Profet Sekaraea 4 - Buka Blahi Ka Cheke Holo

Falima mifi: Kaisei thaba gol mala lilisei juta nei phei gaju oliv

¹ Iara neke filoni keha mifi na, eghuteuna ka mifi igne iara ne filoni engel teke cheke balugu iara igne. Mana mei farhani ghau iara, jateula te magnahaghei fadofra ghau iara ra eghu.

² Mana ne ghusna eghu, “Unha te filoni iagho gognarona?” Iara ne cheke eghu ka mana, “Iara ne filoni kaisei thaba mala lilisei juta teke horo mare ka famane gol. Kligna ka thaba igne au kaisei dis mala lilisei oel. Eghuteuna ke klignadi fitu juta igre kafe au fitu wik mala phaedi fitu juta igre.

³ Phei gaju oliv jaola kegra rhedi juta igre, kaisei fei nhetagna, eghuteuna keha na fei maerigna.”

⁴ Aonu iara ne ghusna eghu ka engel igne, “Mae biꞌo, unha eghu gaoghathodi re glepo igre?”

⁵ Mana ne cheke eghu ka iara, “Ba? Iagho theome lasedi gaoghathodi glepo igre?” Eghuteuna iara ne cheke eghu ka mana, “Theo, iara theome lasedi.”

⁶ Aonu engel igne ne cheke eghu ka iara, “Igne nogna cheke Lord ka mae Serababel: ‘Iagho nei nou naikno re eghu theome edi nogu gloku iara re ka nomi nanheta, nei ka nomi nolaghi ghotilo themi. Nu ka Tharungagu iara kolho.’ Igne nogna cheke Lord mae ihei te au nolaghi fateote'o.

⁷ “Ka Tharunga igne, Serababel tangomana te uludi gobigna lepo te ninhigrana te fanograni mana te theome tangomana mana te loku fagnafani nogna Sugablahi Lord. Uve, mana jateula te eni kaisei thogele biꞌo te mala vido sare ra eghu. Eghuteuna kate lilisei mana thina leghu lahu ka suga igne, naiknore ginauna eha eghu fabiꞌo, ‘Keli fara! Keli fara!’ ”

⁸ Eghuteuna engel igne ne cheke mei ka iara cheke teke mei funu ka Lord,

^9-10 “Serababel thegna teke lilisei famamhaku gna Sugablahi igne, eghuteuna mana thegna ginauna jaola eni fagnafa gloku ka suga igne. Gognarona keha naiknore ghatho faparidi glepo ikodi te edi mae gloku re igre, naugna gloku igne thoghei kolho. Nu kate filoni mare mae Serababel te eni thina leghu lahugna Sugablahi igne te mala doglo na, naiknore ginauna glealeꞌa fara.” Aonu iara ne cheke eghu, “Serababel, kate edi te fagnafa glepo igre, iagho ginauna laseni Lord mae ihei te au nolaghi fateote'o igne mana kuru ari ghau iara ka ghotilo.” Aonu engel igne ne cheke tughuni nogu faghusna iara na ne cheke eghu, “Fitu juta igre jateula fitu tathagna eghu Lord, te filo ka vido te gnafa ka nauthoglu igne.”

¹¹ Aonu iara ne ghusna eghu ka mana, “Nu unha gaoghathodi phei gaju oliv te kegra ka phei philegna thaba igne?”

¹² Iara neke cheke eghui ka mana, “Phei paep te horo mare ka gol igre au ke pari ka phei grege gaju oliv, eghuteuna oliv oel na loloro jifla mei ka phei paep igre. Unha eghu gaoghathodi glepo igre?”

¹³ Mana ne cheke eghu ka iara, “Ba? Iagho theome lasedi gaoghathodi glepo igre?” Eghuteuna iara ne cheke eghu ka mana, “Theo, iara theome lasedi.”

¹⁴ Aonu mana ne cheke eghu, “Lord funei frunidi gobigna lepo ka nauthoglu igne, eghuteuna phei glepo igre, eidi phia mae nate vavahi mana te mala edi nogna gloku re.”