Ululahu Kronikols 21 - Buka Blahi Ka Cheke Holo

King Devet ne kaha vikegna Israel

¹ Mae Satan magnahaghei te ei puhi biꞌo mala thokedi naiknodi Israel, aonu mae Satan ne tusu lao gaoghatho ka mae Devet mala kaha naiknodi Israel.

² Aonu king ne cheke eghu ka mae Joab nei hatimare mae komanda ka armi, “Ghotilo tei kaha naiknodi Israel, eghuteuna ghotilo kahadi mae iheire te nabadi te tei ka magra. Ghotilo mala fufunu ka namono Dan ke raru, tei posa ka namono Bereseba ke mata. Ghotilo mala ripot ka iara mala tangomana iara te lasedi niha naikno te au na.”

³ Nu mae Joab ne cheke eghu ka king, “King, iara magnahagheni Lord te eni haghe nabadi noda soldia tahati gre mala kmana gobi salaꞌudi gognaro gre. Iagho laseni, naiknodi Israel igre au ke parimu iagho, eghuteuna kaisei iagho ngala nodi king na. Eghume, mala unha eghu sagho te magnahaghei eni puhi te diꞌa ranghidi naiknodi Israel grea?”

⁴ Nu king ne cheke faheta fara ka mae Joab, aonu mare jifla ne tei heva heva Israel mala kahadi mae iheire nabadi te tei ka magra. Gnafa teuna mare neke pulo mei Jerusalem.

⁵ Aonu mae Joab ne tei ripot ka king khaputudi mae iheire nabadi te mala tei ka magra na: Israel na kaisei mola, kaisei gobi thogha mae te lase magra, eghuteuna Juda na fati gobi fitusalei thogha mae te lase magra.

⁶ Nu naugna mae Joab gne theome magnahaghedi nogna cheke mae king te edi ka mana igre, mana ne theome kahadi vikegna mae Livae nei vikegna mae Benjamin.

⁷ Nu Lord ne theome gleꞌani nogna cheke mae Devet te mala kahadi naiknodi Israel igne, aonu mana ne paradi naiknodi Israel.

Lordne parani King Devet

⁸ Eghuteuna mae Devet ne tarai eghu ka Lord, “Lord, unha te eni iara igne thono fameomekro fara. Iara la eni kaisei nakhibo te thono diꞌa fara. Iara thofno tore nigho iagho mala hata fadelei najafra te eni iara igne.”

^9-10 Aonu Lord ne cheke ka mae Gad, nogna profet King Devet igne. Mana ne cheke eghu, “Gad, iagho tei filoni king eghuteuna iagho cheke ka mana, iara ginauna parani mana. Thilo nafnata papara tarabanau malagna mana, eghuteuna mana mala vavahi kaisei ka thiloi igre nate mala parani iara mana na.”

¹¹ Aonu mae Gad tei ne filoni mae Devet ne cheke eghu ka mana, “Lord ne cheke eghu: Iagho na vavahi kaisei ka thilo papara igre.

¹² Kaisei na, narane mala rofo na ginauna thoke mei heva heva ka kantri igne nabagna thilo finogha. Kehana, ghotilo ginauna rikhadi nomi naokare na theome au snoto nabagna thilo nhigra. Eghuteuna fatilo na, nogna Engel Lord na ginauna nhaꞌa mei kaisei fogra te diꞌa fara na goigonidi naiknore ka vido te gnafa ka nomi kantri ghotilo igne nabagna thilo narane.” Eghuteuna mae Gad neke cheke eghui, “Eghume king, iara magnahaghei nigho iagho te ghathoni igne, eghuteuna chekeni ka iara aheva ka thilo glepo igre te magnahagheni iagho na. Eghuteuna iara ginauna hata tei nou cheke tughu iagho na ka Lord, mae ihei teke kuru mei ghau iara na.”

¹³ Mae Devet ne cheke eghu ka profet Gad, “Tutuani fara! Iara la thofno diꞌanagnafagu fara ka cheke igne! Nu iara theome magnahaghei papara te jifla mei ka gaoghathogna naikno na. Jame te keli na lisa lao ka Lord mae ihei te au nolaghi fateote'o na mala vahini unha papara te nabami ghehati na, naugna God na tangomana te kokhonidi koba naiknore.”

¹⁴ Aonu Lord ne kuru mei kaisei fogra biꞌo te thono diꞌa fara ka naiknore. Eghuteuna fitusalei thogha naiknodi Israel ne lehe ka fogra igne.

