Profet Sekaraea 3 - Buka Blahi Ka Cheke Holo

Fafati mifi: Pris biꞌo Josua

¹ Iara neke filoni keha mifi te fakakhana Lord ka iara na. Ka mifi igne, iara filoni pris biꞌo Josua kegra ke ulugna nogna engel Lord. Eghuteuna Satan jaola kegra jare, fei nhetagna pris biꞌo, eghuteuna Satan tarabana keha nogna gaoghatho mala cheke faparini Josua.

² Eghuteuna Lord ne cheke faheta eghu ka Satan, “Satan! Iagho au kmu! Iara Lord mae ihei teke vahini Jerusalem mala au iara tagna, iara gognarona cheke ka iagho mala au kmu kolho. Mae Josua gne jateula kaisei gaju te hata fajifla ke lamna khaꞌaghi te theome nhako ra eghu.”

³ Pris Josua gne kegra fabrahu neu jare, nu nogna pohe na thofno thona fara.

⁴ Engel igne ne cheke eghu ka mae te kegra faligohoni mana igre, “Ghotilo hata koko nogna pohe thona mana tuana.” Eghuteuna, mana ne cheke eghu ka Josua, “Filo sagho! Iara la hata kokohi nakhibomu iaghore. Gognaro na, iara ginauna tusu ari famane pohe mala pipichi iagho.”

⁵ Eghuteuna iara jaola ne cheke eghu, “Mare tangomana te nhaꞌa lao kaisei khepi majaghani ka phaꞌugna pris biꞌo na.” Aonu mare ne nhaꞌa lao kaisei khepi ka phaꞌugna mana na, eghuteuna fapichini ka pohe majaghani, eghuteuna engel nogna Lord te kegra teu jare igne ne filoni.

⁶ Engel nogna Lord ne cheke faheta eghu ka Josua,

⁷ “Lord mae ihei te au nolaghi fateote'o igne ne cheke eghu, ‘Jame te leghuni iagho puhigu iara te doglo gne nei faꞌuvedi iagho nogu vetula iara gre teuna, iara ginauna snakre nigho iagho mala reireghini nogu Sugablahi iara gne baludi glalaba blahi te lithuini. Eghuteuna iara ginauna togho nigho iagho mala au nou nolaghi iagho te mei kegra ke ulugu iara, jateula iheire te kegra fabrahu ke ulugu iara igre eghu.

⁸ “ ‘Pris biꞌo Josua, famane fanomho mei ka iara. Eghuteuna ghotilo keha pris te loku ke parigna nogna nolaghi mana ra, ghotilo jaola mala famane fanomho mei ka iara. Ghotilo te gnafa na mala jateula fagaglanadi eghu famane glepo nate thoke mei thogheiro. Nogu mae gloku iara nanghagna Grege igne, iara ginauna falalase ka ghotilo.

⁹ Filo! Iara Lord mae ihei te au nolaghi fateote'o igne la liliseihi kaisei thina ke ulugna Josua. Thina igne au fitu phile tagna, eghuteuna iara ginauna rioriso kaisei cheke tagna. Eghuteuna ka kaisei narane kolho, iara ginauna hata koko nakhibodi naiknogna glose igne.

¹⁰ “ ‘Kate thoke mei narane tuana, ghotilo te gnafa na ginauna tangomana te eha meidi kherami re mala mei gnokro balumi paridi nomi gaju fig nei gaju grep ghotilo te kafe kelitamidi, te au fakeli.’ ”