Profet Sekaraea 7 - Buka Blahi Ka Cheke Holo

Puhi te doglo te mala fafnaknoniLord

¹ Ka fafati narane ka faheva nhigra, nhigra Kislev, fafati finogha gna King Darius te funei fruni kantri Pesia, keha nonomho na ne mei mae Sekaraea funugna ka Lord.

^2-3 Ka narane tuana, naiknodi namono Betel neke kuru teidi mae Saresa ghe Regem-Melek baludi nodi mae glokure mala tei ka nogna Sugablahi Lord mae ihei te au nolaghi fateote'o. Mare ne ghusna eghu ka hatimare mae pris nei profet teu ka Sugablahi na, “Leuleghu fata funu tifa te mei na, tahati tathaji puhi te mala thosei ghamu nei diꞌanagnafa nei tanhi teu ka falima nhigra leuleghu finogha naugna mae naoka neke goigoni nogna Sugablahi Lord. Ba? Keliu ngala te eni fabrahu glepo igne, ba theo?”

⁴ Aonu Lord ne cheke mei nogna cheke na ka iara. Mana ne cheke eghu,

⁵ “Sekaraea, iagho ghusnadi mae pris nei naiknogna kantri igne: Ka fitu salei finogha te liu ra, ka falima nhigra leuleghu finogha, eghuteuna jaola ka fafitu nhigra na, ghotilo neke theome ghamu nei mala diꞌanagnafa nei tanhi. Ba? Ghotilo eni fabrahu igne mala fafnakno ghau iara? Theo.

⁶ Gognaro na ghotilo eni nafnata puhi igne kate ghamu nei koꞌu teuna mala fafnakno ghami themi kolho mala glealeꞌa.

⁷ Ba, cheke igreu ngala Lord teke cheke ka mae profet tifa ra, ba theo? Uve, cheke turau ngala teke nomhidi kuꞌemi ghotilo tifara, eghuteuna namono biꞌo Jerusalem neke au fakeli nei fodu ka glepo te keli neku. Kmana naikno neke au ka namono tuana, nei ka keha namono te au falithui. Eghuteuna ka narane tura, kmana naikno jaola neke au ka namono nagou ke mata Juda, nei ka thogele ikodi ke mosu.”

⁸ Lord ne cheke mei ka iara nogna nonomho na. Mana ne cheke eghu,

⁹ “Leuleghu fata na iara Lord cheke eghu koba ka nogu naiknore: ‘Ghotilo mala fatedi naiknore ka puhi te doglo, eghuteuna ghotilo mala keli ranghidi nei kokhonidi eghu keha naiknore.

¹⁰ Ghotilo thosei tapla faparidi naikno biꞌo, nei goro sua glehe kokoi, nei naikno phosa te mei au balumi ghotilo, nei iheire te kuma. Eghuteuna ghotilo thosei ghaoghatho mala goigonidi keha naiknore.’

¹¹ “Nu khuꞌemi ghotilo tifa ra neke patu gama fara, eghuteuna mare tirodi fanomho ka nogu cheke iara re. Mare kafe figri tagru ka iara,

¹² eghuteuna gaoghathodi re maku jateula thina eghu. Igne te diꞌatagu fara iara ka mare, naugna mare ne theome magnahaghei te leghudi vetula nei cheke eghu te chekedi Tharungagu iara na ka mae profet tifa ra.

¹³ “Kate eha iara ka mare na, mare tirodi fanomho. Aonu kate eha mei mare ka iara na, iara jaola tirogu fanomho ka mare.

¹⁴ Naugna te eni mare igne, iara mei jateula saeklon eghu mala kafe brue teidi delei mala tei au tafri ka keha kantri delei. Eghuteuna famane glose teke kulu au mare tadira, krogha, mala theo kaisei naikno tangomana te au tagna na.”