¹⁵ Eghuteuna God ne kuruni engel ne tei goigonini Jerusalem. Nu Lord filoni engel igne ne funu goigonini Jerusalem, eghuteuna mana ne diꞌanagnafagna fara ka glepo te diꞌa te thoke mei ka naiknore igne. Eghuteuna mana tughu nagnafagna ne cheke eghu ka engel igne, “Hui! La nabahi!” Ka narane tuana, nogna Engel Lord na kegra neu rhegna kaisei vido te mala fagagae wit na. Vido igne nogna mae Arauna, kaisei mae ka vikegna mae Jebus.

¹⁶ King Devet ne filoni Engel nogna Lord na kegra neu farihotei maloa ghe nauthoglu, eghuteuna mana louloku kaisei naflahi ka khamegna na tarabana mala goigonini Jerusalem. Eghuteuna mae Devet nei hatimare mae lida pogho soru pari ne tei posa ka glosero pari. Ka narane tuana mare ne pipichi ka pohe diꞌanagnafa, fagaglanagna nodi diꞌanagnafa na.

¹⁷ Mae Devet ne tarai eghu ka God, “God, iara ngala teke huhurudi teke tei kaha mare mae soldia ra. Iara ngala teke eni puhi te diꞌa igne. Naikno gre jateula sipu eghu kolho theome eni kaisei najafra. Lord, iagho nogu God iara. Iagho thosei paradi nou naikno gre, nu iagho para ghau iara kolho baludi tharaknagu iara gre.”

¹⁸ Aonu Engel nogna Lord na ne cheke ka profet Gad mala tei mana filoni mae Devet, eghuteuna chekeni mana mala tei eni kaisei nogna olta Lord ka nogna vido mala fagagae wit mae Arauna, maegna Jebus.

¹⁹ Aonu mae Devet ne leghuni nogna cheke Lord teke cheke ka mae Gad igne.

²⁰ Aonu kate fagagae wit teu mae Arauna baludi fati mae thugna re, mana ne filoni kaisei engel. Nu fati thugna mana igre, mare rikha ne tei poru.

²¹ Aonu mae Devet mei ne posa ka vido igne. Kate filoni mae Devet na, mae Arauna jifla kokoni nogna gloku na ne tei pogho soru ke ulugna king.

²² King Devet ne cheke eghu ka mae Arauna, “Iara mei mala foli nou vido mala fagagae wit iagho igne. Iara magnahaghei te babana kaisei nogna olta Lord agne, mala fagnafani fogra te diꞌa igne. Iagho tangomana te sabiri ka iara nihai te magnahagheni iagho na.”

²³ Aonu mae Arauna ne cheke eghu, “King, iara theome magnahaghei te foli iagho glose igne ka iara. Atha kolho. Eghuteuna iagho jaola hata unha keha glepo te magnahaghei fafara tagna na. Iagho tangomana te hata phei nogu buluka iara are te mala fafara ke kligna olta na, eghuteuna thaba teke loku fodudi repa, eghuteuna thaba mala fagagae wit teu are, iagho hata mala gahu. Iara magnahaghei te tusu ari ka iagho gobigna lepo igre.”

²⁴ Nu mae Devet ne cheke eghu, “Theo, iara na foli ka iagho. Iara theome tangomana te fiti hata kolho nou glepo iagho re te fafara lao ka Lord na.”

²⁵ Aonu mae Devet ne tusu lao ka mae Arauna fitu kilo gol foli gna glose igne.

²⁶ Eghuteuna mae Devet ne babana kaisei nogna olta Lord ka vido igne. Eghuteuna mana ne gahu fafara ka Lord, kehare knoro fara, nei kehare mala au ka pharikeli balugna Lord. Mae Devet ne tarai ka Lord, eghuteuna Lord nomhini nogna tharai mana na ne kuru soru khaꞌaghi funu kligna ne gahu fafara te au ka olta igne.

²⁷ Eghuteuna Lord ne cheke ka nogna engel na neke nhaꞌa fapulo nogna naflahi mala magra na.

²⁸ Mae Devet au neu ka nogna glose mae Arauna igne ne filoni Lord te nomhini nogna tharai na. Aonu mae Devet ne fafara ka Lord ka olta igne.

²⁹ Ka narane igne, nogna Suga Tapuale Lord teke horo mae Moses ka namono nagou na tifa ia, nei olta mala gahu fafara teu igre kafe au ngala ka vido blahi na jare Gibeon.

³⁰ Nu ka narane igne, mae Devet ne theome tei Gibeon mala tarai ka God, naugna mana mhaghuni nogna naflahi mala magra Engel nogna Lord.