Profet Malakai 1 - Buka Blahi Ka Cheke Holo

Cheke ululahu

¹ Igne cheke teke cheke Lord ka mae Malakai mala toutonu mana ka naiknodi Israel.

God namhadi naikno te karha mei ka vikegna Israel

² Igne unha teke chekeni Lord, “Ghotilo te karha mei ka vikegna Jekop ra, iara thofno namha ghami ghotilo fara.” Nu ghotilo cheke eghu ka mana, “Mala faꞌunha sagho te namha ghami ghehati gnea?” Aonu Lord ne cheke eghu, “Uve, tifa na mae Jekop ghe mae Iso ra neke phei mae thabusigna. Eghuteuna iara neke namhani mae Jekop, eghuteuna iara neke jaola neke namha ghami ghotilo naikno teke karha mei ka vikegna mae Jekop ra eghu.

³ Nu iara neke theome magnahagheini mae Iso nei iheire te karha mei ke leghugna manare. Naugna igne iara snakredi mae naokare mala mei goigonini nodi namono vikegna mana teke au ka thogele na mala nodi namono khuma mata.”

⁴ Naiknodi Idom teke karha mei ke leghugna mae Iso igre jame cheke eghu, “Neuba mare ne mei goigoni noda namono tahati gne, tahati tangomana teke hohoro fapulo na.” Nu Lord mae ihei te au nolaghi fateoteꞌo igne ne cheke eghu, “Uve, jame teke hohoro fapulo ghotilo na, iara ginauna kiloni namono Idom igne, ‘Nodi namono iheire te tapla jafra ka nakhibo’ eghuteuna Lord ginauna diꞌatagna fabrahu ka naiknodi Idom gre.

⁵ Mana ne cheke eghu, ‘Ghotilo naiknomi Israel ra ginauna filo tathami glepo te chekedi iara igre. Eghuteuna kate filodi ghotilo glepo igre, ghotilo ginauna cheke eghu: Lord na au nolaghi fateoteo! Mana tangomana jaola te fakakhana nogna nolaghi na ke kosi kantri Israel. ’ ”

Lordne cheke faheta ka hatimare mae pris

⁶ Igne nogna cheke Lord mae ihei te au nolaghi fateoteꞌo. Mana ne cheke eghu ka hatimare mae pris, “Leuleghu fata na mae sitei na ghatho tahuni mae kmagna na, eghuteuna mae gloku na mana thofno leghuni nogna mae funei na. Eghume iara thofno mae kmami ghotilo. Naugna unha si ghotilo te theome leghudi nogu cheke iara grea? Iara nomi mae funei ghotilo. “Ghotilo mae pris gre cheke fadiꞌani nanghagu iara na. “Nu ghotilo cheke eghu, ‘Ba? Niha ngala si ghehati teke cheke fadiꞌani nanghamu iagho na ia?’

⁷ “Filo si ghotilo, ghotilo cheke eghu, ‘Ba? Niha ngala si teke cheke fadiꞌani ghehati nanghamu iagho naia?’ “Nu te chekeni iara ka ghotilo na, ‘Leghu fata na, ghotilo loku fadiꞌa ke kligna nogu olta iara.

⁸ Ghotilo fafara ka iara buluka te dofu, te fogra, te lehe ghahedi teu igre. Ba? Tuare site doglo ka gaoghathomi ghotilo rea? Fariuriu atha tei si ghotilo nafnata gano tuare ka nomi mae funei na, na keli tagna mana neu si ghotilo ia? Thono theo fara!’

⁹ “Ghotilo mae pris gre cheke eghu koba, ‘Tahati tore ka God mala kokhoni ghita nei togho ghita eghu mana!’ Tore, iara tirogu ghami ghotilo. Iara theome kokhoni ghami ghotilo! Naugna ghotilo atha mei ka iara fafara te diꞌa tuare.

¹⁰ “Fanomho si ghotilo, igne nogna cheke Lord mae ihei te au nolaghi fateoteꞌo na, ‘Mae pris cheke eghu koba ka ghotilo, “Bobotho Sugablahi ana mala thosei tei ruma ghotilo mala fafara ke kligna olta.” Naugna iara theome kelitagu ka ghotilo, iara ginauna na tirogudi fafara te atha te mei ghotilo tuare.

¹¹ Naikno te gnafa ka kantri te gnafa teu ka nauthoglu na igre ginauna atha insens nei gano eghu mei mala fafara ka olta, eigna mare ghatho tahu ghau iara.’

¹² “Nu ghotilo cheke fadiꞌani nogu olta iara na, eghuteuna ghotilo atha mei gano te tiromidi themi re mala fafara.

¹³ Ghotilo cheke eghu koba, ‘Ghehati hongo ghami kate edi koba glepo igre!’ Uve, nafnata cheke te eni ghotilo igne jateula te kmisu mei ka tathagu nei foflogu teu iara gre eghu. Leuleghu fata na ghotilo atha mei koba ka iara buluka teke blau, te lehe gahedi, te au fogra tadi teu igre mala fafara ka iara. Ba? Ne magnahaghedi iara nafnata fafara tuare neu si ghotilo ia? Thono theo fara!

¹⁴ Iara ginau tibridi iheire te nhaꞌa cheke chaichaghi ka iara igre. Naugna mare ne theome leghuni nhaꞌa cheke mala atha mei famane sipu mala fafara ka iara tekura, nu mare atha mei ka iara sipu te diꞌare. Iara mae king biꞌo, mae ihei te nolaghi fateoteꞌo, eghuteuna naikno te gnafa ka nauthoglu igne mala kilo fnakno ghau iara. Uve, igne nogna cheke Lord.”