Profet Maeka 6 - Buka Blahi Ka Cheke Holo

Lordatha naiknodi Israel ka kot

¹ Ghotilo mei ka nogna kot Lord igne mala fanomho fakeli ka cheke nate chekedi Lord ka ghotilo igre! “Lord, mei mala chekedi iagho nou cheke re ka naiknore. Iagho cheke faheta, eghuteuna thogele nei gukhu teu igre tangomana te nomhidi nou cheke iagho re.

² “Ghotilo thogele biꞌo ra, famane fanomho mei! Ghotilo thina mala famamhaku gna nauthoglu igne, neke kegra mei funu tifa, fanomho mei ghotilo! Ghotilo fanomho mei ka cheke te chekedi Lord ka nogna naikno Israel.”

³ Lord ne cheke eghu, “Ghotilo nogu naikno iara! Unha nafnata glepo te diꞌa teke edi iara teke goigonidi gaoghathomi ghotilo re? Unha nafnata puhi biꞌo teke edi iara te thofno ninhigrana fara ka nakarhami ghotilo re? Te keli na ghotilo cheke tughu ka iara!

⁴ Kani teke loku jateula naikno sneka teku kuꞌemi ghotilo Ijep tifa ra, iara neke atha fajifladi ka kantri tuana mala snagla mare. Iara neke kuru teidi Moses, Eron, nei greghadi Miriam mala batudi mare mala ke pulo mei.

⁵ Ghotilo nogu naikno iara ra! Ghotilo ke ghatho fapulodi gobigna lepo King Balak gna Moab teke magnahaghei fariuriu tibridi kuꞌemi ghotilo ra, eghuteuna ghathoni cheke tughu Balam, thugna Beo, teke tusu lao ka mana. Ghatho fapulodi ka glepo teke edi ka nabrou, kani teke kafe jifla mare teke kasa ka Khoꞌu biꞌo Jordan mala tei ka namono Akesia mala tei ka namono Gilgal. Te keli na ghotilo mala ghatho fapulodi gobigna lepo te keli igre, eghuteuna ghotilo lasedi gobigna lepo teke edi iara teke fakarhidi kuꞌemi ghotilore ka narane tura.”

Famane puhi te magnahagheniLord

⁶ Unha nafnata glepo nate atha te mei tahati te mala fafara ka Lord mae ihei te God gna kligna na? Ba? Tahati ginauna atha mei famane buluka majaghani mala gahu jateula fafara eghu ka mana?

⁷ Jame tusu lao kmana thogha sipu tahati ka mana. Ba? Mana ginauna tangomana te glealeꞌa na? Ba jame atha mei kmana oliv oel tahati ka mana. Ba? Mana ginauna tangomana te glealeꞌa na? Jame aknu falehe tahati thuda teke kulu karha re mala tusu lao ka mana. Ba? Fafara tuana tangomana te folidi nakhiboda tahati re? Thono theo fara!

⁸ Lord la chekehi ka tahati unha te keli te magnahaghedi fara mana te mala edi tahati: Tahati mala leghuni puhi te doglo na. Tahati mala thofno namhani nei ghatho tahuni noda God te au baludi nogna naiknore, nei tahati mala theome leghudi noda puhi theda tahati re, nu thofno leghuni noda God.

Lordginauna fatedi naikno iheire chaghidi keha naiknore

⁹ Ihei te lalase na mala thofno ghatho tahuni Lord, mana eha eghu mei ka tahati naiknoda Jerusalem, “Famane fanomho mei ghotilo naikno te kafe salo fodu mei ka namono igne!

¹⁰ Ka sugadi te gnafa naikno te diꞌa igre, mare au famane glepo te keli te athadi mare ka puhi te theome doglo. Eghuteuna nodi stoa te gnafa, mae igre au skel chaichaghi nei kapu mala fananaba glepo ka puhi te theome tutuani. Puhi igne thono diꞌa fara, iara thono tiroguni fara.

¹¹ Iara theome tangomana te atha koko nakhibodi naikno te atha skel chaichaghi nei kapu teu tuara.

¹² Leuleghu fata na naikno te dedei fara ka kantri igne theome gnafa te thofno chaghidi tafri fabrahu naikno te kuma. Naikno te gnafa igre theome cheke kate tutuani nu mare chaghi kolho.

¹³ Eghuteuna naugna te tapla jafra fabrahu ghotilo gne, iara na goigoni fahui ghami ghotilo.

¹⁴ Neuba ghotilo ne ghamu fabrahu, nu ghotilo rofo fabrahu kolho. Neuba ghotilo ne fariuriu tathaji kmana famane glepo, nu ghotilo theome tangomana, naugna gobigna lepo te fariuriu tathaji ghotilo are iara ginauna goigonidi ka narane magra.

¹⁵ Neuba ghotilo ne joꞌu nagare, nu ghotilo theome tangomana te tathaji kaisei gano tagna. Neuba ghotilo edi kmana oliv oel, nu ghotilo theome tangomana te atha naba oel malami themi. Eghuteuna neuba ghotilo ne poji kmana grep mala ei kmana waen, nu ghotilo theome tangomana te koꞌu na.

¹⁶ Glepo igre ginau thoke ghami ghotilo, naugna ghotilo ne leghudi fabrahu puhidi phei king te diꞌa igre, King Omri ghe thugna mana King Ehab. Eghume iara ginauna goigoni namono igne, eghuteuna naikno te gnafa ka kantri gne mare ginauna ghatho fapari ghami ghotilo nei cheke fadiꞌa ghami ghotilo.”