Profet Nahum 3 - Buka Blahi Ka Cheke Holo

Kokhonidi fara namono Ninive

¹ Kokhoni ghami fara ghotilo naiknomi Ninive ra! Nanghagna nomi namono ghotilo igne na, “Namono gna Dadara,” naugna ghotilo ne falehe naikno koba. Ghotilo naikno mala chaichaghi, eghuteuna nomi namono ghotilo igre fodu ka glepo te keli teke blau ghotilo ka keha naiknore ka vido aheva teke tei ghotilo ka magra na. Kmana fata ghotilo goigonidi koba keha naiknore.

² Nu fanomho ghotilo eghu! Ba, ghotilo tangomana nomhidi naogla te prosa, naogladi chariot, nei naogladi hose te chari te mei re?

³ Mae soldia te saghe ka hose igre chari mei mala falehe ghami ghotilo. Eghuteuna nodi naflahi mala magra nei nodi goru teure sigla fara jateula nakafli eghu. Eghuteuna thinidi mae te lehere kmana fara, eghuteuna theo kaisei naikno tangomana te kahadire. Thinidi naikno te lehe igre naga tafri kolho, eghuteuna mae soldiare namo uka ke klignadi.

⁴ Glepo igre ginauna thoke mei tutuani fara, naugna ghotilo ne jateula gaꞌase vine neu. Tathagna nei foflogna teu gaꞌase vine igne famane fara, eghuteuna naꞌa lase meresin mala chaghidi naiknore. Ka puhi igne ghotilo neke batudi naiknodi keha kantri igre mala leghudi puhimi ghotilo te diꞌare, eghuteuna ghotilo magnahaghedi mare mala nomi naikno sneka fabrahu. Naugna igne, Lord ginauna para ghami ghotilo.

⁵ Lord mae ihei te au nolaghi fateote'o na ne cheke eghu ka naiknodi Ninive, “Ghotilo fanomho mei ka iara! Iara figri tagru ghami ghotilo. Iara ginauna hata fadelei nomi dedei ghotilo are mala mamaja nomi ghotilo, jateula ghotilo te hata koko nogna pohe gaꞌase vine na te mala mamajani naꞌa ghotilo ra eghu. Eghuteuna iara ginauna snakredi naikno te gnafa ka nauthoglu igne mala filo tutu ka ghotilo mala mamaja nomi fara ghotilo.

⁶ Iara ginauna na famamaja ghami ghotilo, jateula te koko chara te boto ke klignami ghotilo ra eghu. Uve, iara ginauna filo fapari ghami ghotilo mala laseni naiknore te thono diꞌa fara ghotilo na.

⁷ Eghuteuna naikno te gnafa te filo ghami ghotilore ginauna rhana nodi fara na suaraghi fapulo rikha. Mare ginauna na cheke eghu, Namono biꞌo Ninive igne la thofno diꞌa fara gognarona. Ihei gne nate tanhi ni na? Theo kaisei naikno nate diꞌanagnafa na!”

⁸ Ghotilo naiknomi Ninive ra! Ba? Nomi nolaghi ghotilo na nheta fara salaꞌuni namono biꞌo Tebes ka kantri Ijep tifa ia? Theo! Khoꞌu biꞌo Nael na tei faligohoni namono biꞌo Thebes na jateula bara thina eghu.

⁹ Mae ka namono biꞌo igne neke funei frunidi phei kantri Itiopia ghe Ijep. Eghuteuna nodi nolaghi naiknodi Thebes igre thono rheta fara. Phei kantri Put ghe Libia igre neke fofodu fakeli fara ka mare.

¹⁰ Nu neuba namono biꞌo Tebes igne ne au nogna nolaghi biꞌo ngau, nogna naoka naꞌa igre na mei hata naikno gna namono igne mala sneka ka keha kantri delei. Mare na koko soru goro suare pari mala lehe ka vido te gnafa ka namono tuana. Eghuteuna mare na hata goro mae biꞌore mala haru ka chen. Mare hata ne tei goro mae biꞌo igre, mala lalahu khale mala tufa nodi naikno sneka.

