Profet Nahum 2 - Buka Blahi Ka Cheke Holo

Naoka ginauna mei goigonini namono biꞌo Ninive

^1-2 Neuba nodi naoka mae Israel igre ne mei goigoni nodi namono nei hata nodi glepo te keli mae Israel igre neu, nu Lord ginauna toghodi mare mala ke keli fapulo, eghuteuna mana ginauna nake tusu fapulo nafnakno biꞌo nei nolaghi teu igre ka mare. Ghotilo naiknomi Ninive ra! Naoka te au nodi nolaghi te mala goigoni ghami ghotilo igre la meihi mala magra ka ghotilo. Ghotilo lilisei soldia ke kligna bara thina gna namono igne! Ghotilo reireghi fakeli nabrou are! Ghotilo tarabana nomi armi ra mala magra!

³ Ghotilo naiknomi Ninive ra fiofilo ghami! Nomi naoka ghotilo igre mare pipichi pohe ukru nei pala greoreo ukru eghu. Mare tarabanahi te mala mei falehe ghami ghotilo na. Nodi chariot mala magra re snire jateula khaꞌaghi eghu. Eghuteuna mae soldiare na tusu haghe nodi goru re, fagaglanagna tela tarabanahi te mala magra na.

⁴ Nodi chariot mala magrare chari tafri leghu nabrou ke lamna namono biꞌo, nei ke lamna glalaba. Chariot igre umhu fara jateula nakafli eghu, eghuteuna phae jateula nathunu eghu.

⁵ Mae funei gna armi na ehadi hatimare mae komanda tarabana mala magra. Mare ghosei tugha haghe ne namo uka pari kate chari te tei mae soldia igre ka baragna namono biꞌo na. Aonu hatimare mae naoka igre fakegra haghe kaisei greoreo biꞌo mala batudi mare mala huta lao kaisei phugra gaju biꞌo te mala paꞌe sorugna baragna namono igne.

⁶ Mare tora grengatha biꞌo te fanagra gna khoꞌu na, aonu khoꞌu na soru ne goigonini nogna suga king na.

⁷ Mare lokini Kuin ne hata teini naꞌa delei, eghuteuna nogna gaꞌase gloku naꞌare ne tanhi fara ne nguru nguru jateula balhu neu. Rehati tutu ka babangodire, naugna rehati ne thofno diꞌanagnafadi fara.

⁸ Naikno gna namono biꞌo Ninive igne na kafe rikha tei kokoni nodi namono na. Mae biꞌore na cheke faheta ka naiknore mala au kmu mala thosei jifla tei, nu theo kaisei naikno nate fanomho na.

⁹ Hatimare mae naokare ne cheke eghu, “Tore, namono biꞌo Ninive igne fodu ka glepo te keli. Tahati ari mala hata nodi silva nei gol teu mare are! Dedei na kmana fara!”

¹⁰ Namono igne la thono groꞌe farahi. Mae naoka igre la hata fahui gobigna lepore. Theo kaisei glepo te au na. Naiknore mhaghu fara, ne thofno gla'e soru, eghuteuna tathadi nei foflodi teure thono diꞌa fara filodi re.

^11-12 Tifa na namono biꞌo igne neke au nogna nafnakno biꞌo. Neke jateula kaisei khora te au lion tagna te mala faghaghamu thugna ra neku. Eghuteuna lion nalhaꞌugna baludi khetognare au fakeli tagna baludi thudire. Naikno gna namono biꞌo igne jateula lion te falehe buluka te pala te tei ka nogna khora na ra eghu. Naꞌa kathu sasaka buluka igne, mala ghamu khetogna nei thugna teure. Eghuteuna khora igne fodu ka nafnahi. Nu gognarona, namono biꞌo igne la groꞌehi la theo tokagnahi!

¹³ Igne nogna nonomho Lord mae ihei te au nolaghi fateote'o ranghini namono biꞌo Ninive, “Fanomho ghotilo ia. Iara ngala nomi mae naoka ghotilo na. Iara ginauna gnubra nomi chariot mala magra ghotilo are. Neuba nomi mae soldia ghotilo are ne nheta fara jateula lion neu, mare ginauna lehe ka magra. Eghuteuna gobigna lepo teke hata ghotilo ka nomi naokare, iara ginauna na kafe hata fadelei ka ghotilo. Ghotilo ginauna theome tangomana te fatei mae mala hata nonomho te mala huhurudi keha kantri are te mala au ke parimi ghotilo na.”