Profet Sekaraea 8 - Buka Blahi Ka Cheke HoloLordnhaꞌa cheke mala fablahini Jerusalem 1-2 Keha fata Lord mae ihei te au nolaghi fateote'o igne, ne cheke eghu ka iara, “Iara au nogu thofno gaoghatho rheta ranghini Jerusalem. Eigna igne iara namhadi fara nogu naiknore, eghuteuna iara diꞌatagu fara ka nogna naoka re. 3 “Iara cheke tutuani fara: Iara ginauna nake figri Jerusalem, eghuteuna iara ginauna au ke kligna Thogele Saion. Naiknore ginauna tangomana te cheke eghu na, ‘Namono Jerusalem te ghatho tahuni Lord fabrahuni naiknore igne. Eghuteuna nogna thogele Lord mae ihei te au nolaghi fateote'o igne, ginauna kiloni thogele blahi.’ 4 “Goro mae biꞌo nei goro naikno biꞌo teu igre ginauna tangomana te gnokro ka glalaba gna namono tuana, aheva te salo fodu naiknore tagna. Neubane mae kuekuꞌe, ba khaekave fara, ginauna mala atha khodo mala nolo tafri ke lamna namono. 5 Eghuteuna namono igne ginauna nake fodu ka goro sua te au ka nabrou ba lalahu ke lamna namono.” 6 Naikno te karha teure nake pulo mei ka nodi namono re, mare na gaoghatho eghu ka nagnafadire, “Tore! Glepo igre thofno ninhigrana fara!” Nu iara Lord iara au nogu nolaghi fateote'o, eghuteuna theo kaisei glepo te ninhigrana ka iara. Igne nogu cheke iara Lord. 7 “Iara cheke ka ghotilo tutuani fara: Ka vido aheva mae naoka teke huhurudi nogu naikno iara gre mala tei au tafri delei, ke maghati nei ke mosu, iara ginauna fakarhidi mare. 8 Iara nake atha fapulodi Jerusalem. Mare ginauna nogu naikno iara, eghuteuna iara ginauna nodi God mare. Eghuteuna iara ginauna ghatho tahudi fabrahu, eghuteuna funei frunidi ka puhi te doglo.” 9 Lord ne cheke eghu, “Naiknodi Israel! Ghotilo iheire te nomhidi cheke teke cheke mae profet ka narane teke eni mare thina famamhaku gna nogu Sugablahi iara Lord mae ihei te au nolaghi fateote'o. Ghotilo mala famamhaku nagnafami re, mala tangomana ghotilo te loku fagnafa suga igne. 10 Tifa ka narane tuare, naiknore theo nodi sileni mala foli naikno nei glepo tautagu eghu mala loku. Theo kaisei naikno tangomana te ei nogna bisnis na naugna mae naoka igre faninhigrana fara nakarha na ranghidi naiknore. Eghuteuna iara na snakredi mare mala goigonidi kheradi re. 11 Nu iara cheke tutuani ka ghotilo: Gognarona, iara ginauna theome eni ka ghotilo te karha teura jateula teke eni iara tifa ia eghu. Tutuani, iara ginauna fakeli ka ghotilo. 12 “Ghotilo ginauna tangomana te au fakeli, eghuteuna nomi nagare ghotilo are ginauna kotu fakeli. Nomi gaju grep ghotilo are ginauna ure kmana sisi, eghuteuna gano te joꞌu ghotilo re ginauna au kmana gano, naugna famane nakhete ginauna mei. Leuleghu fata iara ginauna fablahidi iheire te karha teu ka glepo te keli igre. 13 Ghotilo naiknomi Juda nei Israel teura, tifa na naiknodi keha kantri igre neke tibri ghami ghotilo mala thoke mei puhi biꞌo ka naiknore. Nu iara ginauna fakarhi ghami ghotilo, eghuteuna ghotilo ginauna jateula kaisei fablahi keli eghu ka keha naiknore. Eghume ghotilo thosei mhaghu, ghotilo famamhaku gaoghathomi re. 14 “Tifa na, iara neke diꞌatagu ka kuꞌemi ghotilo ra. Iara neke ghaoghaho mala snakreni puhi biꞌo igne mala thokedi mare, eghume iara neke paradi mare. 15 Nu gognarona iara ghaoghathohi te mala eni glepo te keli na ranghini Jerusalem nei Juda. Eghume ghotilo thosei mhaghu. 16 “Nu igne unha te mala eni ghotilo na: Ghotilo mala cheke tutuani fabrahu ka keha naiknore. Kate fatedi ghotilo naiknore ka kot, ghotilo mala fate ka puhi te doglo nei mala au fakeli mare. 17 Ghotilo thosei eni kaisei gaoghatho te diꞌa mala goigonidi kherami re. Eghuteuna kate eni ghotilo nhaꞌa cheke na, ghotilo thosei chaghi. “Puhi te chaghidi naiknore igne, goigonidi kheradire, eghuteuna fateni naikno na ka puhi te theome doglo, puhi igre iara thofno tirogudi.” Igne nogna cheke Lord. 18 Keha fata, Lord mae ihei te au nolaghi fateote'o igne, mana chekeni nogna cheke na ka iara. 19 Mana ne cheke eghu, “Naiknodi Juda. Leuleghu finogha ka fafati nhigra, nei ka falima nhigra, nei ka fafitu nhigra, nei ka fabotho nhigra, ghotilo neke eni narane biꞌo te mala thosei ghamu ghotilo na. Nu gognaro na, nhigra igre, nhigra mala ei gaghamu biꞌo mala gleale'a ghotilo. Ghotilo magnahagheini fara te cheke kate tutuani nei mala au fodu fakeli.” 20 Igne unha te chekeni Lord: “Naikno funudi ka namono te kmana ka keha kantri are ginauna mei Jerusalem. 21 Ka narane igne, naiknogna kaisei namono na ginauna cheke eghu ka naiknogna keha namono na, ‘Gognarona ghehati tei mala tarai nei kilo fnaknoni eghu Lord mae ihei te au nolaghi fateote'o, mala fablahi ghami mana. Te keli na ghotilo mei balumi ghehati, mala tei fodu tahati.’ 22 Kmana naikno funudi ka kantri te nheta tulao ginauna mei Jerusalem mala kilofnakno ghau iara Lord. Eghuteuna mare ginauna mei tore ghau iara mala fablahidi. 23 “Ka narane tuana, nabotho mae phosa te nhogri nodi cheke re ka nauthoglu igne ginauna hata nogna pohe kaisei Jiu, na cheke faheta eghu ka mana, ‘Iagho snakre ghami ghehati mala tei balumi ghotilo Jerusalem, naugna ghehati nomhini God na au balumi ghotilo.’ ” |
© 2022, Wycliffe Bible Translators , Inc. All rights reserved.
Wycliffe Bible Translators, Inc.