¹¹ Ghotilo naiknomi Ninive! Mae naokare ginauna nake enila ka ghotilo unha teke eni ka mare tifara. Ghotilo ginauna na jateula kaisei mae te koꞌu te salaꞌui te taviru, eghuteuna fariuriu rikha tei mala poru ka vido te keli ra eghu.

¹² Nu vido te gnafa te mala poru ghotilo are ginauna theome maku. Vido tuare ginauna na jateula sisi gaju fig te muita hira eghu kolho. Jame te tei kaisei mae te vighoni gaju igne na, sisi te muitare ginauna kafe brusu pari ka foflogna mana na.

¹³ Filo si ghotilo naiknomi Ninive ra! Nomi soldia ghotilo are ginauna jateula gaꞌase eghu kolho na theome nheta! Eghuteuna grengatha gna nomi namono ghotilo igne ginauna kafe thorau kolho. Ghotilo ginauna na theome tangomana te fanagridi mae naokare. Naugna gaju mala bibilakhi di grengatha igre ginauna ghamu khaꞌaghi.

¹⁴ Gognarona ghotilo tarabana glepo mala magra te ginau eni fabrahu igne. Eigna mae naokare ginau mei bara ligohoni nomi namono biꞌo ghotilo igne, eghuteuna ghotilo ginauna na theome tangomana nate jifla na. Ghotilo mala toho kmana khoꞌu te mala koꞌu na. Ghotilo mala hata glose ukru, eghuteuna tapla ke kligna gna mala pila mala horo brik. Eghuteuna ghotilo mala horo famaku vido mala poru na.

¹⁵ Nu, neuba ne edi ghotilo glepo tuare, mae naokare ginauna gnubra ghami ghotilo, ba falehe ghami ghotilo ka magra. Mare ginauna goigoni ghami fara ghotilo, jateula cheche te goigoni fahui nagare ra eghu. Neuba ghotilo ne thovu ne kmana fara jateula cheche neu ghotilo ginauna theome tangomana te rikha na.

¹⁶ Eghuteuna nomi mae bisnis ghotilore kmana fara salaꞌudi nathunu ka maloa na are. Nu kate thoke mei puhi biꞌo na, mae bisnis igne ginauna hata nogna gobigna lepore rikha tei nogna, jateula bukrei cheche te flalo te tei nodi ke leghugna tela ghamu tela gnafahi nagare na ia eghu.

¹⁷ Mae biꞌo nei keha nogna mae gloku gavman igre, mare jaola kmana fara. Mare poru au nodi ka nodi namonore jateula cheche te poru teu lamna khora ka gringni thina ka vido te reka ra eghu. Nu kate mei te magra mae naoka igre na, mare jaola na rikha jateula cheche eghu flalo te tei kate haghe naprai na. Eghuteuna theo kaisei naikno te laseni ka vido aheva te tei reꞌe tagna na.

¹⁸ Mae King biꞌogna Asiria! Mae biꞌo te mala reireghidi nou naikno iagho ra la kafe lehehi. Eghuteuna nou mae mala baubatu iagho ra thuru kolho, eghuteuna mare ginauna na theome tangomana na teke dofra na. Eghume nou naikno iaghore ginauna tei tafri kolho ke kligna thogele jateula sipu eghu, eghuteuna theo kaisei naikno na teke hata fapulodire.

¹⁹ Iagho jateula kaisei mae te fnera eghu, eghuteuna theo kaisei meresin te mala famafogna na. Thubumu iagho igne ginauna falehe nigho iagho. Eghuteuna ihei te nomhini igne ginauna kelitagna fara na proaprosa. Naiknore na kelitadi fara ka glehemu iagho na, naugna iagho neke paradi fara naiknore.