Profet Malakai 2 - Buka Blahi Ka Cheke Holo

Lordne cheke faheta ka mae pris eidi nodi farirhiu mare te diꞌa igre

¹ Lord mae ihei te au nolaghi fateoteꞌo igne ne cheke eghu, “Ghotilo mae pris ra. Gognarona iara ari ka ghotilo cheke igne.

² Jame ghotilo theome leghu ghau iara ba theome ghatho tahuni nanghagu iara na, iara ginauna ei puhi biꞌo mala thoke ghami ghotilo nei thokeni nakarhami keli ghotilo mae pris ra. Uve, iara enihi ka ghotilo, naugna ghotilo ne theome ghatho tahuni nanghagu iara na.

³ “Naugna igne, iara ginauna fagnafani vikemi ghotilo gne, eghuteuna iara ginauna ghiha tathami nei foflomi teu ghotilo are ka butu te atha fajifla ghotilo ka buluka teke fafara ghotilo are. Eghume ghotilo theome naba te eni nogna gloku pris, eghuteuna iara ginauna atha ghami ghotilo baludi butu tuare mala tei koko ka chara.

⁴ Ka narane tuana, ghotilo ginauna laseni iara te cheke faheta ka ghotilo igne, mala theome gnafa nhaꞌa cheke teke eni iara tifa balumi ghotilo mae pris ka vikegna Livae.

⁵ Ka nhaꞌa cheke igne, iara neke baubahu mala tusu ari nakarha te keli nei pharikeli ka vikemi ghotilo are. Uve, iara eni igne mala ghatho tahuni mare nanghagu iara na.

⁶ Mare farirhiudi naiknore mala leghuni kolho puhi te doglo na. Mare neke leghuni puhigu iara te doglo igne mala au fakeli kau pharikeli, mala toghodi kmana naikno mala theome leghuni puhigna nakhibo.

⁷ “Mae pris igre nogu mae mala atha nonomho iara Lord mae te au nolaghi fateoteꞌo. Eghume, mare mala farirhiudi naiknore mala lase fakelini thofno puhigu iara na, eghuteuna naiknore mala mei atha glalase ka mare.

⁸ Nu ghotilo mae pris gre la theome leghunihi puhi te doglo. Eghuteuna gobigna lepo te farirhiu ghotilo ka naiknore, batudi kmana mala jafra. Ghotilo huhughuni hi nhaꞌa cheke teke eni iara balumi ghotilo ka vikegna Livae.

⁹ Eghume, iara snakredi naikno te gnafa igre mala famamaja ghami ghotilo, naugna ghotilo ne tiromi leghuni kolho puhigu iara na, nu leghudi kolho keha naiknore kate farirhiudi ghotilo re.” Igne nogna cheke Lord mae ihei te au nolaghi fateoteo.

Maedi Juda tolaghi ka gaꞌasedi keha namono delei

¹⁰ Mae profet Malakai ne cheke eghu ka mare, “God na kmada tahati, mana teke vuavuha ghita tahati gnafa. Jame te eghu na, naugna unha si ghotilo te theome leghuni u nhaꞌa cheke teke eni God baludi ku'eda tifa ra? Ba? Naugna unha si ghotilo te goigoni noda na au fodu tahati gnea?

¹¹ “Ghotilo naiknomi Juda huhughuni nhaꞌa cheke teke eni tahati balugna God. Uve, ghotilo Jerusalem nei keha vido te gnafa ka kantri igne edi glepo te thono diꞌa fara. Ka puhi te tolaghi ghotilo ka gaꞌasedi keha kantri delei te pogho soru te tarai ka mumuju, eghuteuna ghotilo mei ne eni puhi te diꞌa na ka nogna Sugablahi Lord.

¹² Mae ihei te eni nafnata puhi te diꞌa igne, nabagna na lisa lao ka khamegna Lord mala atha fadelei ka vikeda tahati maeda Israel. Eghuteuna tahati ginauna theome snakreni mana mala loku fodu baluda tahati kate mei fafara tahati ka narane te mei fafara tahati ka Lord na mae ihei te au nolaghi fateoteꞌo.”

Lordtheome magnahagheni mae ihei te koko khetogna na

¹³ Mae profet Malakai ne cheke eghu, “Kaisei glepo te chekeni koba ghotilo na igne: Kate laseni ghotilo te theome magnahagheni Lord unha te tusu lao ghotilo ka mana na, ghotilo tanhi ghilei lao ke kligna olta kholo te tathamire.

¹⁴ Ba? Naugna unha site eghu ghotilo gnea? Mana theome magnahaghedi unha te tufa ghotilo ka mana re, naugna mana lasedi te theome tajini ghotilo nomi nhaꞌa cheke teke eni ghotilo ka tholaghi ia kate tolaghi. Kani teke majaghani na ghotilo neke nhaꞌa cheke ka khetomire. Eghuteuna neubane eghu ngau, ghotilo theome leghuni kolho nomi nhaꞌa cheke na.

¹⁵ “Nu kate eni repa nhaꞌa cheke igne, God loku fodudi repa mala jateula kaisei thini nei kaisei gaoghatho eghu ngala repa. Naugna unha si God te eni ignea? God neke eni igne mala au sua vuragha ghotilo neku, eghuteuna goro sua igre mala goro thugna God. Eghume ghotilo mala reireghi fakelini nakarhagna thegna na, thosei huhughuni nhaꞌa cheke teke eni ghotilo ka narane teke loku fodu ghami God.

¹⁶ “Igne nogna cheke Lord noda God tahati maeda Israel. Mana neke cheke eghu, ‘Iara theome magnahagheni nafnata puhi te koko ghotilo khetomi gre. Nafnata puhi te koko ghotilo khetomire igne, iara thofno tiroguni fara. Eghume, te chekeni iara na, reireghi fakelidi nakarhami are, nei thosei huhughuni nomi nhaꞌa cheke teke eni ghotilo ka narane teke tolaghi ia eghu.’ ”

Narane God te mala fatedi nogna naiknore ginauna mei

¹⁷ Mae profet Malakai ne cheke eghu, “Lord na theome magnahaghei te nomhidi nomi cheke ghotilo are. “Nu ghotilo cheke eghu fabrahu koba, ‘Naugna unha si mana te theome magnahaghedi noda cheke tahati grea?’ “Mana theome magnahaghei nomhidi nomi cheke ghotilo re naugna ghotilo ne cheke eghu fabrahu koba, ‘Lord na theome diꞌatagna ka mae ihei te tapla jafra ka nakhibo na.’ Eghuteuna ghotilo jaola cheke eghu koba, ‘Naugna unha si God te theome fatedi naiknore ka puhi te doglo gnea?’ ”