Profet Maeka 7 - Buka Blahi Ka Cheke Holo

Naiknodi Israel leghuni kolho puhi te diꞌa na

¹ Iara kokhoni ghau fara! Iara diꞌa nagnafagu fara! Iara jateula mae te rofo fara te tei tafri mala hiro sisi mala ghamu teura eghu kolho. Nu theo kaisei sisi te au ka gaju fig nei gaju grep. Mare la atha fateohi sisi te gnafa re.

² Uve, jateula nafnata puhi tuana eghu mana theome tangomana te filoni kaisei gano na, ka kantri igne, theo kaisei naikno te leghuni puhigna God te doglo na. Theo kaisei naikno te ghatho tahuni God. Naikno te gnafa gre ofou kolho te mala aknu faleheni keha mae na. Mare jateula mae ihei te horo phighoro te mala fakhale nanghaji ra eghu chaghidi kheradi thedi re.

³ Naiknore kafe laseni fara te mala edi glepo te diꞌa re. Mae biꞌore loku fodu mala edi gaoghatho te diꞌa. Leuleghu fata na mae mala baubatu nei mae mala fate teu igre mare famaemahedi naiknore mala chaghidi keha naiknore ka sileni. Mae biꞌo igre huhurudi naiknore mala edi kolho unha te magnahaghedi thedi re.

⁴ Neuba keha ka mae igre ne doglo katha kolho salaꞌudi keha mae re, are jaola theome doglo ka tathagna God. Mare jateula phono nei buburu fachuchuru eghu theo nafudi kolho. Nu la thokeni hi nogna narane God te mala paradi mare na. Mana neke kurudi profet jateula mae greireghi eghu mala kulu cheke faheta ka mare. Gognarona, puhi biꞌo teke chekedi mae profet ra thokedi naiknore, eghuteuna mare theome tangomana te laseni unha nate eni na.

⁵ Ghotilo mala thosei rouronuni kaisei naikno neubane thofno kheramu ba khetomu. Ghotilo mala faghuai eghu ka cheke te chekedi ghotilo ka khetomi gaꞌase ba khetomi nalhaꞌu te thofno namhadi fara, naugna ghotilo jaola theome rouronudi nafnata naikno igre.

⁶ Gognarona mae sua nalhaꞌu na theome ghatho tahuni kmagna na, eghuteuna sua gaꞌase na faparini idogna na. Gaꞌase majaghani na fapholai balugna nanghogna na, eghuteuna tharakna thongana naoka fari thedi kolho.

⁷ Nu, iara ginauna ofoni Lord kolho, naugna iara thofno laseni te mana ginauna mei mala fakarhi ghau iara. Lord ihei te nogu God iara igne ginauna nomhi meini nogu tharai iara na.

Lordginauna fakarhidi nogna naiknore

⁸ Neuba tahati ne uka pari, nu noda naoka tahati gre theome tangomana te glealeꞌa kolho ka puhi biꞌo igne. Tahati uka pari, nu tahati ginauna nake kegra haghe. Neuba tahati ne gnokro kate romno, nu Lord thegna ginauna noda naphae tahati.

⁹ Tahati tapla jafra neke figri tagruni Lord. Naugna igne mana diꞌatagna ka tahati. Nu ke leghu, mana ginauna phile ka tahati, eghuteuna mana ginauna fadoglidi glepo te diꞌa teke edi noda naoka ka tahati. Mana ginauna atha fajifla ghita ka naphae funu kate romno. Eghuteuna tahati ginauna filoni Lord te doglo fabrahu.

¹⁰ Ka narane tuana, naokare ginauna filodi glepo igre, eghuteuna mare ginauna mamaja fara. Mare mamaja naugna tifa na, mare neke maꞌe eghu ghita, “Ahevau Lord na, nomi God ghotilo ia?” Ghotilo ginauna filoni Lord na uludi nei tapla ka mare, jateula mae ihei te nolo ka nabrou ke lamna chopu ra eghu.

¹¹ Ka narane tuana, ghotilo naiknomi Jerusalem mala ke babana fapulo gringni gna namono igne. Eghuteuna nomi nohi ghotilo gne ginauna nake biꞌo.

¹² Ka narane tuana kherada tahati teke tei au ka keha kantri ra ginauna nake pulo mei ka namono igne. Iheire te au ke raru Asiria, nei ke mata Ijep, eghuteuna funu jare tei posa ke maghati Khoꞌu biꞌo Iufretis, neuba mare ne au namo ka thongna ba ke kligna thogele, mare te gnafa na ginauna nake pulo mei ka namono igne.

¹³ Nu keha vido te gnafa ka nauthoglu igne aheva te au teu nogna naoka Lord, ginauna vuhai namono nagou, naugna naikno gnare te leghudi fabrahu puhi te diꞌa re.

Profet Maeka ne tarai kaLordne cheke fakelini mana

¹⁴ Lord, ghehati nou naikno iagho eigna iagho neke vahi ghami. Iagho reireghi fakeli ghami jateula nou sipu iagho eghu. Neuba ghehati ne nou sipu iagho ne au mata, nu glose te au famane buburu au faligoho ghami ghehati. Eghume, ghehati tore nigho iagho te mala snakre ghami ghehati nou sipu te gnafa gre mala ghamu ka famane buburu Besan nei Gilead, jateula nou sipu iagho teke ghamu tagna tifa ra eghu.

¹⁵ Lord cheke tughu ghita ne cheke eghu, “Uve, iara ginauna edi kofubobhoi fari hoteimi ghotilo, jateula teke edi iara tifa ka narane teke atha iara kuꞌemi ghotilo teke jifla Ijep.”

¹⁶ Naiknodi keha kantri gre ginauna filodi kofubobhoi igre. Eghuteuna neuba mare ne rheta gognarogne, nu mare ginauna mamaja. Mare ginauna rhana nodi fara, eghuteuna mare ginauna fofotho foflodi nei khulidi teure naugna mare ne jaglo nodi fara ka nogna nolaghi Lord.

¹⁷ Mare ginauna agra pari jateula mogo eghu. Eghuteuna kate jifla mei mare ka nodi vido mala poru na, mare ginauna mhaghu fififri fara. Eghuteuna naugna te mhaghu fara mare na, mare ginauna tughu gaoghathodi re mala ghatho tahuni Lord nomi God ghehati.

¹⁸ Lord, theo kaisei God jateula iagho teuna. Iagho paradi nou naiknore, nu iagho atha fadelei nakhibodi iheire te karha teu eghuteuna iagho theome tangomana te goigonidi mare na. Iagho ginauna na theome diꞌa tamu fabrahu, naugna leuleghu fata na iagho glealeꞌa kolho fagaglana gna iagho te ghatho tahu ghami ghehati.

¹⁹ Lord, ghehati lase nigho iagho te kokhoni ghami ghehati, eghuteuna iagho ginauna atha fadelei nakhibomi ghehati gre mala koko tei fari hotei nhorora.

²⁰ Ghehati tharakna gna Jekop rouronu nigho fabrahu. Uve, ghehati lase nigho iagho ginauna ghatho tahu ghami ghehati fabrahu nei namha ghami ghehati tharakna gna Ebraham. Ghehati thofno laseni igne, naugna iagho neke nhaꞌa cheke ka kuꞌemi ghehati tifa ra.