Profet Sekaraea 6 - Buka Blahi Ka Cheke Holo

Fahana mifi: Fati chariot te korho ka hose

¹ Iara neke filoni keha mifi na, eghuteuna ka mifi igne iara ne filodi fati chariot mala magra ne jifla mei fari hoteidi phei thogele te siasigla jateula bras eghu.

² Iara filoni chariot ulu lahu na, hose ukru igre te korho na, eghuteuna fapea chariot, hose pipito igre te korho na.

³ Fatilo chariot, hose vegha te korho na, eghuteuna fafati chariot, hose te doadora vegha nei pipito eghu te korho na. Hose te gnafa igre nheta fara.

⁴ Iara ne ghusna eghu ka engel te cheke teu balugu iara na, “Mae biꞌo, unha eghu gaoghathodi re glepo igre?”

⁵ Mana ne cheke eghu, “Gaoghathogna na, igre fati nuridi kligna te jifla mei funu ka Lord mae ihei te mae Funei gna nauthoglu igne.

⁶ Chariot mala magra te korho hose pipito igre ginauna tei ke raru, eghuteuna chariot te korho hose vegha igre ginauna tei fei ke mosu. Eghuteuna chariot te korho hose te doadora vegha nei pipito teu igre, ginauna tei ke mata.”

⁷ Kate korho te mei hose te nheta igre chariot igre, iara filodire reꞌe theome magnahaghei te paipalighi. Reꞌe magnahaghei kolho te faghosei te tei tafri ka nauthoglu igne. Eghuteuna engel igne ne cheke eghu, “Ghotilo tei ka vido te gnafa ka nauthoglu igne!” Aonu mare jifla ne tei.

⁸ Eghuteuna engel igne eha mei ghau iara ne cheke eghu, “Filo! Naugna te tei hose pipito igre ka kantri ke raru, diꞌatagna Lord ne soru pari.”

Khepi nafnakno malagna pris biꞌo Josua

⁹ Eghuteuna chekegna Lord igne neke mei ka iara. Mana ne cheke eghu,

¹⁰ “Iagho hata namha teke tufa ka iagho mae Heldae, mae Tobaeja, nei mae Jedaea, eghuteuna iagho faghose tei ka sugagna mae Josaea, thugna mae Sefanaea. Thilo mae igre ao ngala ke pulo meinga funu Babilonia, vido aheva mae naoka teke huhurudi thilo mare te mala au tagna.

¹¹ Iagho eni kaisei khepi nafnakno ka silva nei gol eghu teke tufa thilo mare ka iagho ra. Eghuteuna iagho lisa lao ka phaꞌugna pris biꞌo Josua, thugna Jehosadak.

¹² Eghuteuna iagho cheke ka mana eigna Lord mae ihei te au nolaghi fateote'o igne neke cheke eghu, ‘Fanomho mei! Mae ihei te kiloni nanghagna na Grege igne ginauna biꞌo haghe nei nheta eghu. Mae igne ginauna nake babana fapuloi nogu Sugablahi iara na,

¹³ eghuteuna naiknore ginauna ghatho tahuni mana jateula king eghu. Eghuteuna kate funei frunidi nogna naiknore, kaisei pris ginauna kegra fabrahu rhegna mana. Leuleghu fata na phia mare ginauna loku fodu ka kaisei gaoghatho kolho, nei au fakeli.’

¹⁴ Eghuteuna khepi nafnakno igne ginauna au fabrahu ka nogna Sugablahi Lord jateula kaisei tuthuana mala ghatho tahudi mae Heldae, mae Tobaeja, mae Jedaea, nei mae Josaea thugna mae Sefanaea.

¹⁵ Naikno te au ka keha kantri delei ra ginauna mei mala totogho mala ke babana fapulo nogna Sugablahi Lord. Kate eni igne, ghotilo ginauna laseni Lord mae ihei te au nolaghi fateote'o igne kuru mei ghau iara ka ghotilo. Mana noda God tahati, eghuteuna jame te loku heta ghotilo te leghuni mana na, gobigna lepore ginauna keli ranghi ghami ghotilo.”