogna tothoghei Pris Jehoearib. Fapea na, nogna tothoghei Pris Jedaea.

⁸ Fatilo, nogna tothoghei Pris Harim. Fafati na, nogna tothoghei Pris Seorim.

⁹ Falima, nogna tothoghei Pris Malkaeja. Fafamno na, nogna tothoghei Pris Mijamin.

¹⁰ Fafitu na, nogna tothoghei Pris Hakos. Fahana na, nogna tothoghei Pris Abaeja.

¹¹ Faheva na, nogna tothoghei Pris Jesua. Fabotho na, nogna tothoghei Pris Sekanaea.

¹² Nabotho kaisei, nogna tothoghei Pris Eliasib. Nabotho phei, nogna tothoghei Pris Jakim.

¹³ Nabotho thiloi, nogna tothoghei Pris Hupa. Nabotho fati, nogna tothoghei Pris Jesebeab.

¹⁴ Nabotho glimai, nogna tothoghei Pris Bilga. Nabotho namnoi, nogna tothoghei Pris Ima.

¹⁵ Nabotho fitui, nogna tothoghei Pris Hesia. Nabotho nhanai, nogna tothoghei Pris Hapises.

¹⁶ Nabotho nhevai, nogna tothoghei Pris Petahaea. Varadaki, nogna tothoghei Pris Jeheskel.

¹⁷ Varadaki kaisei, nogna tothoghei Pris Jakin. Varadaki phei, nogna tothoghei Pris Gamul.

¹⁸ Varadaki thiloi, nogna tothoghei Pris Delaea. Varadaki fati, nogna tothoghei Pris Masaea.

¹⁹ Mare neke vahidi mae pris igre mala loku ka nogna Sugablahi Lord. Tifa te mei na, pris biꞌo Eron neke lilisei vetula igre mala leghudi mare ka gloku igne. Lord, nodi God mae Israel igne neke cheke ka mae Eron mala thofno eni fakeli mare gloku igne.

Tharaknagna mae Kohat

²⁰ Igre nanghadi keha mae ka keha tharakna ka vikegna mae Livae: Mae Sebuel neke karha ka tharaknagna mae Amram. Mae Jedea neke karha ka tharaknagna mae Sebuel.

²¹ Mae Isia neke kulu karha ka tharaknagna mae Rahabaea.

²² Mae Selomot neke karha ka tharaknagna mae Isaha. Mae Jahat neke karha ka tharaknagna mae Selomot.

²³ Mae Hebron neke au fati thugna nalhaꞌu. Mae ulu lahu na mae Jeraea, fapea na, mae Amaraea, fatilo na, mae Jahasiel, eghuteuna fafati na, mae Jekameam.

²⁴ Mae Maeka neke karha ka tharaknagna mae Usiel. Mae Samia neke karha ka tharaknagna mae Maeka.

²⁵ Mae Isia thabusigna mae Maeka. Mae Sekaraea neke karha ka tharaknagna mae Isia.

Tharaknagna mae Merari

²⁶ Mae Merari neke au phei thugna nalhaꞌu mae Mali ghe mae Musi. Mae Jasaea jaola neke karha ka tharaknagna mae Merari.

²⁷ Mae Jasaea neke au thilo thugna nalhaꞌu: Mae Soham, mae Sakua nei mae Ibri.

^28-29 Igre nanghadi phei thugna nalhaꞌu mae Mali re: Mae Eleasa ghe mae Kis. Mae Eleasa neke theo thugna nalhaꞌu, nu mae Kis neke au kaisei thugna nalhaꞌu, nanghagna na, mae Jeramel.

³⁰ Igre nanghadi thilo thugna nalhaꞌu mae Musi re: Mae Mali, mae Eda nei mae Jeremot. Igre tharakna ka vikegna mae Livae.

³¹ Mae biꞌodi tharakna te gnafa nei thabusidi mare te majaghani igre eghu ne lalahu khale mala laseni nodi gloku mae igre jateula te edi mare ka kheradi pris ka tharaknagna mae Eron tifa ra. King Devet, Pris Sadok, Pris Ahimelek, nei mae biꞌo ka tharaknadi hatimare mae pris, nei hatimare mae Livaet, mare te gnafa na ne filoni te lalahu khale mare igne.