Profet Sekaraea 9 - Buka Blahi Ka Cheke Holo

Lordginauna fatedi keha kantri te au falithuini Israel

¹ Kaisei nogna cheke profet: Igne nogna cheke Lord ranghini glose Hadrak nei namono Damaskas. Lord filodi gobigna lepo vikegna Israel nei keha mae ka nauthoglu igne eghu te edi mare re.

² Eghuteuna glose Hamat te nohigna na funu Hadrak, cheke igne faparini glose igne baludi phei namono Taea ghe Saedon, neuba naiknodi phei namono igre lalase fara.

³ Naiknodi Taea neke babana vido rheta mala poru, eghuteuna tothoghei kmana silva nei gol ka nodi vido re. Glepo igre kmana fara jateula gaughavu ka nabrou ra eghu.

⁴ Nu mae Funei gna nauthoglu igne ginauna hata koko gobigna lepo igre ka vido tuana. Mana ginauna goigoni nodi vaka mare re, eghuteuna nako fahui nodi namono re.

⁵ Kate filoni naiknodi Askelon namono Taea te groꞌe na, mare ne mhaghu nodi fara. Eghuteuna naiknodi Gasa igre jaola ne diꞌa nagnafadi fara. Naiknodi Ekron igre jaola diꞌa nagnafadi, eghuteuna gaoghathodi re ne thofno glaꞌe soru fara. Gasa ginauna theo nodi funei, eghuteuna Askelon ginauna krogha na theo kaisei naikno nate au tagna na.

⁶ Eghuteuna naikno phosa ginauna mei uluni Asdod mala au tagna. Lord ne cheke eghu, “Naiknodi Filistia igre fahaehaghe fara, nu iara ginauna edi gaoghathodire mala glaꞌe soru.

⁷ Iara ginauna theome snakredi mare mala ghamu nafnahi te au dadara tagna nei keha gano te blahi langau eghu. Naiknodi Filistia te karha teura ginauna loku fodu ka nogu naikno gre mala kaisei ngala ka nogu naikno iara re, eghuteuna mare ginauna jateula te kaisei vikegna Juda eghu. Naiknodi Ekron ginauna nogu naikno iara, jateula naiknodi Jebus eghu.

⁸ Iara ginauna reireghidi nogu naiknore, mala theome tangomana kaisei soldia ka keha kantri igre te mei uludi mare na. Iara ginauna theome snakredi mae naoka te mala mei goigonidi nogu naikno iara igre, naugna iara na theome gnafa te reireghidi re.”

King ginauna mei

⁹ Lord ne cheke eghu, Ghotilo naiknomi Saion! Ghotilo glealeꞌa! Ghotilo naiknomi Jerusalem! Ghotilo mala eha fabiꞌo! Filo ghotilo! Nomi King ghotilo la mei gognarona. Puhigna na doglo fabrahu, eghuteuna mana la uludihi nogna naokare. Nu mana nhaꞌa faparini thegna, eghuteuna mana saghe mei ka kaisei sua dongki.

¹⁰ “Iara ginauna hata fadelei hose nei chariot teu igre mala theome magra mae soldia di Israel nei Jerusalem. Iara ginauna goigoni fahui nodi phaloho mala magra mare are. King igne ginauna au fakeli baludi keha kantri are nei king di keha kantri te funu ke maghati Thongna Lehe tei posani thongna ke mosu, eghuteuna funu ke raru Khoꞌu biꞌo Iufretis, tei posa ka khukrugna nauthoglu.”

Lordreireghidi nogna naiknore

¹¹ Lord ne cheke eghu, “Iara neke nhaꞌa chekehi balumi ghotilo, eghuteuna dadaradi fafara ra thofa soru mala farerheta gna nhaꞌa cheke igne. Eghume, iara ginauna togho ghami ghotilo mala snagla tei ghotilo ka vido aheva teke huhuru ghami mala tei au tagna, aheva jateula seu teu te theome au kaisei khoꞌu tagna.

¹² Ghotilo jateula te au ka suga sosolo eghu. Nu ghotilo iheire te au nomi fatutuani ka Lord te mala fakarhi ghami na, ghotilo gognarona tangomana teke pulo mei ka nomi vido mala poru na! Eghuteuna naugna ghotilo te papara fara na, ka narane igne nhaꞌa cheke, iara ginauna fablahi ghami nei phei fata nhaꞌa ari glepo te keli ke klignadi puhi biꞌo teke thoke ghami ghotilo tifa ra.

¹³ Ghotilo naiknomi Juda! Ghotilo mala jateula nogu phaloho eghu iara. Ghotilo naiknomi Israel! Ghotilo mala jateula nogu jata eghu iara. Eghuteuna ghotilo naiknomi Saion, ghotilo mala jateula nogu naflahi mala magra eghu iara, mala goigonidi naiknodi Gris.”

¹⁴ Lord ginauna mei ka nogna naiknore, eghuteuna jata te fada mana na kafli jateula nakafli eghu. Lord ginauna ifu nogna trampet biꞌo na, eghuteuna kate nolo te mei na, mana ginauna jateula nuri biꞌo te ghaghafa mei ke mata ra eghu.

¹⁵ Lord mae ihei te au nolaghi fateote'o igne, mana ginauna reireghi nogna naiknore jateula kaisei greoreo eghu. Nogu naikno iara re ginauna falehedi nei uludi eghu nodi naoka te piri kuava ka mare re. Kate uluni magra na, mare ginauna eha fabiꞌo jateula mae te koꞌu waen te thaviru ra eghu kate ghamu nei koꞌu teu mare na. Mare ginauna boho fara, jateula dis te fodu ka dadara mala fafara te mala tofa ka olta ra neu.

¹⁶ Ka narane tuana, Lord ginauna fakarhidi nogna naiknore, jateula mae te reireghidi nogna sipu ra eghu. Mare ginauna au fakeli nodi ka nodi glose na. Lord ginauna keli tagna ka mare jateula king te keli tagna ka thofno famane thina te siasigla ka nogna khepi nafnakno ia eghu.

¹⁷ Naiknore ginauna keli nei famane fara eghu! Eghuteuna famane gano nei waen teu ka nodi glose na igre, ginauna mala ghamu nei koꞌu eghu mae nalhaꞌu majaghani nei gaꞌase majaghani teu igre mala rheta thinidi re.