Thakle 17 - Buka Blahi Ka Cheke Holo

Gaꞌase vine ghe bosu

¹ Kaisei mae ka fitu engel igre ne hata fitu disire ne mei ka iara ne cheke eghu, “Mei sagho, mala falalase nigho iara papara nate eni iara ka namono biꞌo Babilon te au rhedi khoꞌu te kmana igre. Namono igne fodu ka nakhibo jateula kaisei gaꞌase vine eghu.

² Hatimare mae king te gnafa ka nauthoglu igne mare la enihi puhi te diꞌa na ka naꞌa. Tutuani, naiknogna nauthoglu igne ne fodu ka nakhibo naugna mare ne leghuni fabrahu puhigna naꞌa te diꞌa na.”

³ Aonu nogna nolaghi Tharunga te Blahi na ne mei ka iara eghuteuna engel na ne baubatu ghau iara ne tei ka kaisei namono nagou. Ka vido tuana iara ne filoni kaisei gaꞌase gnokro neu ke kligna gna kaisei bosu te ukru fara thinigna na. Bosu igne iko tongana nangha lausasaba ka thinigna na. Nangha igre thofno cheke faparini God. Eghuteuna aula fitu pha'u nei nabotho honagna.

⁴ Pohe te pipichi gaꞌase na pipito nei ukru jateula nogna pohe gaꞌase te funei frunidi naiknora eghu. Eghuteuna naꞌa jaola fahaghe glepo te gol nei famane thina nei buli te siasigla. Ka khamegna na naꞌa louloku kaisei kapu teke hohoro ka gol te fodu ka glepo te diꞌa te thona fara. Eghuteuna glepo igre, puhi chara teke edi naꞌa ka naiknore.

⁵ Ka greregna na jaola au kaisei nangha te theome laseni nga teu gaoghathogna na, ne cheke eghu, “Namono biꞌo Babilon, idodi thau vine te gnafa nei puhi chara te gnafa ka nauthoglu igne.”

⁶ Eghuteuna iara ne filoni gaꞌase igne naꞌa ne dranga, eigna naꞌa ne koꞌu dadaradi nogna naikno God re. Naꞌa neke falehedi naikno khiloaure, naugna mare ne fatutuani ni mae Jisas. Aonu kate filoni iara te eghu naꞌa igne, iara ne jaglo nogu fara nei diꞌanagnafagu.

⁷ Engel na ne ghusna eghu ka iara, “Ghema, naugna unha site jaglo nou fara iagho gnea? Iara ginauna cheke thakleni gaoghathogna cheke te poru eigna gaꞌase igne. Iara ginauna jaola cheke eigna bosu te au fitu pha'ugna nei nabotho honagna teu te palani te tei gaꞌase ana.

⁸ Bosu te filoni iagho igne tifa na neke karha, nu gognaro kela theome karha eghu. Eghuteuna bosu tuana ginauna theome raugha jifla mei ka glave te mamhara fara ana. Nu ke leghu na, God ginauna roꞌeni mana. Kmana naikno ka nauthoglu igne ginauna filodi kofubobhoi biꞌo nei jaglo nodi fara eghu gaoghathodire kate filoni bosu na. Tutuani, mare jaglo nodi naugna bosu igne tifa na neke karha eghuteuna gognaro na kela theome karha eghu, nu naꞌa ginauna nake pulo mei. Naikno igre theo nanghadi ka nogna buka God na. Kate vuavuhagna nauthoglu igne, God neke rioriso soru nanghadi naikno te mala karha fabrahu tifa tifa ka buka igne.

⁹ “Ka glepo igre, iagho mala lalase nei au gaoghatho te keli eghu mala filo glanidi. Iagho laseni, fitu pha'u are, jateula fitu thogele te gnokro teu naꞌa ke klignadi. Eghuteuna fitu pha'u igre jaola hatimare fitu mae king.

¹⁰ Glima mae, ka hatimare mae king igre, mare la theohi kaisei nodi nolaghi te mala funei frunidi naiknore, eghuteuna kaisei mae te funei fruni teu gognaro na. Keha na theome kegra ngau, nu kate meigna na, mana ginauna funei fruni katha vido kmoꞌei kolho eghu.

¹¹ Bosu igne jaola kaisei mae king baludi fitu mae king igre. Tifa na mana neke karha, nu gognaro na kela theome karhahi. Nu ke leghu na, God ginauna roꞌeni mana.”

¹² Eghuteuna engel na jaola ne cheke eghu ka iara, “Nabotho hona te filodihi iagho igre, tuare nabotho mae king, nu mare theome funei jateula mae king eghu ngau. Nu ke leghu na, mare ginauna au nodi nolaghi te mala funei fruni jateula mae king teu balugna bosu igne. Eghuteuna mare ginauna funei frunini ka nauthoglu igne katha vido kolho.

¹³ Nabotho king igre kafe loku mala tusu lao nodi nolaghi nei nodi nafnakno na ka bosu igne.

¹⁴ King igre balugna bosu na ginauna magra ka Lam. Nu Lam baludi nogna naikno teke vavahi nei kilodi teku thegna te mala au heta ka nodi fatutuani, ginauna tapla sorudi kolho. Naugna Lam na funei frunidi Lord te gnafa nei King te gnafa.”

¹⁵ Aonu engel na ne cheke eghu ka iara, “Iagho laseni, khoꞌu te filodi iagho te gnokro teu thau te vine na rhedi are, tuare ngala naiknodi namono te gnafa, vike te gnafa, kokholo te gnafa nei cheke te gnafa.

¹⁶ Aonu bosu baludi nabotho hona te filodi iagho igre ginauna tirodini thau te vine igne. Mare ginauna hata ka naꞌa glepo te gnafare nei mare ginauna lisa laoni naꞌa mala au soesole kolho. Mare ginauna jaola ghamu fahui nafnahi ka thinigna naꞌa re, eghuteuna nakoni naꞌa ka khaꞌaghi na mala gnubra fahui naꞌa ka khaꞌaghi.

¹⁷ Mare na eni igne, naugna God neke lilisei gaoghatho tuana ka nagnafadire, nei mala eni mare unha te magnahagheni mana na. Mare ne kaisei gaoghatho ne mala snakre lao ka bosu na nodi nolaghi te mala funei fruni na. U bosu na ginauna funei frunidi naiknore ghilei thokeni narane God nate roꞌeni namono Babilon jateula teke chekeni mana tifa ia eghu.

¹⁸ Eghuteuna gaꞌase te filoni iagho igne, tuana ngala namono biꞌo Babilon te funei frunidi hatimare mae king gna nauthoglu igne.”