Profet Sekaraea 5 - Buka Blahi Ka Cheke Holo

Fafamno mifi: Pepa brahu flalo ne mei

¹ Iara neke filoni keha mifi na, eghuteuna ka mifi igne iara ne filoni kaisei pepa brahu flalo ne mei.

² Eghuteuna engel teke cheke balugu iara na ne ghusna eghu ka iara, “Unha te filoni iagho na?” Iara ne cheke eghu ka mana, “Iara filoni kaisei pepa brahu flalo ne mei. Eghuteuna brahugna na thokeni nheva mita, eghuteuna krepagna na thokeni fati vido gna mita.”

³ Mana ne cheke eghu ka iara, “Pepa brahu igne au tagna cheke mala ei puhi biꞌo mala mei thokedi naikno te gnafa ka glose igne. Ka kaisei philegna na chekedi mae te gnafa re mala blau, Lord ginauna ngolhi fajifladi mare. Eghuteuna ka keha phile na cheke ka mae ihei te chaghi kate nhaꞌa cheke na, Lord ginauna ngolhi teidi mare.

⁴ Igne unha te chekeni Lord mae ihei te au nolaghi fateote'o. Mana ne cheke eghu, ‘Iara ginauna fatei cheke ka sugadi mae mala blau, nei ka sugadi mae ihei re te chaichaghi kate nhaꞌa cheke. Eghuteuna puhi biꞌo igne ginauna goigoni thaba te gnafa nei thina ka suga igre, ghilei thono diꞌa fara.’ ”

Fafitu mifi: Gaꞌase te gnokro lamna ka kaisei kharaꞌo

⁵ Iara neke filoni keha mifi na, eghuteuna ka mifi igne iara ne filoni engel teke cheke balugu iara na mana neke mei ka iara, ne cheke eghu, “Ei! Filo haghe! Kaisei glepo na mei hila!”

⁶ Iara ne ghusna eghu ka mana, “Unha nafnata glepo signea?” Aonu mana ne cheke eghu, “Kaisei kharaꞌo biꞌo mala fafaja glepo. Igne fagaglana ka nakhibodi naikno ka glose igne.”

⁷ Iara filoni kharaꞌo igne fofothogna na tahu te mala tothora na. Kate filo teu iara na, fofothogna kharaꞌo igne ne thora, aonu iara ne jaglo nogu te filoni kaisei gaꞌase te gnokro lamna na.

⁸ Engel igne ne cheke eghu, “Gaꞌase igne fagaglanadi puhi te diꞌa eidi nakhibo.” Eghuteuna mana huju soru gaꞌase tuana lamna kharaꞌo, neke fofotho fapulo.

⁹ Aonu iara filo haghe ne filodi keha phei gaꞌase flalo ne mei. Baghidi repa re rheta fara jateula baghi gaghata eghu. Repa flalo ne soru mei ne atha kharaꞌo igne flalo ne tei baludi.

¹⁰ Iara ne ghusna eghu ka engel igne, “Aheva teke atha repa kharaꞌo tuana?”

¹¹ Mana ne cheke eghu, “Repa atha tei ka kantri Babilonia. Ka vido tuana mare ginauna horo kaisei Sugablahi malagna kharaꞌo tuana, eghuteuna kate gnafahi suga igne, mare ginauna lilisei kharaꞌo tuana lamna ka nogna vido na.”