Profet Sefanaea 3 - Buka Blahi Ka Cheke Holo

Lordne atha fadelei nakhibodi naikno te au ka namono Jerusalem

¹ Jerusalem! Iagho ginauna groꞌe theo tokamu! Naugna puhidi naikno igre jateula chara eghu, eigna mare ne huhughu nei goigonidi neu naiknore.

² Naikno igre theome nomhini chekegna Lord na, eghuteuna mare theome magnahagheni Lord te mala fadoglidi puhidi te diꞌa re. Eghuteuna mare theome fatutuani nei tirodi toreni Lord mala toghodi.

³ Hatimare mae lida ka namono biꞌo Jerusalem, mare jateula lion te rofo te ku'e tafri ra eghu. Eghuteuna mae biꞌo ka namono igre, mare jateula khuma te rofo te ghamu fateo ghegna gano ra eghu. Eghuteuna theome lisei faleghu kaisei nhubra malagna keha narane na.

⁴ Hatimare mae profet igre fahaeghe fara, eghuteuna mare toutonu eidi unha te theome mei funudi ka Lord. Mae pris igre mare lausasaba di kolho glepo te blahi re, eghuteuna mare theome leghuni nogna vetula God te mala toghodi thedi na.

⁵ Nu Lord mae ihei te au teu Jerusalem igne, mana eni unha te doglo na. Mana theome tangomana te eni unha te diꞌa na. Leuleghu narane na mana eni koba unha te keli na ranghidi nogna naiknore. Neuba, naikno te au ka namono igne theome mamaja te edi puhi te diꞌare.

⁶ Lord ne cheke eghu, “Iara neke roꞌedihi naikno te gnafa, baludi nodi namono te bara te maku teu igre. Eghuteuna ginauna na theo kaisei naikno nate nolo tafri ke lamnagna nabrou na, naugna theo kaisei naikno te au faleghu na.

⁷ Te chekeni iara na, naiknore ginauna filoni puhigu iara na mhaghu nodi fara, eghuteuna mare magnahaghei ghau iara te mei fadogli re. Jame fanomho fakeli mare ka nogu cheke iara igre meuna, iara ginauna theome roꞌedi mare. Nu mare kegra haghe edi koba puhi te diꞌare salaꞌudi puhi teke edi tifa ra.”

⁸ Aonu Lord ne cheke eghu, “Ghotilo ofoni kolho Narane nate fatedi iara naiknodi soasopaigna kantri igre. Naugna, iara diꞌatagu fara ka naikno igre. Eghuteuna gaoghatho te mala salo meidi naikno igre te mala paradi re la auhi ka nagnafagu iara na. Eghume, diꞌatagu iara igne ginauna brana fara salaꞌui jateula khaꞌaghi eghu, eghuteuna iara ginauna roꞌe fahuidi nodi namono te gnafa mare are.

⁹ “Ka Narane igne, iara ginauna tusu lao gaoghatho majaghani ka naikno te au ka kantri igre. Uve, gaoghathodi naikno igre ginauna majaghani mala pogho soru ghau iara, nei mala kaisei nagnafa eghu mala leghuni chekegu iara na.”

¹⁰ Eghuteuna nogu naikno iara te au ka kantri Sudan, nei ka keha vido te au khaba fara igre ginauna hata mei fafara ka iara.

¹¹ Ka narane tuana, ghotilo ginauna na theome mamajadi puhi te diꞌa teke edi ghotilo tifa ra. Naugna igne iara ginauna brue fajifladi naikno te fahaehaghe nei huhughu teu igre. Eghuteuna ghotilo ginauna au ka nogu Thogele blahi iara igne Jerusalem, eghuteuna ghotilo ginauna theome figri tagru ghau iara.

¹² Iara ginauna snakredi naikno igre mala au Jerusalem, iheire te au fapari nei iheire te rouronu ka God te mala toghodi re.

¹³ Naiknodi Jerusalem te au faleghu teu igre ginauna theome eni kaisei puhi te diꞌa ranghidi keha naiknore. Eghuteuna theo kaisei naikno nate cheke chaichaghini nei majorani teu kheragna fofodu na. Mare ginauna au blagna nodi jare, eghuteuna theo kaisei naikno nate famamhaghudire.

Kaisei khoje mala gleale'a

¹⁴ Ghotilo naiknomi Israel! Ghotilo eha nei koje balu gleale'a! Ghotilo naiknomi Jerusalem, gleale'a ka nagnafami fateote'o!

¹⁵ Lord na theome para ghami ghotilo, eghuteuna mana brue fajifladihi nomi naoka ghotilo ra. Lord gognarona king gna Israel, eghuteuna mana au balumi ghotilo. Eghume, ghotilo theome tangomana te mhaghuni kaisei glepo na.

¹⁶ Ka Narane tuana, naiknore ginauna cheke eghu ranghini Jerusalem, “Iagho namono Saion, thosei mhaghuni kaisei glepo. Thosei snakreni namhaghu na faglaꞌe nigho.

¹⁷ God, nomi Lord ghotilo na au balumi. Nogna nolaghi mana na ginauna togho ghami mala uluni ghotilo magra na. Lord ginauna kelitagna ka ghotilo, eghuteuna nogna namha na ginauna tusu ranghi ghami nakarha majaghani. Aonu mana ginauna koje jateula naikno te gleale'a te koje ka narane biꞌo ra eghu.”

¹⁸ Lord ne cheke eghu, “Iara neke fagnafadihi nomi naꞌau papara, nei hata fadeleihi mamajami ghotilo naiknomi Jerusalem.

¹⁹ Ka Narane tuana iara ginauna paradi mae naoka teke fakokhoana ghami nei para ghami teku ghotilo ra. Ghotilo iheire te diꞌa ghahemi ra, nei iheire te au tafri ka keha kantri ra, iara ginauna nake hata fapulo ghami ka nomi thofno namono na. Gognarona ghotilo mamaja nomi ka tathadi keha vike igre, nu iara ginauna na hata fadelei mamaja igne mala tusu ari nafnakno biꞌo ka ghotilo. Eghuteuna naikno te gnafa teke filo fapari ghami ghotilo ka nauthoglu igne ra ginauna filo haghe ghami ghotilo.

²⁰ Ka Narane tuana, iara ginauna hata fapulo ghami ka nomi thofno namono na. Aonu iara na tusu ari nafnakno biꞌo ka ghotilo, eghuteuna naikno te gnafa ka nauthoglu igne ginauna filo haghe ghami ghotilo. Iara ginauna togho ghami ghotilo fabrahu mala au ghotilo kau pharikeli! Iara Lord te chekeni igne.”