Profet Obadaea 1 - Buka Blahi Ka Cheke Holo

God ginau roꞌeni kantri Idom

¹ Lord God neke tusu lao nogna cheke na ka profet Obadaea mala toutonu mana ranghidi naikno te au ka kantri Idom unha te magnahagheni God na. Mana ne cheke eghu, “Tahati la nomhinihi theda cheke teke cheke eghu mana igne, ‘Tarabana mala tei magra Idom!’ ”

Lordne cheke ranghidi naiknodi Idom

² Lord ne cheke eghu ka naiknodi Idom, “Iara ginauna hata koko nolaghi na ka ghotilo. Eghuteuna naiknore ginauna figri tagru ghami nei cheke fapari ghami eghu ghotilo.

³ Nomi nagnafa fahaehaghe ghotilo eigna nomi nanheta na igne thofno jafra fara. Ghotilo filoni nomi namono biꞌo te au ka thogele te bara te maku ka thina igne ngala te fahaehagheni ghotilo te cheke eghu igne, ‘Theome tangomana kaisei mae te nheta nate mei te roꞌe ghami ghehati na.’

⁴ Nu te chekeni iara ka ghotilo na, neuba ghotilo ne flalo kligna jateula gaghata neu, ba hohoro nomi suga fari hotei nathunu ka maloa kligna, iara ginauna koko soru ghami ghotilo pari.

⁵ Uve, ghotilo lasenihi igne. Kate mei bongiro mae te blau na te hata unha te magnahagheni na, mana ginauna lilisei faleghu unha te theome magnahagheni mana na. Eghuteuna kate ukli grep naiknore, mare ginauna lilisei faleghu kehare. Nu nomi naoka ghotilore ginauna mei para ghami ghotilo fara na theo kaisei glepo te au na.

⁶ Mare ginauna na mei hata nomi dedei te gnafa ghotilo vikegna mae Iso igre mala tei baludi.

⁷ Eghuteuna keha kantri teke nhaꞌa cheke ghotilo baludi mala togho ghami teku ra ginauna chaichaghi ghami kolho. Mare ginauna gigi ghami ghotilo mala jifla kokoni ghotilo nomi kantri igne. Kantri te loku fodu ghotilo tagna gognaro igne ginauna nake figri ke magra ka ghotilo. Eghuteuna ne kherami keli teu ghotilo te ima fodu baludi igre ginauna fakhale ghami ghotilo ka phighoro, eghuteuna ghotilo ginauna theome tangomana nate rikha na. Eghuteuna mae naoka gre ginauna na cheke eghu, ‘Filo si ghotilo, maedi Idom igre theo kaisei nodi glalase te keli.’

⁸ “Ka narane nate groꞌe te theo tokagna kantri Idom igne, iara ginauna fasnividi phaꞌudi nomi mae glalase ghotilo are mala theome laseni mare kaisei glepo.

⁹ Ghotilo maemi ka namono biꞌo Teman te lase magra ra, ghotilo ginauna mhaghu fara. Eghuteuna iara ginauna na kafe falehe ghami ghotilo mae soldia te gnafa ka vikegna mae Iso.”

Eigna unha te roꞌeni God naiknodi Idom

¹⁰ Lord ne cheke eghu, “Ghotilo naiknomi Idom, ghotilo blau nodi glepo kherami themi teke vikegna mae Jekop ra. Eghume, iara ginauna roꞌe ghami nei nhaꞌa fapari ghami eghu ghotilo mala mamaja nomi ghotilo.

¹¹ Tifa ka narane teke mei mae naoka ra, mare neke paꞌe grengathadi baragna namono biꞌo Jerusalem. Aonu mare neke hata fahui dedei gna Juda mala tufa fari hoteidi thedi. Ka narane tuia ghotilo neke kegra nekeu kolho delei neke theome toghoni Juda. Eghume, ghotilo jaola kaisei nanaba ka mae te blau igre.

^12-14 Ghotilo edi kmana glepo te theome doglo ranghidi kherami ka kantri Juda. Ghotilo kelitami nei gleale'a eghu kate filoni te groꞌe mare na. Ghotilo cheke faglauglahu balu maꞌe kate au diꞌanagnafa nei kokhonidi teu naiknore. Ghotilo gleale'a nei maꞌe eghu tei ruma ka sugadi naiknore mala tei hata nodi glepore. Ghotilo kegra farihotei nabrou mala lokidi maedi Juda te mala rikha nodi teure. Eghuteuna snakre laodi ka khamedi mae naoka re. Glepo te edi ghotilo igre theome doglo.”

God ginauna paradi keha kantri are eghuteuna toghoni kantri Israel

¹⁵ Lord ne cheke eghu, “Nogu Narane iara te mala fatedi naikno te theome leghu ghau iara igre la namo meihi. Unha te thono diꞌa fara teke edi ghotilo maemi Idom ra, iara nake tughu fapulo ka ghotilo. Ghotilo ginauna kabru ka puhi teke edi ghotilo ka naiknodi Juda ra.

¹⁶ Iara neke paradi naiknodi Juda ka nogu thogele blahi na. Nu iara ginauna para ghami ghotilo nogu naoka iara te au ka keha kantri delei, eghuteuna iara ginauna na fakoꞌu ghami ka khoꞌu te raha fara mala ghosei lehe nei dofi ghami eghu ghotilo.”

Israel ginauna uluni magra na

¹⁷ Lord ne cheke eghu, “Keha naikno te au ka Thogele blahi Saion igre ginauna theome lehe ka magra, naugna thogele igne nogu namono iara. Eghuteuna iara ginauna nake tusu fapulo namono igne ka vikegna mae Jekop.

¹⁸ Vikegna mae Jekop nei goro thugna teu igre ginauna mala jateula khaꞌaghi te roꞌeni namhata biꞌo na ia eghu roꞌeni vikegna mae Iso. Eghuteuna theo kaisei naikno nate karha teu ka vike igne.” Iara Lord te chekeni igne.

¹⁹ Naiknodi Israel te au ka nohi Negev ke mata Juda igre ginauna hata nogna thogele mae Iso ka kantri Idom. Eghuteuna naikno te au ka thogele te ikodi ke mosu Juda igre ginauna hata nodi vido glose mae Filistia. Eghuteuna keha vike ka mae Israel igre ginauna hata nodi vido glose maedi Efrem nei maedi Samaria eghu te au ke raru. Eghuteuna vikegna mae Benjamin igre ginauna leghuni Khoꞌu biꞌo Jordan mala hata nohi Gilead ke maghati na.

²⁰ Naiknodi Israel teke sosolo ka keha kantri tifa ra ginauna hata vido glose te funu Fonisia te tei posa ke raru namono biꞌo Sarefat. Naiknodi Jerusalem teke tei sosolo ka namono Sadis tifa ra nake pulo mei mala hata namono te au ke mata nohi Negev.

²¹ Maedi Jerusalem igre ginauna tei magra Idom mala hata nodi kantri mare na, eghuteuna mare ginauna funei frunidi mare. Eghuteuna iara Lord thegu ngala nate mae funei biꞌo na.