Profet Maeka 3 - Buka Blahi Ka Cheke Holo

Profet Maeka cheke paridi lida di Israel

¹ “Fanomho mei, ghotilo lidami Israel! Nomi gloku ghotilo na mala funei frunidi nogu naikno gre ka puhi te doglo.

² Nu ghotilo thofno tiromini puhi te doglo igne, eghuteuna ghotilo thofno magnahaghei te leghuni kolho puhi te diꞌa na. Ghotilo theome gnafa te chaghidi nogu naikno iara, ghotilo jateula te reku koko gulidi nogu naikno te karha teu igre, eghuteuna kina sasaka nafnahi ka nhubradi re.

³ Uve, ghotilo jateula te ghamudi nei lolhopa nhubradi nei rioridodi ka vido ikodi, jateula mae te riorido nafnahi te mala kuki ka suspen eghu.”

⁴ Eghuteuna ghotilo mae lidami Israel ginauna tanhi ka Lord mala togho ghami, nu mana theome cheke tughu ghami ghotilo. Eghuteuna mana ginauna theome nomhidi nomi tharai ghotilo re, naugna ghotilo ne leghudi kolho puhi te diꞌa re!

⁵ Igne unha te chekeni Lord: “Ghotilo profet chaichaghi ra! Ghotilo chaghidi nogu naikno iara re, eghuteuna batudi tei ka puhi te jafra. Jame kaisei mae foli ghami ghotilo, ghotilo nhaꞌa cheke mala au fakeli ginauna. Nu jame kaisei mae theome foli ghami ghotilo, ghotilo ginauna na theome raugha naoka na mei mala magri ghami ghotilo. Eigna glepo igne, Lord na cheke eghu ka ghotilo,

⁶ Ghotilo profet chaichaghi! Naugna ghotilo ne batu nogu naikno iara re ne tei jafra, nomi narane ghotilo na la namo gnafahi gognarona. Ghotilo ginauna theome tangomana nate filoni kaisei mifi na, eghuteuna ghotilo ginauna theome tangomana nate toutonu eidi glepo nate thoke mei ka narane te theome mei nga teu. Uve, naprai na ginau plulu ka ghotilo mala romno soru, eghuteuna ghotilo ginauna theome tangomana nate filoni kaisei glepo.

⁷ Eghuteuna jame te theome filodi naiknore glepo teke toutonudi ghotilo ra, ghotilo ginauna thofno mamaja fara. Naugna theo kaisei cheke tughu te mei funu ka God.”

⁸ Nu ka iara na, Lord tusu mei nolaghi nei Tharunga gna na ka iara. Eghuteuna mana togho ghau iara mala thofno lasedi iara puhi te doglo te mala fatedi naiknore. Eghuteuna farerheta gaoghathogu iara na mala tangomana iara te cheke fajifladi nakhibodi nogna naikno mana re.

⁹ Ghotilo mae mala baubatu ka naiknodi Israel, fanomho mei ka nogu cheke iara igre! Ghotilo tiromi ni puhi te doglo te mala fate naikno na. Eghuteuna ghotilo ke tughu kolho puhi te doglo igne ka puhi te diꞌa.

¹⁰ Namono biꞌo Jerusalem, nogna namono Lord. Nu ghotilo mala atha sileni kate falehe naikno, nei kate eni puhi te diꞌa na mae mala fate igne. Eghuteuna ghotilo babana haghe namono tuana ka sileni igne.

¹¹ Ghotilo mae mala fate gre snakredi naiknore mala famaemahe ghami ghotilo ka sileni. Ghotilo mae pris gre jaola farirhiudi kolho nogna vetula God mala taba. Eghuteuna profet ra jaola rurutha gaoghathodi mifi igre, nu mala sileni kolho. Nu leuleghu fata na, ghotilo gaoghathomi na Lord ginauna reireghi ghami ghotilo fabrahu. Eghuteuna ghotilo cheke eghu, “Lord na au baluda. Eghume ginauna na theo kaisei puhi biꞌo nate thoke ghita.”

¹² Naugna puhimi ghotilo te diꞌa igre, Lord ginauna atha mei nomi naoka ghotilo ra mala goigoni namono biꞌo Jerusalem. Mare ginauna eni namono biꞌo tuana mala jateula tothoghei thina gna suga eghu. Ka Thogele blahi Saion aheva te au nogna Sugablahi Lord, mare ginauna eni vido tuana mala jateula vido mala nagare eghu kolho. Eghuteuna thogele igne ginauna thafru ka namhata biꞌo.